މިހާރު ކުރިއަށްދާ އެމްޖޭއެސް ރާބަދި ޗެލެންޖުގައި ރޭ ކުޑަފުއްޓާއި ކޯރާކޯރާ ބައްދަލުކުރިމެޗް އެއްވަރުވިއިރު، ހެރިޓެންސް ކުޅުނުމެޗް އެޓީމުން ކާމިޔާބުކޮށްފިއެވެ.

ފުރަތަމަ މެޗްގައި ކޯރާކޯރާ ނިކުތީ ކުޑަފުއްޓާ ދެކޮޅަށެވެ. މެޗްގައި އެންމެ ފުރަތަމަ ލަނޑެއް ޖަހައި ކުރިހޯދީ، ކުޑަފުއްޓެވެ. އެއީ މެޗްގެ 29 ވަނަ މިނެޓް ތެރޭގައި ހުސައިން މަގްސޫދު ކާމިޔާބުކޮށްދިން ލަނޑުންނެވެ. ކުޑަފުށިން ލީޑް ނަގާފައިވަނިކޮށް، ކޯރާކޯރާއިން ވަނީ އޭގެ ތިން މިނެޓްފަހުން ލަނޑެއް ޖަހައި މެޗްގެ ނަތީޖާ އެއްވަރުކޮށްފައެވެ. މި ލަނޑު ކާމިޔާބުކޮށްދިނީ، އިބްރާހިމް އަނާން ތަނަވަސްކޮށްދިން ފުރުސަތެއްގައި ރައުލް ނިޔާޒެވެ.

މެޗްގައި ދެޓީމުންވެސް ގޯލަށް އަމާޒުކޮށް ހަމަލާތައް ފޮނުވާލިއިރު، މީގެ ތެރެއިން ގިނަ ހަމަލާތައް އަމާޒުކޮށްފައިވަނީ، ކޯރާކޯރާއެވެ. މެޗްގައި މޮޅަށް ކުޅުނީވެސް އެޓީމެވެ. މިމެޗްގެ މޮޅު ކުޅުންތެރިޔާގެ މަގާމް ހޯދީ، ރައުލް ނިޔާޒެވެ.

ރޭ ކުޅުނު ދެވަނަ މެޗްގައި ހެރިޓެންސް އާއި ރީތިފަރު ރިސޯޓް ބައްދަލުކުރިމެޗް ހެރިޓެންސް ކާމިޔާބުކުރީ 2-1 ގެ ނަތީޖާއިންނެވެ. މެޗްގައި ހެރިޓެންސް އިން ޖެހި ދެ ލަނޑުވެސް އެޓީމަށް ކާމިޔާބުކޮށްދިނީ، އިބްރާހިމް އިރުޝާމެވެ. ރީތިފަރަށް ސުންކަނޑުވާލަދިނީ، އާދަމް ހަފީޒެވެ. މި މެޗްގެ މޮޅު ކުޅުންތެރިޔާގެ މަގާމް ހޯދީ ހެރިޓެންސްއަށް ދެ ލަނޑު ކާމިޔާބުކޮށްދިން އިރުޝާމެވެ.

އެމްޖޭއެސް ރާބަދި ޗެލެންޖުގައި މިރޭވެސް ދެމެޗެއް ކުޅޭނެއެވެ. ރ.މީދޫ ދަނޑުގައި ކުޅޭ ފުރަތަމަ މެޗްގައި ބައްދަލުކުރާނީ ޖޯލި މޯލްޑިވްސް އާއި އިްނޓަރކޮންޓިނެންޓަލް މޯލްޑިވްްސް މާމުނަގައު އެވެ. ދެވަނަ މެޗްގައި ބައްދަލުކުރާނީ، ދިގައްޔާއި، އަދާރަން މީދުއްޕަރެވެ.