ލުބުނާނާއި އިސްރާއީލާ ދެމެދު ދާއިމީ ސަލާމަތީ އަދި ސުލްހައިގެ އެއްބަސްވުމަކަށް މަގުފަހިކުރުމަށްޓަކައި، 10 ދުވަހުގެ މުއްދަތަށް ހަނގުރާމަ ހުއްޓާލުމުގެ އެއްބަސްވުމަކަށް އަމަލުކުރަން ފަށައިފިއެވެ.

އެމެރިކާގެ ސްޓޭޓް ޑިޕާޓްމަންޓުން ހާމަކުރި ގޮތުގައި މި މުއްދަތަކީ ދެ ގައުމުގެ އޮފިޝަލުންގެ މެދުގައި މަޝްވަރާތައް ކުރިއަށް ގެންދިއުމަށް ދެވުނު ފުރުސަތެކެވެ.

މި އެއްބަސްވުމަށް އަމަލުކުރަން ފެށުމާއެކު ލުބުނާނުގެ ބައެއް ސަރަހައްދުތަކުގައި އުފާފާޅުކުރުންތައް ވަނީ ބާއްވާފައެވެ. ނަމަވެސް، މިއީ ވަގުތީ އެއްބަސްވުމަކަށް ވާތީ، ގިނަ ބަޔަކު ތިބީ ނުތަނަވަސްކަމެއްގެ ތެރޭގައެވެ. ހިޒްބުالله އޮފިޝަލަކު އަލްޖަޒީރާއަށް މައުލޫމާތު ދެއްވަމުން ވިދާޅުވީ، އެ ޖަމާއަތުން މި އެއްބަސްވުމަށް އަމަލުކުރާނީ ވަރަށް ބޮޑަށް ސަމާލުވެ ތިބެގެން ކަމަށެވެ.

އެމެރިކާގެ ރައީސް ޑޮނަލްޑް ޓްރަމްޕް ބުނި ގޮތުގައި އީރާނާއެކު ކުރިއަށްދާ މަޝްވަރާތަކުގެ ތެރެއިން ހަނގުރާމަ ނިމުމަކަށް ގެނައުމުގެ އެއްބަސްވުމަކާ މިހާރު ވަނީ ވަރަށް ބޮޑަށް ގާތްވެފައެވެ. އަދި މި ހަފުތާ ބަންދުގައި ޕާކިސްތާނުގެ އިސްލާމްއާބާދުގައި އީރާނާއެކު މަޝްވަރާތައް އަލުން ފެށިދާނެ ކަމަށްވެސް ޓްރަމްޕް ވަނީ އިޝާރާތް ކޮށްފައެވެ. އީރާނުގެ ފޮރިން މިިނިސްޓްރީން ވަނީ ލުބުނާނުގެ ހަނގުރާމަ ހުއްޓާލުމަށް ލިބުނު ޚަބަރަށް މަރުހަބާ ކިޔާފައެވެ.

ހަނގުރާމަ ހުއްޓާލުމުގެ އެއްބަސްވުން އަމަލަށް އައުމުގެ ކުޑަވަގުތުކޮޅެއް ކުރިން އިސްރާއީލުން ވަނީ ލުބުނާނުގެ ދެކުނުގެ ސަރަހައްދުތަކަށް ވަރުގަދަ ހަމަލާތަކެއް ދީފައެވެ. ލުބުނާނުގެ ރަސްމީ ނިއުސް އެޖެންސީން ރިޕޯޓްކޮށްފައިވާ ގޮތުގައި، ސައިދަން އާއި ޒަހްރާނީ ސަރަހައްދަށް ދިން ހަމަލާތަކުގައި ޖުމްލަ 11 މީހަކު ވަނީ ޝަހީދުވެފައެވެ.

މި އެއްބަސްވުމުގައި އިސްރާއީލަށް "އަމިއްލަ ދިފާއުގައި" ހަމަލާދިނުމުގެ ބާރު އޮންނާނެ ކަމަށް އެމެރިކާއިން ބުނެފައިވާއިރު އެއީ ލުބުނާނުގެ ރައްޔިތުންގެ ކަންބޮޑުވުން އޮތް ކަމެއް ކަމަށް ރިޕޯޓްތަކުގައި ފާހަގަކޮށްފައިވެއެވެ.

އެއްބަސްވުމަށް އަމަލުކުރަން ފެށި ފަހުންވެސް، އިސްރާއީލުން ބައެއް ސަރަހައްދުތަކަށް ބަޑީގެ ހަމަލާ ދީފައިވާ ކަމަށް ލުބުނާނުގެ އަސްކަރިއްޔާއިން ވަނީ ކަށަވަރުކޮށްދީފައެވެ. އަދިވެސް އިސްރާއީލުގެ ސިފައިން ލުބުނާނުގެ ދެކުނުގެ ބައެއް އަަވަށްތަކުގައި ތިބުމުގެ ސަބަބުން، އާންމުން އެ ސަރަހައްދުތަކަށް ދިއުމަށް އިސްރާއީލުން ދަނީ ހުރަސް އަޅަމުންނެވެ.