މިދިޔަ ސަރުކާރުގެ 'ބިންވެރިޔާ' ސްކީމުގެ ދަށުން މާލެ ސަރަހައްދުން ގޯތި ލިބިފައިވާ ފަރާތްތަކަށް، ގޯތި ދޫކޮށްލުމަށްފަހު ސަރުކާރުން އަޅާ ފްލެޓަށް ކުރިމަތިލުމުގެ ފުރުސަތު ހުޅުވާލާން ނިންމާފައިވާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.

ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ރައީސް ވިދާޅުވީ، އެ ފުރުސަތު މި ފެށޭ އޭޕްރީލް މަހުގެ މެދުތެރޭގައި ހުޅުވާލާނެ ކަމަށެވެ.

ރައީސް ވިދާޅުވީ، ބިންވެރިޔާ ސްކީމުން ގޯތި ލިބުނު މީހުންގެ ތެރޭގައި ވަރަށް ނިކަމެތި ހާލުގައި އުޅޭ މީހުން ތިބި ކަމަށެވެ. އަދި އެފަރާތްތަކުން އެ ގޯތި ހަދަން ގިނަ ދުވަސްތަކެއް ނަގާނެތީ، އެ ގޯތިތައް ދޫކޮށްލުމަށްފަހު މި ސަރުކާރުން އަޅަން މަސައްކަތްކުރާ ފްލެޓުތަކަށް ކުރިމަތިލުމުގެ ފުރުސަތު ފަހިކޮށްދިނުމަށް އެދެމުން އަންނަ ކަމަށެވެ. 

ރައީސް ވިދާޅުވީ ގޯތި ލިބިފައިތިބި މީހުންނަކީ ކުރިން އެއްވެސް ތަނަކުން ބޯހިޔާވަހިކަމެއް ލިބިފައި ނެތް މީހުންނަށް ވުރެ ރަނގަޅު ހާލަތެއްގައި ތިބި ބަޔަކަށް ވުމުން، ފްލެޓަށް ކުރިމަތިލުމުގެ ފުރުސަތު ދިން ނަމަވެސް އެ ހާލަތަށް ރިއާޔަތް ކުރާނެ ކަމަށެވެ. އަދި ފުލެޓް ދިނުމުގެ ކަންކަން ކުރިއަށްދާނީ އިންސާފުވެރި ކަމާއެކު ކަންވެސް ފާހަގަކުރެއްވިއެވެ.

ނަމަވެސް މި ފުރުސަތު ހުޅުވާލުމަށް ޓަކައި ޕޯޓަލްގެ ތެރެއިން ޖާގަ ހަދަން ވަގުތުކޮޅެއް ނަގާނެކަމަށް ރައީސް ވިދާޅުވުއެވެ.

"ކުރިއަށް އޮތް ދެ ހަފްތާގެ ތެރޭގައި އެންމެ ލަސްވެގެން ނިންމާފައި، ބިންވެރިޔާ ސްކީމްގެ ތެރެއިން ގޯތި ލިބިފައި ތިބި ފަރާތްތަކަށް އެ ގޯތިތައް ދޫކޮށްލާފައި ފްލެޓު ހޯދުމުގެ ފުރުސަތު ހުޅުވާލާނަން،" އެ މަނިކުފާނު ވިދާޅުވި އެވެ.