އީރާނުގެ ބަނދަރުތައް އެމެރިކާގެ އަސްކަރިއްޔާއިން ބަންދުކޮށް، އެ ގައުމުގެ ކަނޑުގެ މަގުން ކުރާ ހުރިހާ ވިޔަފާރި މުއާމަލާތްތަކެއް އެއްކޮށް ހުއްޓުވާފައިވާ ކަމަށް އެމެރިކާގެ ސެންޓްރަލް ކޮމާންޑުން ހާމަކޮށްފިއެވެ.

އެމެރިކާގެ ސެންޓްރަލް ކޮމާންޑުން ނެރުނު ބަޔާނެއްގައި ބުނެފައިވަނީ، އީރާނުގެ ބަނދަރުތައް ބަންދުކުރުމަށް ފެށި އޮޕަރޭޝަން މިހާރު ފުރިހަމައަށް ތަންފީޒުކުރެވެން ފަށާފައިވާ ކަމަށެވެ.

އެޑްމިރަލް ބްރެޑް ކޫޕަރާ ހަވާލާދީ ބުނެފައިވަނީ، އީރާނުގެ އިގްތިސާދުގެ 90 އިންސައްތަ ބިނާވެފައިވަނީ ކަނޑުގެ މަގުން ކުރާ ބައިނަލްއަގުވާމީ ވިޔަފާރިއަށް ކަމަށާއި، ބަންދު ފެށިތާ 36 ގަޑިއިރު ނުވަނީސް އީރާނަށް ވަންނަ އަދި އެ ގައުމުން ބޭރުވާ ހުރިހާ ކަނޑުގެ ވިޔަފާރިއެއް އެމެރިކާގެ ސިފައިން ހުއްޓުވާފައިވާ ކަމަށެވެ.

މި އޮޕަރޭޝަންގެ ފުރަތަމަ 24 ގަޑިއިރުގެ ތެރޭގައި އެއްވެސް އުޅަނދަކަށް އެމެރިކާގެ ސިފައިންގެ ހުރަސްތައް ގިރާކޮށް ނުދެވޭ ކަމަށް ރިޕޯޓުތައް ބުނެއެވެ. އަދި 6 މާޗަންޓް އުޅަނދަކަށް އެމެރިކާއިން އެންގި އެންގުމާ އެއްގޮތަށް، ތަކެތި އަނބުރާ އީރާނުގެ ބަނދަރުތަކަށް ވެއްދިފައިވާ ކަމަށްވެސް އެމެރިކާއިން ބުނެއެވެ.

ނަމަވެސް، އީރާނާ ގުޅުން އޮތް ކަމަށް ބެލެވޭ "ރިޗް ސްޓާރީ" ނަމަކަށް ކިޔާ ޓޭންކަރެއް ވަނީ އަންގާރަ ދުވަހުގެ ކުރީކޮޅު ހޯރްމޫޒް ކަނޑުއޮޅިން ދަތުރުކޮށްފައެވެ.

އެމެރިކާއިން 15 އަށްވުރެ ގިނަ މަނަވަރު ހޯރްމޫޒް ކަނޑުއޮޅިއަށް ފޮނުވައިގެން ކުރިއަށްގެންދާ މި ބަންދާ ގުޅިގެން އީރާނުން ވަނީ އިންޒާރު ދީފައެވެ. އީރާނުން ބުނެފައިވަނީ މެދުއިރުމަތީގެ އެއްވެސް ބަނދަރަކީ އެމެރިކާއަށް އަމާން ތަނެއް ނޫން ކަމަށެވެ. މި ހާދިސާއާ ގުޅިގެން ކުވައިތުން ފެށިގެން އޮމާނާ ހަމައަށް ހުރި ބަނދަރުތައް މިހާރު އޮތީ އެލާޓްގައެވެ.

މި ނުތަނަވަސްކަމުގެ ތެރޭގައި، ޕާކިސްތާނުން ވަނީ އެމެރިކާ އާއި އީރާނާ ދެމެދު ދެވަނަ ބުރެއްގެ މަޝްވަރާތައް ބޭއްވުމަށް ހުށަހަޅާފައެވެ. ވައިޓް ހައުސްއިން މިކަން ކަށަވަރުކޮށްދެމުން ބުނީ، އީރާނާއެކު ކުރިއަށް އޮތްތަނުގައި މަޝްވަރާކުރުމާ މެދު ވާހަކަ ދެކެވެމުންދާ ކަމަށާއި، ނަމަވެސް އަދި ވަކި ތާރީޚެއް ކަނޑަނާޅާ ކަމަށެވެ.

ހަމައެއާއެކު، އިޒްރޭލާއި ލުބުނާނާ ދެމެދު ސީދާ މަޝްވަރާތައް އަންގާރަ ދުވަހު ވޮޝިންގޓަންގައި ފެށުމަށް ވަނީ ހަމަޖެހިފައެވެ. މި މަޝްވަރާތަކުގެ މަގްސަދަކީ ލުބުނާނުގައި 2,000 އަށްވުރެ ގިނަ މީހުން މަރުވެފައިވާ ހަނގުރާމަ ހުއްޓާލުމެވެ. އެހެންނަމަވެސް، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ބުނީ އޭނާ ބޭނުންވަނީ ހަމައެކަނި ހަނގުރާމަ ހުއްޓާލުމެއް ނޫން ކަމަށާއި، ހިޒްބުاللهގެ ހަތިޔާރު އަތުލުމާއި ލުބުނާނާއެކު ފުޅާ ދާއިރާއެއްގައި ސުލްހައިގެ އެއްބަސްވުމަކަށް ދިއުން ކަމަށެވެ.