އާސަންދައިގެ ދަށުން ހިލޭ އެމްބިއުލާންސްގެ ހިދުމަތް ލިބޭ ހާލަތްތައް އިތުރުކޮށް އިއްޔެ ހިދުމަތްދޭން ފަށައިފިއެވެ.

ރައީސް ޑރ. މުޙައްމަދު މުޢިއްޒު ވަނީ، އެންމެ ފަހުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ހިދުމަތް އިއްޔެ ފައްޓަވާނޭކަމަށް އިއުލާން ކުރައްވައިފައެވެ. އެ ގޮތުން، އިއްޔެއިން ފެށިގެން އެ ބަދަލަށް އަމަލުކުރުން ވަނީ ފަށައިފައެވެ.

އާސަންދައިގެ އުސޫލަށް ގެނައި އިސްލާހުގެ ދަށުން އެމްބިއުލާންސް ބޭނުންކުރެވޭނެ ހާލަތްތައް އިތުރުކޮށްފައިވާއިރު،

އެ ހާލަތްތަކަކީ:

- އިމަޖަންސީގައި ކުއްލި ހާލަތުގައި ހޮސްޕިޓަލަށް މީހުން ގެންދިއުމަށް

- މައްޔިތުން އުފުލުމަށް

- އެނދުމަތިކޮށްފައިވާ މީހުންނަށް އައުޓްޕޭޝަންޓް ހިދުމަތް ނެގުމަށް ހޮސްޕިޓަލަށް ގެންދިއުމުގައި

- ވީލްޗެއާގައި ގެންގުޅޭ މީހުންނަށް އައުޓްޕޭޝަންޓް ހިދުމަތް ނެގުމަށް ހޮސްޕިޓިލަަށް ގެންދިއުމަށް

- އެކިކަހަލަ ޑިސްއެބިލިޓީ ހުންނަ ނުކުޅެދުންތެރިކަން ހުންނަ މީހުންގެ ތެރޭގައި ފިޒިކަލް ޑިސްއެބިލިޓީ އާއި މެންޓަލް ޑިސްއެބިލިޓީ އަދި އޯޓިޒަމް ޑައުންސިންޑްރޯމް ފަދަ މީހުންނަށް ވެސް އައުޓްޕޭޝަންޓް ހިދުމަތަށް ހޮސްޕިޓަަލަށް ގެންދިއުމަށް

- ސިއްހީ މަރުކަޒުގައި ފަރުވާ ހޯދާ މީހުން އެހެން މަރުކަޒަކަށް ފަރުވާއަށް ގެންދަންޖެހޭ ހާލަތުގައިއާއި އިވެކުއޭޓް ކުރެވޭ ހާލަތުގައި

- ބަލި މީހާ ރާއްޖެއިން ބޭރަށް ރިފާކުރެވޭ ހާލަތުގައި އެއާޕޯޓަށް ނޫނީ ޖެޓީއަށް ގެންދިއުމަށް

- ތެލެސީމިއާ ބަލި ތަހައްމަލުކުރާ މީހުންނަށް އައުޓްޕޭޝަންޓް ހިދުމަތަށް ގެންދެވޭ ހާލަތުގައި

ރައީސް ވަނީ އާސަންދައިން އެމްބިއުލާންސްގެ ހިދުމަތް ނުލިބޭތީ އެކަމުގެ ކަންބޮޑުވުންތައް އާންމުންގެ ފަރާތުން ލިބޭ ކަން ފާހަގަކުރައްވައިފައެވެ. މި ބަދަލާ އެކު ގިނަ ލުއިތަކެއް ރައްޔިތުންނަށް ލިބިގެންދާނެ ކަމަށް ރައީސް ވަނީ ވިދާޅުވެފައެވެ.