ސަރުކާރު އަދި އަމިއްލަ ކުންފުނިތަކުން ގުރުއަތުލައިގެން މީހުން ހައްޖަށް ފޮނުވުމަކީ ރަނގަޅު ކަމެއް ކަމުގައި ޤަބޫލުނުކުރައްވާ ކަމަށް އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
މަޖިލީހުގެ މިއަދުގެ ޖަލްސާަގައި މެންބަރަކު ކުރެއްވި ސުވާލަކަށް ޖަވާބުދެއްވަމުން ވަޒީރު ވިދާޅުވީ، ކުންފުނިތަކުން ގުރުނަގައިގެން ހޮވޭ މީހުން ހައްޖަށް ފޮނުވުމަކީ ވަރަށް ކުރިން ފެށިގެން ކުރަމުން އަންނަ ކަމެއް ކަމަށެވެ.
ނަމަވެސް މި ސަރުކާރު އައި ފަހުން އެގޮތަށް އެކަން ކުރަން ފުރުސަތު ދިނުން ވަރަށް މަދު ކޮށްފައިވާ ކަމަށް ޝަހީމް ވިދާޅުވިއެވެ. އެގޮތުން މި އަހަރުވެސް އެ ފުރުސަތު ދިނީ މަދު ބަޔަކަށް ކަމަށާ އެގޮތަށް އެކަން ކުރީ ކިޔުގައި ޖެހިގެން ތިބި މީހުންނަށް ފުރުސަތު ދިނުމަށް ކަމަށް ވިދާޅުވުއެވެ.
އަޅުގަނޑު ޝަޚްސީގޮތުން ޤަބޫލުކުރާކަމެއްނޫން އެއީ ކުންފުނިތަކަށޭ ކިޔާފައި އެގޮތަށް ކޯޓާއެއް އަސްލުދުލެއް ނުކުރެވޭނެ. ވަރަށް ގިނަ ކުންފުނިތަކުން މިނިސްޓްރީއަށްވެސް ސިޓީތައް އާދޭ އެތާނގެ މުވައްޒަފުންނަށް އެފުރުސަތު ހޯދަން. އެހެންނަމަވެސް އަޅުގަނޑުވެސް ޤަބޫލެއް ނުކުރަން އެއީ އެންމެ އިންސާފުވެރި ގޮތެއް ކަމަށް، ކިޔުގައި އެހާ ގިނަ މީހުން ރެޖިސްޓާވެގެން ތިއްބާ ކުއްލި އަކަށް އަންނަ ފުރުސަތު ތަކަށް ޖާގަދިނުން.
ވަޒީރު ޑރ. ޝަހީމް
އެފަދައިން ފުރުސަތު ދިނުމުގެ ބަދަލުގައި، އެފަރާތްތަކުންވެސް ފައިސާ ދެއްކުމަށްފަހު ކިޔުއަށް އެރުމަށް ޝަހީމް ވަނީ ލަފާދެއްވާފައެވެ. އެގޮތުން، ކުންފުނިތަކުން އެ މުވައްޒަފަކަށް ފައިސާދީގެން މުވައްޒަފު ކިޔުގައި ޖައްސެމަކީ އެދެވޭ ކަމެއް ކަމަށާ، މިހާރުވެސް ވަކި މިންވަރަކަށް ފައިސާ ދެއްކުމުން ކިޔުގައި ޖެހެވޭނެ ކަމަށް ވަޒީރު ވިދާޅުވިއެވެ.
އެގޮތަށް ކިޔުގައި ޖެހިގެން ތިބުމުން، ކުއްލިއަކަށް ކޯޓާ އިތުރުވެއްޖެ ނަމަވެސް، އެބަޔަކަށް ފުރުސަތު ލިބޭނެ ކަމަށް ވަޒީރު ވިދާޅުވިއެވެ. އެހެނީ މިވަގުތު އެއްވެސް ގަްުމަކަށް އިތުރު ކޯޓާ ދިނުން މަޑުޖައްސާލާފައިވަނީ މައްކާއާއި މަދީނާގައި ކުރިއަށްދާ މަޝްރޫޢުތަކުގެ ސަބަބުން ކަމަށާ، އެހެން އެއްވެސް ގައުމަކަށް ކޯޓާ އިތުރުކުރެވޭ ޙާލަތެއްގައި ރާއްޖެއަށްވެސް އިތުރު ވާނެ ކަމަށް ވަޒީރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
