އީރާނާއެކު ކުރިއަށްދިޔަ 21 ގަޑިއިރުގެ ދިގު މަޝްވަރާތަކަށްފަހު، އެއްވެސް އެއްބަސްވުމަކާ ހަމައަށް ނާދެވި އެމެރިކާގެ ނައިބު ރައީސް ޖޭ.ޑީ ވެންސް އާއި އެމެރިކާގެ ވަފުދު އާދީއްތަ ދުވަހު ޕާކިސްތާނުގެ ވެރިރަށް އިސްލާމްއާބާދުން ފުރައިފިއެވެ.
މަޝްވަރާތަކަށްފަހު ނޫސްވެރިންނާ ވާހަކަދައްކަމުން ޖޭ.ޑީ ވެންސް ބުނީ، އެމެރިކާގެ ޝަރުތުތަކަށް އީރާނުން އެއްބަސްނުވުމުގެ ސަބަބުން މަޝްވަރާތައް ނާކާމިޔާބުވެފައިވާ ކަމަށެވެ. މީގެ ތެރޭގައި ނިއުކްލިއާ ހަތިޔާރު ނުއުފެއްދުމަށް އެމެރިކާއިން ހުށަހެޅި ޝަރުތުތައް ހިމެނެއެވެ.
"މިއީ ހިތާމަވެރި ޚަބަރެއް، އެކަމަކު އަޅުގަނޑު ދެކޭގޮތުގައި މީގެ ގެއްލުން އެމެރިކާއަށްވުރެ ބޮޑަށް ކުރާނީ އީރާނަށް،" ވެންސް ބުންޏެވެ.
މި މަޝްވަރާތަކުގެ ތެރޭގައި ވެންސް ވަނީ އެމެރިކާގެ ރައީސް ޑޮނަލްޑް ޓްރަމްޕާ ފަސް ފަހަރަށްވުރެ ގިނައިން ފޯނުން ގުޅައި މަޝްވަރާ ކޮށްފައެވެ. އެމެރިކާގެ މައިގަނޑު އަމާޒަކީ އީރާނުން ނިއުކްލިއާ ހަތިޔާރު އުފެއްދުން ހުއްޓުވުމެވެ.
އެމެރިކާއިން މިފަދައިން ބުނި ނަމަވެސް އީރާނުގެ ތަސްނީމް ނިއުސް އެޖެންސީން ބުނެފައިވަނީ އެއްބަސްވުމަކާ ހަމައަށް ނާދެވުނީ އެމެރިކާގެ "ބޮޑާ" ހުށަހެޅުންތަކުގެ ސަބަބުން ކަމަށެވެ.
މިއީ 1979 ގެ އިސްލާމީ އިންގިލާބަށްފަހު، އެމެރިކާއާއި އީރާނުގެ މެދުގައި ބޭއްވުނު އެންމެ މަތީ ފަންތީގެ ސީދާ މަޝްވަރާތަކެވެ. މި މަޝްވަރާތަކުގައި ޖޭ.ޑީ ވެންސްގެ އިތުރުން ޚާއްޞަ މަންދޫބު ސްޓީވް ވިޓްކޯފް އަދި ޖެރެޑް ކުޝްނަރު ބައިވެރިވިއެވެ. އީރާނުގެ ފަރާތުން ބައިވެރިވެވަޑައިގަތީ މަޖިލީހުގެ ރައީސް މުޙައްމަދު ބާޤިރު ޤާލީބާފް އަދި ޚާރިޖީ ވަޒީރު އައްބާސް އަރާގްޗީއެވެ.
އީރާނުގެ ވަފުދުން މަޝްވަރާއަށް ހާޒިރުވީ އަވަހާރަވެފައިވާ ރޫޙާނީ ލީޑަރު އާޔަތުالله އަލީ ޚާމަނާއީގެ ހަނދާނުގައި ކަޅު ހެދުމުގައެވެ. އަދި އެމެރިކާގެ ބޮން އެޅުމުގެ ސަބަބުން ޝަހީދުވި ދަރިވަރުންގެ ބޫޓާއި ދަބަސްތައްވެސް އެ ވަފުދުން ގެންގުޅުނެވެ.
މި މަޝްވަރާތަކުގެ މައިގަނޑު ބޭނުމަކީ ހޯރްމުޒް ކަނޑުއޮޅި ހުޅުވުމާއި ސަރަޙައްދީ ހަނގުރާމަ ހުއްޓުވުމެވެ. އީރާނުން އެދެމުންދަނީ ބޭރުގެ ބޭންކުތަކުގައި ހުރި އެގައުމުގެ ފައިސާ ދޫކުރުމަށާއި، ހޯރްމުޒް ކަނޑުއޮޅީގެ ކޮންޓްރޯލް ދިނުމަށެވެ.
ނަމަވެސް އެމެރިކާގެ ރައީސް ޓްރަމްޕް ބޭނުންވަނީ އެއްވެސް ހުރަހެއްނެތި ބައިނަލްއަޤްވާމީ އާގުބޯޓުފަހަރަށް އެ ސަރަޙައްދުން ދަތުރުކުރެވޭނެ ގޮތް ހެދުމަށާއި އީރާނުގެ ނިއުކްލިއާ މަޝްރޫޢު ހުއްޓުވުމަށެވެ.
މި މަޝްވަރާތައް ކުރިއަށްދިޔަ ވަގުތު، މެދުވެރިއެއްގެ ދައުރު އަދާކުރި ޕާކިސްތާނުގެ އިސްލާމްއާބާދު އޮތީ ސަލާމަތީ ގޮތުން ވަރުގަދައަށް ބަންދުކޮށްފައެވެ. މަޝްވަރާތައް ނާކާމިޔާބުވުމާ ގުޅިގެން ދުނިޔޭގެ ބާޒާރުގައި ތެލުގެ އަގު އުފުލި، ސަރަޙައްދީ ނުތަނަވަސްކަން އިތުރުވެދާނެ ކަމުގެ ބިރު ވަނީ ބޮޑުވެފައެވެ.
Advertisement
This content is created and paid for by advertisers and does not involve Voice Journalists
