ޓްރަމްޕް، ސައުދީ ވަލީއަހުދު މުޙައްމަދު ބިން ސަލްމާނަށް މަލާމާތްކޮށް ހަޑި ހުތުރު ބަހުން ފުރައްސާރަކޮށްފި
އެމެރިކާގެ ރައީސް ޑޮނަލްޑް ޓްރަމްޕް، ސައުދީ އަރަބިއްޔާގެ ވަލީއަހުދު މުޙައްމަދު ބިން ސަލްމާން(އެމްބީއެސް)އަށް ނިސްބަތްކޮށް ބަދުބަސް ބުނެ، ހަޑި ހުތުރު ބަހުން ފުރައްސާރަ ކޮށްފިއެވެ.
ފްލޮރިޑާގެ މިއާމީގައި ބޭއްވި 'ފިއުޗަރ އިންވެސްޓްމަންޓް އިނިޝިއޭޓިވް' (އެފް.އައި.އައި) ކޮންފަރެންސްގައި ވާހަކަދައްކަމުން ޓްރަމްޕް ވަނީ، ސައުދީ ވަލީއަހުދު މިހާރު ހުންނެވީ އެމެރިކާގެ ކުރިމަތީގައި ވަރަށް ބޮޑަށް ކުޑަކަކޫ ޖައްސަވައިގެން ކަމަށް ދޭހަވާ މޭރުމަކުން ވާހަކަދައްކާފައެވެ.
މާރިޗު މަހުގެ 27 ވީ ހުކުރު ދުވަހު އޮތް މި ސަމިޓުގައި ”ހީ ޑިޑްނޮޓް ތިންކު ހީ ވުޑް ބީ ކިސިން މައި …“ އޭ ބުނެ އެމްބީއެސްއަށް ފުރައްސާރަ ކުރުމަށްފަހު ޓްރަމްޕް ބުނީ، އެމް.ބީ.އެސް އަށް މިހާރު މަޖުބޫރުވެފައިވަނީ އޭނާއާ މެދު ވަރަށް ރަނގަޅަށް ކަންތައް ކުރަން ކަމަށެވެ.
"އޭނާ (އެމް.ބީ.އެސް) ހިއެއް ނުކުރޭ އަހަރެންގެ ފަހަތުން މިހާ ވަރަށް އުޅެން ޖެހިދާނެ ކަމަކަށް. އޭނާ ޖެހޭނީ އަހަންނަށް ވަރަށް ހެޔޮކޮށް ކަންތައް ކުރަން. އެވާހަކަ އޭނާ ކައިރީ ބުނާތި" ޓްރަމްޕް ބުންޏެވެ.
ޓްރަމްޕް އިތުރަށް ބުނި ގޮތުގައި، މީގެ އަހަރެއްހާ ދުވަސް ކުރިން ސައުދީ ވަލީއަހުދު ގަބޫލުކުރެއްވީ އެމެރިކާއަކީ "މަރުވެފައިވާ" ގައުމެއްގެ ގޮތުގައެވެ. ނަމަވެސް، ޓްރަމްޕްގެ ވެރިކަމުގައި އެމެރިކާ އަނބުރާ އިއާދަވެ، ދުނިޔޭގެ އެންމެ ނުފޫޒުގަދަ ގައުމަށް ވެފައިވާ ކަމަށާއި، މި ބަދަލު އެމް.ބީ.އެސް އަށް ގަބޫލުކުރަން ދަތިވި ކަމަށް ޓްރަމްޕް ބުންޏެވެ.
އީރާނާ ދެކޮޅަށް ކުރަމުންދާ ހަނގުރާމައިގައި ގަލްފުގެ ގައުމުތަކުން އެމެރިކާއާ ގާތުން މަސައްކަތް ކުރަމުންދާކަން ފާހަގަކުރަމުން ޓްރަމްޕް ބުނީ، ސައުދީ ވަލީއަހުދަކީ "ވަރަށް ވިސްނުންތެރި، އެކަމަކު އާދައިގެ މިޒާޖެއްގެ ބޭފުޅެއް" ކަމަށެވެ.
އަދި އޭނާއަށް ގިނަ ލަގަބުތަކެއް ލިބިލައްވާފައި ހުރިކަން ފާހަގަކޮށް ޓްރަމްޕް ވަނީ އެކަމަށްވެސް މަލާމާތް ކޮށްފައެވެ.
"އޭނާއަކީ ވަލީއަހުދު، ބޮޑުވަޒީރު، އަދި މުސްތަގުބަލުގެ ރަސްގެފާނު. ދުނިޔޭގައި ހުރި އެހެން އެއްވެސް އިންސާނަކަށްވުރެ ގިނަ ލަގަބު އޭނާއަށް ލިބިފައިވޭ،" ޓްރަމްޕް ބުންޏެވެ.
މީގެ އިތުރުން، ފަހުގެ ރިޕޯޓްތަކުން ހާމަވާގޮތުގައި، އެމް.ބީ.އެސް ވަނީ އީރާނާ ދެކޮޅަށް އެމެރިކާ އާއި އިސްރާއީލުން ކުރިއަށްގެންދާ އަސްކަރީ ހަރަކާތްތައް ހުއްޓާނުލައި ކުރިއަށް ގެންދިއުމަށް ޓްރަމްޕަށް ބާރުއަޅުއްވާފައެވެ. އަދި އޭގައި ވާގޮތުން އެމް.ބީ.އެސް ގަބޫލުކުރައްވާ ގޮތުގައި އީރާނުގެ ސަރުކާރަކީ ގަލްފުގެ ގައުމުތަކަށް އޮތް ދާއިމީ ނުރައްކަލެކެވެ. އެހެންކަމުން، އެމެރިކާގެ އެއްގަމު ސިފައިން އީރާނަށް އަރައި، އެ ގައުމުގެ ތެޔޮ އެކްސްޕޯޓްކުރާ މައި މަރުކަޒު ކަމަށްވާ 'ޚާރްގް އައިލެންޑް' ހިފުމަށްވެސް ވަލީއަހުދު ލަފާދެއްވާފައިވާ ކަމަށް ޚަބަރުތައް ބުނެއެވެ.
Advertisement
This content is created and paid for by advertisers and does not involve Voice Journalists
