އެމެރިކާއާއި އިސްރާއިލުން އީރާނާއި ދެކޮޅަށް ކުރަމުންދާ ހަނގުރާމައަކީ އިނގިރޭސިވިލާތުގެ ހަނގުރާމައެއް ނޫން ކަމަށާއި، އެ ހަމަނުޖެހުމުގެ ތެރެއަށް އެގައުމު ނުވެއްދޭނެ ކަމަށް އިނގިރޭސި ބޮޑުވަޒީރު ކިއަރ ސްޓާމަރ ވިދާޅުވެއްޖެއެވެ.
ބުދަ ދުވަހު ޑައުނިންގް ސްޓްރީޓްގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ސްޓާމަރ ވިދާޅުވީ، މަސްރަހު ފިނިކުރުމަށްޓަކައި ކުރެވެން ހުރި ހުރިހާ މަސައްކަތެއް އިނގިރޭސި ސަރުކާރުން ބާރުމިނުގައި ކުރަމުންދާ ކަމަށެވެ. ނަމަވެސް، މި ހަނގުރާމައިގެ ސަބަބުން ދިގު މުއްދަތެއްގައި އިނގިރޭސިވިލާތަށް އޭގެ އަސަރުތަކެއް ކުރާނެކަން ގަބޫލުކުރައްވާ ކަމަށްވެސް އޭނާ ފާހަގަކުރެއްވިއެވެ.
މި ހަފުތާގެ ތެރޭގައި ފޮރިން ސެކްރެޓަރީ އިވެޓް ކޫޕަރ ބާއްވާ ބައްދަލުވުމެއްގައި، ގަލްފް ސަރަހައްދުގެ ކަނޑުގެ ސަލާމަތާއި ރައްކާތެރިކަން ކަށަވަރުކުރުމާ ގުޅޭގޮތުން މަޝްވަރާ ކުރައްވާނެ ކަމަށް ސްޓާމަރ ވިދާޅުވިއެވެ.
އަދި މި ބައްދަލުވުމަށްފަހު، ހަނގުރާމަ ނިމުމުން "ސްޓްރެއިޓް އޮފް ހޯމޫޒް" އަކީ ރައްކާތެރި އަދި ދަތުރުފަތުރަށް ހުޅުވިފައިވާ ތަނެއްގެ ގޮތުގައި ބޭއްވުމަށްޓަކައި އިނގިރޭސި އަސްކަރީ މާހިރުން ހާއްސަ ދިރާސާތަކެއް ކުރާނެ ކަމަށްވެސް ބޮޑުވަޒީރު ވިދާޅުވިއެވެ.
މީގެ އިތުރުން، ދިފާއީ، ސަލާމަތީ އަދި އިގްތިސާދީ ކަންކަމުގައި ވިލާތުގެ އެކުވެރި ގައުމުތަކާއެކު ގާތުން މަސައްކަތް ކުރަންޖެހޭ ކަމަށް އޭނާ ވިދާޅުވިއެވެ.
"އަޅުގަނޑަށް ކުރިމަތިވާ ފިއްތުންތަކާއި، ދެކެވޭ ވާހަކަތައް ކޮންމެ ގޮތަކަށް ހުރި ނަމަވެސް، އަޅުގަނޑު ނިންމާ ކޮންމެ ނިންމުމެއް ނިންމާނީ އިނގިރޭސިވިލާތުގެ ގައުމީ މަސްލަހަތަށް އިސްކަންދީގެން. އެހެންކަމުން އަޅުގަނޑު ވަރަށް ސާފުކޮށް މި ބުނަނީ، މިއީ އަޅުގަނޑުމެންގެ ހަނގުރާމައެއް ނޫން، އަދި މިކަމުގެ ތެރެއަށް އަޅުގަނޑުމެން ނުވަންނާނަން."ސްޓާމަރ ވިދާޅުވިއެވެ.
ސްޓާމަރ މިހެން ވިދާޅުވެފައިވަނީ، އީރާނާ ދެކޮޅަށް ކުރާ ހަނގުރާމައިގައި އެހީތެރިނުވާނަމަ ނޭޓޯއިން އެމެރިކާ ވަކިވުމާ މެދު ވިސްނަމުންދާ ކަމަށް ކުރީގެ ރައީސް ޑޮނަލްޑް ޓްރަމްޕް ވިދާޅުވެފައިވާ ދަނޑިވަޅެއްގައެވެ.
Advertisement
This content is created and paid for by advertisers and does not involve Voice Journalists
