އެމްޑީޕީގެ ޗެއާޕާސަންގެ މަގާމަށް ވާދަކުރައްވާ މީކާއީލް އަހްމަދު ނަސީމްގެ ކެމްޕެއިން މިއަދު ރަސްމީކޮށް ލޯންޗު ކޮށްފި އެވެ.

އޭނާގެ ކެމްޕެއިން ލޯންޗުކުރީ "އިތުބާރު" ނަމުގަ އެވެ. ކެމްޕެއިން ލޯންޗު ކުރުމުގެ ހަފްލާގައި އެމްޑީޕީގެ އިސް ގިނަ ބަޔަކު ބައިވެރިވި އެވެ.

މީކާއީލް ވިދާޅުވީ އޭނާ މި އިންތިހާބަށް ނިކުންނެވީ ޕާޓީގެ ގިނަ ލީޑަރުންތަކެއްގެ ތާއީދާ އެކު ކަމަށެވެ. އެގޮތުން ކުރީގެ ރައީސް އިބްރާހިމް މުހައްމަދު ސޯލިހްގެ ތާއީދު އޮތް ކަމަށް ވިދާޅުވި އެވެ.

މީކާއީލްގެ ކެމްޕެއިން ފެށުން -- ފޮޓޯ: ވޮއިސް

އަދި އެމްޑީޕީގެ ރައީސް އަބްދުﷲ ޝާހިދު ތާއީދު އޮތް ކަމަށް ވެސް ވިދާޅުވި އެެވެ. މީގެ އިތުރުން ރައީސް ސޯލިހްގެ ނާއިބަކަށް ހުންނެވި ފައިސަލް ނަސީމާއި އެމްޑީޕީ ޕީޖީ ގުރޫޕްގެ ގިނަ މެންބަރުންތަކެއްގެ ތާއީދު އޮތް ކަމުގައި އޭނާ ވަނީ ވިދާޅުވެފަ އެވެ. މަޖިލީހުގައި މިހާރު ތިއްބެވި އެމްޑީޕީގެ ގިނަ މެންބަރުން މިއަދުގެ ހަފްލާގައި ބައިވެރިވި އެވެ.

މީކާއީލްގެ ކެމްޕެއިން ފެށުން -- ފޮޓޯ: ވޮއިސް

އޭގެ ތެރޭގައި ޕީޖީ ގުރޫޕްގެ ލީޑަރު ނާޒިލްއާ މެންބަރު ޑރ. ޝަމްހީދާއި މެންބަރު މުހައްމަދު އިބްރާހިމް އާއި މެންބަރު ޒިޔާދާއި މެންބަރު މައުރޫފް ވެސް ހިމެނެ އެވެ.

މީކާއީލްގެ ކެެމްޕެއިން ލޯންޗުކުރުމަށް ބޭއްވި ހަފްލާގައި މާލެ ސިޓީގެ މޭޔަރު އާދަމް އާޒިމް އާއި ރައީސް ސޯލިހްގެ ކޮއްކޮ, ކުރީގެ މެންބަރު އަލީ ނިޔާޒާއި ކުރީގެ ޗެއާޕާސަން ރީކޯ މޫސާ މަނިކާއި ހޯރަފުށީ ދާއިރާގެ ކުރީގެ މެންބަރު އަހްމަދު ސަލީމާއި މާލެ ސިޓީ ކައުންސިލަށް އަލަށް އިންތިހާބުވި އެމްޑީޕީގެ ގިނަ މެންބަރުންތަކެއް ހިމެނެ އެވެ.

މީކާއީލްގެ ކެމްޕެއިން ފެށުން -- ފޮޓޯ: ވޮއިސް

އެމްޑީޕީގެ ޗެއާޕާސަންގެ އިންތިހާބުގައި ބޮޑު ވާދަވެރި ކަމެއް އޮންނާނެ ކަމަށް ބެލެވެ އެވެ. މިހާރުވެސް އެ މަގާމަށް ތިން ކެންޑިޑޭޓަކު ވަނީ ޝައުގުވެރިކަން ފާޅުކޮށްފަ އެވެ.

އެއް ބޭފުޅަކީ ކުރީގެ ރައީސް މުހައްމަދު ނަޝީދެވެ. ނަޝީދު އިއްޔެ ވަނީ އެކަން އިއުލާނު ކުރައްވާފަ އެވެ. އަދި މިއަދު އެ ނިންމެވުންް ރަސްމީ ކުރައްވާ އާންމު މެންބަރުންގެ ތާއީދަށް ވަނީ އެދިވަޑައިގެންފަ އެވެ. އެއާއެކު އަތޮޅުތެރޭގެ ދަތުރުތައް ވަގުތުން ވަނީ ފައްޓަވާފަ އެވެ.

ޗެއާޕާސަންގެ މަގާމަށް ދެން ވާދަކުރައްވާ ބޭފުޅަކީ މެންބަރު މީކާއީލް ނަސީމެވެ. ވަގުތީ ގޮތުން ޗެއާޕާސަނެއް އިންތިހާބު ކުރުމަށް ކުރެވުނު މަސައްކަތުގައި ވެސް އެ ރޭހަށް ނިކުންނަވަން މީކާއީލް މަސައްކަތް ކުރެއްވި އެވެ. ނަމަވެސް އެކަން އޭރު ކާމިޔާބުވާ ގޮތް ނުވީ އެވެ.

އެމްޑީޕީ "ރޫޅާނުލައްވާނެ" ކަމުގެ ވައުދާއެކު މީކާއީލް އިންތިހާބަށް ނިކުންނަވަނީ ޒުވާނުންނަށް ފުރުސަތު ފަހިކޮށްދޭން ވެސް ގޮވާލަމުންނެވެ.

އެމްޑީޕީގެ ކުރީގެ ނާއިބު ރައީސް އަލްހާން ފަހްމީ ވެސް ވަނީ ޗެއާޕާސަންގެ މަގާމަށް ކުރިމަތިލައްވާނެ ކަމަށް އިއުލާނު ކުރައްވާފަ އެވެ.

އެމްޑީޕީގެ ކުރީގެ ދެ ޗެއާޕާސަނުން ކަމަށްވާ ފައްޔާޒް އިސްމާއީލް އާއި މާރިޔާ އަހްމަދު ދީދީގެ ތާއީދު އޮތީ ރައީސް ނަޝީދަށެވެ. އެކަން ފައްޔަ އާއި މާރި ވަނީ ހާމަކުރައްވާފަ އެވެ.