މިދިޔަ ޖެނުއަރީ މަހުން ފެށިގެން ހުސްވެފައިވާ ހެލްތް ޕްރޮޓެކްޝަން އޭޖެންސީ (އެޗްޕީއޭ) ގެ އެންމެ އިސްވެރިޔާ ނުވަތަ ޑިރެކްޓަރ ޖެނެރަލް އޮފް ޕަބްލިކް ހެލްތުގެ މަގާމަށް އިބްރާހިމް ނިޝާން އަހުމަދު އައްޔަންކުރައްވައިފި އެވެ.

މި މަގާމާ މިއަދު ރަސްމީކޮށް ހަވާލުވެވަޑައިގަތީ އެ އެޖެންސީގެ ޑެޕިއުޓީ ޑިރެކްޓަރ ޖެނެރަލްގެ މަގާމުގައި ކުރިން ހުންނެވި ނިޝާން އަހުމަދެވެ.

އެޗްޕީއޭގެ ޑިރެކްޓަރ ޖެނެރަލްގެ މަގާމު ހުސްވީ، އެ ދާއިރާގައި 35 އަހަރަށްވުރެ ގިނަ ދުވަހު ހިދުމަތް ކުރެއްވި މައިމޫނާ އަބޫބަކުރު ރިޓަޔާ ކުރެއްވުމާ ގުޅިގެންނެވެ. މައިމޫނާއަކީ 2016 ވަނަ އަހަރުން ފެށިގެން އެ މަގާމު ފުރުއްވަމުން ގެންދެވި، އަދި ހާއްސަކޮށް ކޮވިޑް-19 ގެ ދުވަސްވަރު ރާއްޖޭގެ ސިއްހީ ރައްކާތެރިކަން ކަށަވަރުކުރުމަށް ގިނަ މަސައްކަތްތަކެއް ކުރެއްވި ބޭފުޅެކެވެ.

މިއަދު މަގާމާ ހަވާލުވެވަޑައިގަތް ނިޝާން އަހުމަދަކީ ސިއްހީ ދާއިރާގެ، ވަކިން ހާއްސަކޮށް ބަލިތައް ފެތުރުން ދެނެގަތުމާއި މޮނިޓަރ ކުރުމުގެ ދާއިރާގައި ބޮޑު ތަޖުރިބާއެއް ލިބިވަޑައިގެންފައިވާ ބޭފުޅެކެވެ.

ބައިނަލްއަގުވާމީ ފެންވަރުގައި ވެސް ސިއްހީ ރައްކާތެރިކަމުގެ ދާއިރާގައި މަސައްކަތް ކުރައްވާފައިވާ ނިޝާން އައްޔަންކުރެވުނު މި މަގާމަކީ ރާއްޖޭގެ ސިއްހީ ދާއިރާގެ އެންމެ މަތީ ފަންތީގެ އެއް މަގާމެވެ. މި މަގާމުގެ މުސާރައާއި އެލަވަންސްތަކުގެ ގޮތުގައި މަހަކު 41,876 ރުފިޔާ ކަނޑައެޅިފައިވާއިރު، މީގެ ތެރޭގައި އަސާސީ މުސާރައިގެ ގޮތުގައި 21,884 ރުފިޔާ ހިމެނެއެވެ. މި މަގާމަށް ކުރިމަތިލުމަށް ފެބްރުއަރީ މަހު ހުޅުވާލި ފުރުސަތުގައި ތައުލީމީ ގޮތުން ޕީއެޗްޑީ ނުވަތަ މާސްޓާސް ޑިގްރީއާއެކު ދިގު މުއްދަތުގެ ތަޖުރިބާ ޝަރުތުކޮށްފައިވެއެވެ.

ޑިރެކްޓަރ ޖެނެރަލްގެ މައިގަނޑު މަސްއޫލިއްޔަތުތަކުގެ ތެރޭގައި ރާއްޖޭގެ އާންމު ސިއްހަތު ރައްކާތެރިކުރުމުގެ އުސޫލުތައް ކަނޑައެޅުމާއި، ގައިންގަޔަށް އަރާ ބަލިތަކުން ގައުމު ސަލާމަތްކުރުމަށް ފިޔަވަޅު އެޅުން ހިމެނެއެވެ. ބަލިމަޑުކަމެއް ކުރިމަތިވާ ހާލަތްތަކުގައި ދައުލަތަށް ސިއްހީ ލަފާދޭ އެންމެ އިސް ފަރާތަކީ ވެސް ޑީޖީ އެވެ.