މަރަކީ ކޮންމެ އިންސާނަކާވެސް ބައްދަލުކުރާނޭ، އެއްވެސް މީހަކަށް އިންކާރު ނުކުރެވޭނޭ ބޮޑު ޙަޤީޤަތެއްކަން ހަނދާންކޮށްދީ، އެ ދުވަހަށް ތައްޔާރުވުމަށް މިއަދުގެ ހުކުރު ޚުތުބާގައި މުޖުތަމަޢަށް ނަޞޭޙަތްތެރިވެއްޖެއެވެ.

މަރާ ގުޅޭގޮތުން މިއަދު އިއްވި ހުކުރު ޚުތުބާގައި ބުނީ، މަރަކީ ކޮންމެ އިންސާނަކާ ވެސް ކުރިމަލާންޖެހޭނޭ ޙަޤީޤަތެއް ކަމަށާަ، މި ޙަޤީޤަތާ މެދު އެއްވެސް މީހަކު ޚިޔާލުތަފާތުވެފައެއް ނުވާ ކަމަށެވެ.

މިއާއެކު ޚުތުބާގައި ބުނީ، އެމީހަކު ދުނިޔޭގައި އެއްކުރި މުދަލާއި، ލޯބިވާ އަނބިދަރީންނާއި، ގެދޮރާއި، ބިނާކޮށްފައިވާ ވިޔަފާރިއާއި، މި ދުނިޔޭގެ ޒީނަތުގައި ހޭދަކުރަމުން ދިޔަ އުފާވެރި ދުވަސްތައް ދޫކޮށް، ދުނިޔެއިން ވަކިވާން ޖެހޭ ވަގުތަކީ އާދައިގެ ވަގުތެއްނޫން ކަމަށެވެ.

މާތް الله ވަޙީކުރައްވައިފައި ވެއެވެ.

"އަދި މަރުގެ ސަކަރާތް ޙައްޤު ގޮތުގައި އަންނަ ހުށްޓެވެ. އެއީ ތިބާ އެޔަށް ފިލާން އުޅޭ ކަމުގައިވީ މަރެވެ."

اَلْبَرَاءُ بْنُ عَازِب رَضِيَ الله عَنْهُ ވިދާޅުވިއެވެ. އެއްދުވަހަކު ތިމަންބޭކަލުން ރަސޫލުالله ﷺ އަރިހުގައި ތިއްބަވަނިކޮށް، ދުރުން ބަޔަކު ފެނިވަޑައިގެން އެ މީހުން އެއްވެފައިވަނީ ކީއްވެގެންތޯ އެ ކަލޭގެފާނު ސުވާލުކުރެއްވިއެވެ. އެ ކަލޭގެފާނަށް ދެންނެވުނެވެ. ބޭކަލަކު އަވަހާރަވެގެން އެ ބެކޭލަކު ފަސްދާނުލުމުގެ ކަންތައް ކުރިއަށްދަނީއެވެ. އެ ހިނދު ކުއްލިއަކަށް ރަސޫލުالله ﷺ ތެދުވެވަޑައިގެން، އަވަސްފިޔަވަޅުފުޅު މަތީ ހިންގަވައިފައި، ކޮނެފައިވާ ކަށްވަޅުގެ ކައިރިއަށް ވަޑައިގެން އިށީނދެވަޑައިގަތެވެ. ދެން އެ ކަލޭގެފާނު ކުރައްވަނީ ކޮންކަމެއްތޯ ބެއްލެވުމަށް ޓަކައި، ތިމަންކަލޭގެފާނު އެ ކަލޭގެފާނުގެ ކުރިފުޅުމައްޗަށް ވަޑައިގަތީމެވެ. އެ ވަގުތު ފަސްގަނޑު ތެމިއްޖައުމަށްދާންދެން ކީރިތިކުރެއްވިއެވެ. އެއަށް ފަހު ތިމަންމެންނާ މުޚާޠަބުކުރައްވައި ޙަދީޘްކުރެއްވިއެވެ.

"އޭ ތިމަންކަލޭގެފާނުގެ އަޚުންނޭވެ! މި ދުވަހަކަށް ތިޔަބައިމީހުން ވެސް ތައްޔާރުވާށެވެ!"

ޚުތުބާގައި އިތުރަށް ބުނީ މަރުން ރެކިގަނެވޭނޭ ހަމަ އެކަކު ވެސް ނުވާ ކަމަށެވެ. އެއީ ކިތަންމެ އާރާއި ބާރެއްގެ ވެރިއެއްކަމުގައި ވިޔަސް، އޭނާގެ ގާތަށް މަރު އަންނާނެ ކަމަށާ ދުނިޔޭގެ ރަސްރަސްކަލުންގެ ގަނޑުވަރުތަކުގައި އެތައް ބަޔަކު ފާރަވެރިވެ، އެ މީހުން ހިމާޔަތްކުރުމަށް ތިއްބައި އެމީހުންނާވެސް މަރު ބައްދަލުކުރަނީ ހުއްދަހޯދައިގެން ނޫން ކަމަށް ބުނެފައިވއެވެެ.

މާތް الله ވަޙީކުރައްވައިފައި ވެއެވެ. "އުސްވެގެންވާ ގަދަފަދަ ކިއްލާތަކެއްގެ ތެރޭގައި ތިޔަބައިމީހުން ތިބިކަމުގައިވިޔަސް، ތިޔަބައިމީހުން ތިބި ކޮންމެ ތަނަކުން މަރު، ތިޔަބައިމީހުން އަތުލާނެތެވެ."

ޚުތުބާގައި ބުނީ، މާތް اللهގެ އަމުރުފުޅު އައުމުން ވަގުތުން އެ މީހެއްގެ މަރުހިއްޕަވާނެ ކަމަށާ، މީހާގެ ޢުމުރަކަށް، ބަލިޙާލަތަކަށް، މީހާގެ މުއްސަނދިކަމާއި ފަޤީރުކަމަކަށް، މާތްކަމާއި މަތިވެރިކަމަކަށް މަރު ނުބަލާނެކަމަށެވެ.

އެހެންކަމުން، މަރުވާނެކަމާއި، މަރާ ކުރިމަތިލާން ޖެހޭނޭކަން ދަނެ، އެ ކަމަށް ތައްޔާރުވާށް ޚުތުބާގައި ވަނީ ގޮވާލާފައެވެ. އެގޮތުން ހެޔޮ ޢަމަލުތައް ގިނަކޮށް، ނުބައި ކަންކަމުން ދުރުވެ، ގިނަގިނައިން މަރު ހަނދާންކުރާން ވަނީ އިލްތިމާސްކޮށްފައެވެ.