ކުރިއަށްއޮތް ލޯކަލް ކައުންސިލް އިންތިހާބާއި ފެންނަ ނުފެންނަ ވޯޓުނެގުމަށް ތައްޔާރުވުމުގެ ގޮތުން އިންތިހާބަށް ބޭނުންވާ ވޯޓުފޮށިތައް އަތޮޅުގެ ރަށްތަކަށް ފޮނުވުމުގެ މަސައްކަތް އިލެކްޝަންސް ކޮމިޝަނުން ފަށައިފިއެވެ.

އިލެކްޝަނުން އެކްސްގައި ކުރި ޕޯސްޓެއްގައި ވަނީ، ފޮށިތައް ރަށްރަށަށް ފޮނުވުމުގެ މަސައްކަތް ފަށާފައިވާކަމަށް ބުނެފައެވެ. އެގޮތުން ބައެއް ރަށްރަށަށް ފޮށިތައް މިހާތަނަށް އާއިރު ފޮނުވާފައިވާކަމަށް އިލެކްޝަނުން ވަނީ ބުނެފައެވެ. ފޮށިތައް ފޮނުވަނީ އިލެކްޝަން ކޮމިޝަނުގެ މުއައްޒަފުންނާއި ފުލުހުން ގުޅިގެންނެވެ.

އިލެކްޝަނުން ބުނީ ވޯޓުލާ މަރުކަޒުތަކަށް ބޭނުންވާ ތަކެތި، ކަނޑުމަގުންނާއި ވައިގެ މަގުން ފޮނުވުމުގެ މަސައްކަތް ފަށާފައިވާކަމަށެވެ.

ކުރިއަށްއޮތް ލޯކަލް ކައުންސިލް އިންތިހާބު ބޭއްވުމަށް ތާވަލްކޮށްފައިވަނީ، އަންނަ އޭޕްރިލްމަހުގެ 4 ވަނަ ދުވަހުއެވެ. އެދުވަހު ލޯކަލް ކައުންސިލް އިންތިހާބުގެ އިތުރުން ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްދުވަހެއްގައި ނެގުމަށް ފެނޭތޯ ބެލުމަށް ނަގާ ވޯޓުލުންވެސް ކުރިއަށް ގެންދިއުމަށް ވަނީ ނިންމާފައެވެ.

އިންތިހާބުތަކުގައި ރާއްޖޭގެ އެކި ސަރަހައްދުތަކުގައި ޖުމްލަ 588 ވޯޓުފޮށި ބެހެއްޓުމަށް ނިންމާފައިވާއިރު، މާލެ ސަރަހައްދުގައި 190 އަށްވުރެ ގިނަ ވޯޓުފޮށި އަދި އަތޮޅުތަކުގައި 322 ފޮށި ބަހައްޓާނެއެވެ.