އީރާނުގެ ތެޔޮ އެމެރިކާގެ ބާރުގެ ދަށަށް ގެނެސް، އެ ގައުމުގެ މުހިންމު ތެޔޮ ބަނދަރެއް ކަމަށްވާ "ޚާރްގް އައިލެންޑް" ވެސް ހިފަން ބޭނުންވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފިއެވެ.

އާދީއްތަ ދުވަހު "ފައިނޭންޝަލް ޓައިމްސް" އަށް ދިން ބަސްދީގަތުމެއްގައި ޓްރަމްޕް ބުނީ، އޭނާ އެންމެ ބޮޑަށް ބޭނުންވަނީ އީރާނުގެ ތެޔޮ އަތުލުމަށް ކަމަށެވެ. އެގޮތުން، ވެނެޒުއޭލާގެ ލީޑަރު ނިކޮލަަސް މަދޫރޯ އަތުލައިގަތުމަށްފަހު އެ ގައުމުގެ ތެޔޮ ސިނާއަތް މުއްދަތެއް ނެތް ގޮތަށް އެމެރިކާގެ ބާރުގެ ދަށުގައި ބޭއްވުމަށް ގަސްތުކުރާ ފަދައިން، އީރާނާމެދުވެސް އަމަލުކުރެވިދާނެ ކަމަށް ޓްރަމްޕް ބުންޏެވެ.

އީރާނުގެ ހުޅަނގު އައްސޭރީގައި އޮންނަ ޚާރްގް އައިލެންޑަކީ އެ ގައުމުގެ ތެޔޮ ބޭރުކުރުމުގައި އެންމެ މުހިންމު ދައުރެއް އަދާކުރާ މަރުކަޒެވެ.

ޓްރަމްޕް ބުނީ، އެ ރަށުގެ ދިފާއީ ބާރު ވަރަށް ބަލިކަށި ކަމަށާއި، ވަރަށް ފަސޭހައިން އެމެރިކާއަށް އެތަން ހިފިދާނެ ކަމަށެވެ.

އެމެރިކާގެ އަސްކަރިއްޔާގެ މައި މަރުކަޒު، ޕެންޓަގަން އިން މިހާރު ދަނީ އެ ސަރަހައްދުގައި އެއްގަމު މަގުން ހިންގާނެ އަސްކަރީ އޮޕަރޭޝަންތަކަކަށް ތައްޔާރުވަމުންނެވެ. ނަމަވެސް، މިއީ މުޅި އީރާނަށް އަރައިގަތުން ނޫން ކަމަށް އެމެރިކާއިން ބުނެއެވެ.

މީގެ އިތުރުން، ރައީސް ޓްރަމްޕް ވަނީ އީރާނުގައި ވެރިކަން ބަދަލުވެފައިވާ ކަމަށްވެސް ބުނެފައެވެ.

އެގޮތުން އެއަރ ފޯސް ވަންގައި ނޫސްވެރިންނާ ވާހަކަދައްކަމުން އޭނާ ބުނީ، މަހެއްހާ ދުވަހުގެ ހަނގުރާމައިގައި އީރާނުގެ ގިނަ އަދަދެއްގެ ލީޑަރުން މަރާލެވިފައިވާތީ، މިހާރު އޮތީ މުޅިން ތަފާތު ލީޑަޝިޕެއް ކަމަށެވެ.

އީރާނާއެކު އައު އެއްބަސްވުމަކަށް އާދެވިދާނެ ކަމުގެ އުންމީދު އޮތް ނަމަވެސް، އެމެރިކާގެ މި ނިންމުމާއެކު މެދުއިރުމަތީގެ މަސްރަހު ވަނީ އިތުރަށް ނުތަނަވަސްވެފައެވެ. މިހާރުވެސް އެމެރިކާއިން ދަނީ އެތައް ހާސް ސިފައިންނެއް މެދުއިރުމައްޗަށް ފޮނުވަމުންނެވެ.