ސަރުކާރުގެ ބޯހިޔާވަހިކަން އެންމެންނަށް ސިޔާސަތުގެ ދަށުން ބޭންކް އޮފް މޯލްޑިވްސް (ބީއެމްއެލް) ގެ ސަބްސިޑަރީއެއް ކަމުގައިވާ، ބީއެމްއެލް އެފޯޑަބަލް ލީޒިން ޕްރައިވެޓް ލިމިޓެޑާ ހަވާލުކޮށްގެން ކުރިއަށް ގެންދާ ހައުސިން މަޝްރޫއުގެ ދަށުން އިތުރު ހައުސިން ޔުނިޓްތަކެއް އެޅުމަށް ނިންމާފައިވާ ކަމަށް އިއުލާނު ކޮށްފި އެވެ.
ބީއެމްއެލްގެ ހައުސިން މަޝްރޫއުގެ ދަށުން އެޅުމަށް ނިންމާފައި ވަނީ 3260 ހައުސިން ޔުނިޓެވެ. އެގޮތުން ޗައިނާ މެޝިނަރީ އިންޖީނިއަރިންގ ކޯޕަރޭޝަން (ސީއެމްއީސީ) މެދުވެރިކޮށް 1،224 ހައުސިން ޔުނިޓް އެޅުމަށް ވަނީ ނިންމާފަ އެވެ. އަދި ރަޝީދު ކާޕެންޓްރީ އެންޑް ކޮންސްޓްރަކްޝަން (އާރްސީސީ) މެދުވެރިކޮށް 300 ހައުސިން ޔުނިޓް އެޅުމަށް ވަނީ ބިންގާ އަޅާފަ އެވެ.
ޗައިނާގެ ބީޔޫސީޖީ އާ ހަވާލުކޮށްގެން އިމާރާތްކުރުމަށް ނިންމި 1،190 ޔުނިޓްގެ އަމަލީ މަސައްކަތް ވެސް ވަނީ ފަށާފަ އެވެ. އަދި އަމީން ކޮންސްޓްރަކްޝަން ކޮމެޕެނީ ޕްރައިވެޓް މެދުވެރިކޮށް 364 ހައުސިން ޔުނިޓު އެޅުމަށް މިރޭ ވަނީ ބިންގާ އަޅާފަ އެވެ.
މިރޭ އޮތް ރަސްމިއްޔާތުގައި ބޭންކް އޮފް މޯލްޑިވްސް އިން ވަނީ، މި މަޝްރޫޢުގެ ދަށުން އިތުރު 540 ހައުސިން ޔުނިޓް އެޅުމަށް ނިންމައި މިކަމަށް ބޭނުންވާ ބިން ހަމަޖެހިފައިވާކަން އިއުލާން ކޮށްފަ އެވެ. މިއާއެކު ބީއެމްއެލް އެފޯޑަބަލް ހޯމް ލީސިން އިން 3800 ހައުސިން ޔުނިޓް ތަރައްގީ ކުރާނެ އެވެ. މި މަޝްރޫއުގެ އަމަލީ މަސައްކަތް ނިންމުމަށް ހަމަޖެހިފައިވަނީ 2028 ވަނަ އަހަރު ނިމުމުގެ ކުރިންނެވެ.
Advertisement
This content is created and paid for by advertisers and does not involve Voice Journalists
