ދަރަވަންދޫ އެއާޕޯޓް ތަރައްގީ ކުރަން ފަށައިފި، ނިމުމުން ވަރަށް ރީތި ވާނެ
ބ. ދަަރަވަންދޫ އެއާޕޯޓް ޓާމިނަލް ތަަރައްގީ ކުރުމުގެ މަސައްކަތް މިއަދު ރަސްމީކޮށް ފަށައިފި އެވެ.
ދަަރަވަންދޫ އެއާޕޯޓް ސަރަހައްދުގައި އޮތް ރަސްމިއްޔާތެއްގައި މި މަސައްކަތް ރަސްމީކޮށް ފައްޓަވައި ދެއްވީ ޓްރާސްޕޯޓް މިނިސްޓަރު މުހައްމަދު އަމީން އެވެ. އެއާޕޯޓް ތަރައްގީކޮށް އަދި މިއަދުން ފެށިގެން ހިންގަމުން ގެންދާނީ ގައުމީ އެއާލައިން ހިންގާ އައިލެންޑް އޭވިއޭޝަނުންނެވެ.
އެކަމުގެ އެއްބަސްވުމުގައި ވެސް މިއަދު ވަނީ ސޮއިކޮށްފަ އެވެ.
ދަރަވަންދޫ އެއާޕޯޓް ތަރައްގީ ކުރަން ވަނީ ފަށާފައި --
ދަރަވަންދޫ އެއާޕޯޓް ޓާމިނަލް ތަރައްގީކޮށް ނިމުމުން ހުންނާނެ ގޮތުގެ ވީޑިއޯ ޕްރެޒެންޓޭޝަނެއް ވެސް ވަނީ ދައްކާލާފަ އެވެ. އައިލެންޑް އޭވިއޭޝަނުން ބުނީ ތަރައްގީގެ މަސައްކަތް ނިމޭއިރު ޓާމިނަލް އިމާރާތް ދެ ގުނަ ބޮޑު ކުރާނެ ކަމަށެވެ. އަދި އެރައިވަލް ހޯލް ވެސް ދެ ގުނަ ބޮޑުކުރާނެ އެވެ.
މީގެ އިތުރުން ޗެކިން އޭރިޔާ ބޮޑުކޮށް ތިން ގޭޓް ތަރައްގީ ކުރާނެ އެވެ. އަދި އެއް ފަހަރާ ތިން މަތިންދާބޯޓަށް ހިދުމަތް ދެވޭ ފެންވަރަށް ތަރައްގީ ކުރާނެ އެވެ. ފެންވަރު ރަނގަޅު ލައުންޖެއް ވެސް ތަރައްގީ ކުރާނެ އެވެ.
އެންމެ ބާރުބޮޑު އެއާޕޯޓް, މިހާތަނަށް 42000 ފްލައިޓް
ދަރަވަންދޫ އެއާޕޯޓަކީ ރާއްޖޭގެ އެންމެ ބާރުބޮޑު ޑޮމެސްޓިކް އެއާޕޯޓެވެ. ދަރަވަންދޫ އެއާޕޯޓަށް މިހާރުވެސް ދުވާލަކު 8 ފްލައިޓް އޮޕަރޭޓް ކުރެ އެވެ.
ގައުމީ އެއާލައިން މޯލްޑިވިން އިން ވެސް ދުވާލަކު ހަތަރު ފްލައިޓް ބާއްވަ އެވެ. މޯލްޑިވިއަންގެ އުދުހުންތައް ވެސް އެންމެ ގިނަ ޑޮމެސްޓިކް އެއާޕޯޓަކީ ވެސް މިއީ އެވެ.
ދަރަވަންދޫ އެއާޕޯޓް ތަރައްގީ ކުރަން ވަނީ ފަށާފައި --
މިހާތަނަށް ދަރަވަންދޫ އެއާޕޯޓަށް 42,000 ވުރެ ގިނަ ފްލައިޓް އޮޕަރޭޓް ކޮށްފައިވެ އެވެ. 1.8 މިލިއަން ފަސިންޖަރުންނަށް ހިދުމަތް ދީފައިވެ އެވެ. އެއާޕޯޓާއެކު 99 ވަޒީފާ ވަނީ އުފެދިފަ އެވެ.
އަތޮޅުގައި 16 ރިސޯޓް, 79 ގެސްޓް ހައުސް
މިއީ ރާއްޖޭގައި ޓޫރިޒަމް އެންމެ ފުޅާ އެއް އަތޮޅު ވެސް މެ އެވެ. މިހާރުވެސް ބ އަތޮޅުގައި 16 ރިސޯޓެއް އެބަ އޮތެވެ. އިތުރު ރިސޯޓްތައް ތަރައްގީ ކުރުމުގެ މަަސައްކަތް އެބަ ހިނގަ އެވެ.
ދަރަވަންދޫ އެއާޕޯޓް ތަރައްގީ ކުރަން ވަނީ ފަށާފައި --
2012 ވަނަ އަހަރުން ފެށިގެން މިހާތަނަށް ދަރަވަންދޫ އެެއާޕޯޓުން ހިދުމަތް ހޯދި 1.8 މިލިއަން ފަސިންޖަރުންގެ ތެރެއިން 70 އިންސައްތަ އަކީ ފަތުރުވެރީންނެވެ.
މީގެ އިތުރުން ބ އަތޮޅުގައި ލޯކަލް ޓޫރިޒަމް ވެސް ދަނީ ވަރަށް ބޮޑަށް ފުޅާ ވަމުންނެވެ. މިހާރުވެސް 79 ގެސްޓް ހައުސް ރަޖިސްޓްރީކޮށް ހިދުމަތް ދެމުން ދެ އެވެ. މުޅި އަތޮޅުގައި 4,600 ވުރެ ގިނަ ޓޫރިސްޓް އެނދު އެބަ ހުއްޓެވެ.
ދަރަވަންދޫ އެއާޕޯޓް ތަރައްގީ ކުރަން ވަނީ ފަށާފައި --
ބ އަތޮޅުގައި މީހުން ދިރިއުޅޭ 13 ރަށް އޮތްއިރު 10,000 ވުރެ ބޮޑު އާބާދީއެއް އެބަ އޮތެވެ. މުޅި ބ އަތޮޅަށް ދަރަވަންދޫ އެއާޕޯޓް ތަރައްގީ ކުރުމުގެ ފައިދާ ލިބޭނެ އެވެ.
Advertisement
This content is created and paid for by advertisers and does not involve Voice Journalists
