ސަރުކާރުގެ ހުރިހާވެސް ވިސްނުމެއް ހުރީ އިންތިހާބުތައް އެކުއެކީ ބާއްވައި ރައްޔިތުންނަށް ބަސްބުނުމާއި ގޮތްކިއުމުގެ ބާރު ނައްތާލުންކަމަށް ކުރީގެ ރައީސް އިބްރާހިމް މުހައްމަދު ސޯލިހް ވިދާޅުވެއްޖެއެވެ.

އިދިކޮޅު އެމްޑީޕީން ރޭ ކުޅުދުއްފުށީ ސިޓީގައި ބެއްވި ކުޅުދުއްފުށި ތިލަފަތަށް ޖަލްސާގައި ވާހަކަދައްކަވަމުން ވިދާޅުވީ، ސަރުކާރުގެ މިސްރާބް ހުރީ ހުދުމުހުތާރު ވެރިކަމެއް ކުރުމާ ދިމާލަށްކަމަށެވެ. ފެނިގެންމިދަނީ، ރައްޔިތުންނަށް ހިދުމަތް ކުރުމަށްޓަކައި ގެނެސްދީފައި އޮތް ނިޒާމު މުޅިން ރޫޅާލާ މަންޒަރު ކަމަށާއި، މިކަމާ ވިސްނަންޖެހޭކަމަށެވެ.

ރައީސް ސޯލިހް ވިދާޅުވީ، ސަރުކާރުގެ ހުރިހާވެސް މަސައްކަތެއް ހުރީ ރައްޔިތުން އެތައް ގުރުބާނީއެއް ވެގެން ރާއްޖެއަށް މި ގެނައި ނިޒާމް ސީދާ އަނެއްކޮޅަށް ޖަހައި ހުދުމުހުތާރު ވެރިކަމެއް ހިންގާ އުސޫލުން ވެރިކަމުގެ ނިޒާމް ކުރިއަށްގެންދަން ކަމަށެވެ.

އެމްޑީޕީ ކުޅުދުއްފުށި ޖަލްސާ.. ފޮޓޯ: އެމްޑީޕީ

ވެރިކަމާ ހަވާލުވުމަށްފަހު ކަންކަން ވަމުން އައިސްފައިވަނީ އެ ބީދައިންކަމަށްވެސް ރައީސް ސޯލިހް ވިދާޅުވިއެވެެ.

ރައީސް ސޯލިހް ވިދާޅުވީ ވެރިކަމެއް ރައްޔިތުން ބަދަލު ކުރަނީ ކުރިއަށް ވުރެ ރަނގަޅު ހިދުމަތްތަކެއް ލިބޭނޭކަމުގެ އުއްމީދުގައިކަމަށެވެ. ނަމަވެސް ރައީސް ޑރ.މުހައްމަދު މުއިއްޒު އެންމެ ފުރަތަމަވެސް ކުރެއްވި ކަމަކީ މިނިވަން މުއައްސަސާތަކުގެ ބާރު ކަނޑުވާލާ، އަމިއްލަ މުސްތަގިއްލު މުޅި ނިޒާމް އެއްކޮށް ގެނައުމުގެ މަސައްކަތްކަމަށް ފާހަގަކުރެއްވިއެވެ.

އެގޮތުްނ އޭސީސީގެ ބާރު ކަނޑުވާލައި، ޖުޑީޝަރިއަށް ނުފޫޒު ފޯރުވައި އެންމެފަހުން މަޖިލީސްވެސް މުށުތެރެއަށްލައި މެމްބަރުންގެ މިނިވަންކަން ނަގާލާފައިވާކަމަށް ތުހުމަތުކުރެއްވިއެވެ.

އަދުގެ ސަރުކާރުން އިންތިހާބުތައް އެއްކޮށްލަނީ ރަނގަޅު ނިޔަތެއްގައި ނޫންކަމަށް ރައީސް ސޯލިހް ވިދާޅުވިއިރު، މީގެ ކުރިން އެމަނިކްފާނުވެސް ވަނީ ރައްޔިތުން މަޖިލީހުގެ އިންތިހާބާއި ރިޔާސީ އިންތިހާބު އެއްދުވަހެއްގައި ބޭއްވުމަށް ތާއީދުކޮށް ވާހަކަދައްކަވާފައެވެ. ރައީސް ސޯލިހްގެ އެ ވިސްނުން ބަދަލުވެފައިވަނީ އަދުގެ ސަރުކާރުން އެކަން ފެއްޓެވި ހިސާބުންކަން ފާހަގަކޮށްލެވެއެވެ.