އެމްޑަބްލިޔުއެސްސީގެ ކަސްޓަމަރުންނަށް ފެން ބިލް ނުދެއްކި ގިނަދުވަސް ވެގެން އަރާފައިވާ ޖޫރިމަނާ ފައިސާ މަޢާފުކޮށްދިނުމަށް އަނެއްކާވެސް ނިންމައިފިއެވެ.

އެމްޑަބްލިޔުއެސްސީން ބުނީ، މި ނިންމުން ނިންމީ ފެން ބިލްތައްކަށް ފައިސާ ދެއްކުމަށް ލުއިފަސޭހަ މަގެއް ފަހިކޮށްދިނުމަށް ކުރަމުންދާ މަސައްކަތްތަކުގެ ތެރެއިން ކަމަށެވެ.

މި ނިންމުމާއެކު، އެމް.ޑަބްލިޔު.އެސް.ސީގެ ޑޮމެސްޓިކް ކަސްޓަމަރުންނާއި ކޮމާޝަލް ޓެރިފް ކަސްޓަމަރުންގެ ބިލްތަކަށް، 31 ޑިސެމްބަރ 2025 ގެ ނިޔަލަށް އަރާފައިވާ ޖޫރިމަނާމަޢާފްކޮށްދެވޭނެ ކަމަށް އެ ކުންފުނިން ބުނެއެވެ. މިގޮތުން، ޖޫރިމަނާ މަޢާފްކޮށްދެވޭނީ އެ ޖޫރިމަނާ ނިސްބަތްވާ ބިލްތަކަށް ދައްކަންޖެހޭ ޖުމްލަ ފައިސާ 01 އޭޕްރީލް 2026 އިން ފެށިގެން31 ޑިސެމްބަރ 2026 އާއި ދެމެދު އެއްކޮށް ދައްކައި ޚަލާސްކުރާ ކަސްޓަމަރުންނަށް ކަމަށްވެސް ބުންޏެވެ.

މީގެއިތުރުން، އެއްބަސްވުމެއްގެ ދަށުން އެ ބިލްތަކަށް މަހުން މަހަށް ބަހާލައިގެން ފައިސާ ދައްކައި ޚަލާސްކުރުމަށް އެދޭ ކަސްޓަމަރުންނަށް، އެއިންތިޒާމް ހަމަޖައްސައިދޭނެ ކަމަށްވެސް ބުންޏެވެ. މަހުން މަހަށް ބަހާލައިގެން ފައިސާދައްކާ ކަސްޓަމަރުންނަށް ޖޫރިމަނާ މަޢާފްކޮށްދެވޭނީ އެއްބަސްވުމާއި އެއްގޮތަށް ފައިސާދައްކައި ޚަލާސްކުރުމުންނެއެވެ.

އެމްޑަބްލިޔުއެސްސީން ބުނީ އެ ކުންފުނީގެ ކަސްޓަމަރ ކެއަރ ސެންޓަރުގެ ހޮޓްލައިން 105، ނުވަތަ 1050 އަށް އެސް.އެމް.އެސްއެއް ފޮނުވައިގެން ނުވަތަ [email protected] އަށް އީ-މެއިލްކުރުމުން މިކަމުގައި އެހީތެރިކަން ލިބޭނެކަމަށެވެ.

އެމްޑަބްލިޔުއެސްސީން ވަނީ، ނުދެއްކި ގިނަދުވަސް ވެގެން ޖޫރިމަނާ އަރާފައިވާ ބިލްތަކަށް ފައިސާ ދައްކައި ޚަލާސް ކޮށް ޤަވާޢިދުން ބިލްތަކަށް ފައިސާ ދައްކަމުން ދިޔުމަށް އެދިފައެވެ.