މި ސަރުކާރަކީ ކަނަކު އިޝާ ނަމާދަށްދާހެން މަގުމައްޗަށް ނުކުމެ ލާހޫރެމުންދާ ސަރުކާރެއް ކަމަށް އެމްޑީޕީގެ ރައީސް އަބްދުالله ޝާހިދު ވިދާޅުވުމުން، ބްލައިންޑް އެންޑް ވިޝުއަލީ އިމްޕެއަރޑް ސޮސައިޓީ އޮފް މޯލްޑިވްސްގެ ރައީސް ހުސައިން ޝަރީފް ވަރުގަދަ ރައްދެއް ދެއްވައިފިއެވެ.
އެމްޑީޕީން ތިނަދޫ ސިޓީގައި ބޭއްވި ޖަލްސާގައި ޝާހިދު ވިދާޅުވީ މެނިފެސްޓޯއެއް ލިޔެގެން އޭގައި ކަންކަން ކުރާ ގޮތް ތަރުތީބުކޮށް، ހިސާބުކިތާބު ޖަހައިގެން ކަންކަން ކުރުން އެއީ ގައުމެއް ހިންގުން ކަމަށް މި ސަރުކާރަށް ނޭނގޭ ކަމަށާއި މި ސަރުކާރު ދަނީ ލާހޫރެމުން ކަމަށެވެ.
"ކަނަކު އިޝާ ނަމާދަށްދާހެން މަގުމައްޗަށް ނުކުމެ ލާހޫރެމުންދާ ސަރުކާރެއް އަޅުގަނޑުމެންގެ މިއޮތީ. އެ ސަރުކާރަކަށް ނޭނގޭ މެނިފެސްޓޯއެއް ލިޔެގެން މެނިފެސްޓޯގައި ކަންކަން ކުރަންވާ ގޮތްތަކެއް ތަރުތީބުކޮށްގެން ހިސާބުކިތާބު ޖަހައިގެން ކަންކުރުން އެއީކަން ގައުމެއް ހިންގުމަކީ. ލާހޫރެނީ،" އޭނާ ވިދާޅުވި އެވެ.
"ކަނަކު އިޝާ ނަމާދަށް ދާއިރު، އެހެން ނަމާދަކަށް ދިއުމަށް ނުކުރާ ކޮން ކަމެއްތޯ ތަފާތުކޮށް ކުރަނީ؟ އަޅުގަނޑުމެން އިޝާ ނަމާދަށް ވިޔަސް، ނުވަތަ އެހެން ނަމާދަކަށް ވިޔަސް ދަނީ ލާ ހޫރެމުންނެއް ނޫން،" ޝާހިދުއަށް ރައްދު ދެއްވަމުން ޝަރީފް ވިދާޅުވިއެވެ.
މީގެ އިތުރުން ޝަރީފް ފާހަގަކުރެއްވި ގޮތުގައި، ކޮންމެ ޕާޓީއެއްގެ ކޮންމެ މީހަކު ކުރި ކަމަކަށް ވީނަމަވެސް، ނުކުޅެދުންތެރިކަން ހުންނަ މީހުންނަށް ނިސްބަތްކޮށް ކުރާ މިފަދަ ފުރައްސާރަތަކަކީ ބަލައިގަނެވޭނެ ކަންކަމެއް ނޫނެވެ. އަދި މިފަދަ ދަށު ދަރަޖައަކަށް ވިސްނުން ހުންނަނީ މިއަދުގެ ތަހުޒީބީ ދުނިޔެއަށް ލޯ ނުހުޅުވޭތީ ކަމަށްވެސް އޭނާ ސިފަކުރެއްވިއެވެ.
ޝަރީފް އިތުރަށް ވިދާޅުވީ، اللهގެ ރަހުމަތާއެކު މިއަދު ނުކުޅެދުންތެރިކަން ހުންނަ ފަރާތްތަކުން އިޝާ ނަމާދަށް ދަނީ އެފަދަ ފުރައްސާރަކުރާ ފަރާތްތަކަށްވުރެ މާ "ސްމާޓް" ކޮށް ކަމަށެވެ.
"اللهގެ ރަހުމަތުން ފެނުމާއި އިވުން ލިބިފައިވާ އެތައް ބަޔަކަށް، މިސްކިތްތައް ނުފެނި ބަންގީގެ އަޑު ނީވުމަކީ މާ ބޮޑު ނުކުޅެދުންތެރިކަމެއް ނޫންތޯ؟" ޝަރީފް ސުވާލު އުފެއްދެވިއެވެ.
Advertisement
This content is created and paid for by advertisers and does not involve Voice Journalists
