ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅި "ވަޠަނީ ޚިދުމަތުގެ ބިލު" މަޖިލީހުން މިއަދު ބަލައިގަނެ، ދިރާސާކުރުމަށް ސަލާމަތީ ޚިދުމަތްތަކާބެހޭ ކޮމިޓީ (241 ކޮމިޓީ) އަށް ފޮނުވައިފިއެވެ.

މި ބިލު ހުށަހަޅާފައިވަނީ ކުޅުދުއްފުށި ދެކުނު ދާއިރާގެ މެންބަރު ފަރުޙަތު މުޙައްމަދެވެ.

މި ބިލުގައި ބަޔާންކޮށްފައިވާ ގޮތުގައި، މި ބިލުގެ މަގްސަދަކީ ޒުވާނުންގެ ކިބައިގައި ޖިސްމާނީ، ފަންނީ އަދި ފިކުރީ ގާބިލުކަން އިތުރުކުރުމާއެކު، އިސްލާމްދީނަށާއި ދީނީ ޝިޢާރުތަކަށް އިހްތިރާމްކުރާ، އަދި ޤައުމިއްޔަތަށް އިސްކަންދޭ ބަޔަކަށް ޒުވާނުން ހެދުމެވެ.

މި ބިލުގައިވާ ޕްރޮގްރާމުގައި ބައިވެރިވެވޭނީ އުމުރުން 16 އަހަރާއި 21 އަހަރާ ދެމެދުގެ ދިވެހި ޒުވާނުންނަށެވެ. ނަމަވެސް، އުމުރުން 18 އަހަރުނުވާ ކުދިންނަށް ބައިވެރިވެވޭނީ ބެލެނިވެރިޔާގެ ހުއްދައާއެކު، އެ ކުއްޖަކު އަމިއްލައަށް އެކަމަށް އެދޭނަމައެވެ. މީގެ އިތުރުން، ޕްރޮގްރާމަށް ހޮވޭނީ ޤާނޫނުގެ ދަށުން ހަދާ ގަވާއިދުގައި ކަނޑައަޅާފައިވާ މެޑިކަލް އެސެސްމަންޓްތަކުން ފާސްވާ ޒުވާނުންނެވެ.

ބިލުގައިވާ ގޮތުން މި ޕްރޮގްރާމް ފުރިހަމަކުރާ ފަރާތްތަކުން، ޔުނިފޯމް އެޅި ޚިދުމަތެއްގައި އެއް އަހަރަށްވުރެ ދިގުނުވާ މުއްދަތަކަށް މަސައްކަތް ކުރަންޖެހޭނެއެވެ. ޕްރޮގްރާމްގެ ބައިވެރިންގެ ހުރުމާއި، ކެއުމާއި، ބޭސްފަރުވާ އަދި ދަތުރުފަތުރުގެ ހުރިހާ ޚަރަދެއް ހަމަޖައްސައިދޭނީ ދިފާޢީ ވުޒާރާއިންނެވެ. މީގެ އިތުރުން ބައިވެރިންނަށް އެކަށީގެންވާ އިނާޔަތެއް ދިނުމަށްވެސް މި ބިލުގައި ވަނީ ހިމަނާފައެވެ.

މި ޕްރޮގްރާމް ހިންގުމުގެ ކަންކަން ބެލެހެއްޓުމަށްޓަކައި، ރައީސުލްޖުމްހޫރިއްޔާ ރިޔާސަތު ބަލަހައްޓަވާ ޚާއްޞަ ގަވަރނިން ކައުންސިލެއް އެކުލަވާލުމަށް ވަނީ ހަމަޖެހިފައެވެ. މި ކައުންސިލުގައި ދިފާޢީ ވަޒީރު، ދާޚިލީ ވަޒީރު، މާލީ ވަޒީރުގެ އިތުރުން ޗީފް އޮފް ޑިފެންސް ފޯސް އަދި ކޮމިޝަނަރ އޮފް ޕޮލިސް ހިމެނިވަޑައިގަންނަވާނެއެވެ. އަދި ޕްރޮގްރާމް ނިންމާ ޒުވާނުންނަށް ޔުނިފޯމް އެޅި ޚިދުމަތްތަކުން ވަޒީފާގެ ފުރުސަތުތައް ފަހިކޮށްދިނުމަށްވެސް ބިލުގައި ވަނީ ފާހަގަކޮށްފައެވެ.