ރާއްޖޭގައި މިވަގުތު އޮތް އެންމެބޮޑު އިދިކޮޅުޕާޓީ އެމްޑީޕީން އެޕާޓީގެ ޗެއާޕާސަންކަމުގެ މަގާމަށް ކުރިމަތިލުމުގެ ފުރުސަތު މިއަދު ހުޅުވާލައިފިއެވެ.
އެމްޑީޕީން މިއަދު އާއްމުކުރި ބަޔާނެއްގައި ބުނެފައިވާގޮތުން ޗެއާޕާސަންކަމުގެ މަގާމަށް ކުރިމަތި ލުމުގެ ފުރުސަތު ހުޅުވާލާފައިވަނީ މިއަދުން ފެށިގެން އަންނަ މެއިމަހުގެ ދެވަނަ ދުވަހުގެ ނިޔަލަށެވެ.
އެމްޑީޕީން ބުނީ، ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީގެ 73 ވަނަ މާއްދާ އާއި ރައްޔިތުންގެ މަޖިލީހުގެ އިންތިޚާބުގެ ޤާނޫނޫގެ 8 ވަނަ މާއްދާގައިވާ ގޮތުގެ މަތިން ރައްޔިތުންގެ މަޖިލީހުގެ އިންތިޚާބަށް ކުރިމަތިލާ މީހެއްގެ ހުންނަންޖެހޭކަމަށް ބަޔާންކުރާ އެންމެހާ ޝަރުތުތައް ހަމަވާނަމަ ކަނޑައެޅިފައިވާ ގޫގުލް ފޯމް މެދުވެރިކޮށް މަގާމަށް ކުރިމަތިލުމުގެ ފުރުސަތު ހުޅުވާލާފައިވާކަމަށެވެ. ފޯމާއެކު ޑިޕާޓްމަންޓް އޮފް ޖުޑިޝަރީގެ ކުށާއި ދަރަނީގެ ރިކޯޑު އަދި ކަރެކްޝަނަލް ސާރވިސްއިން ފުރިހަމަކޮށްފައިވާ ކުށުގެ ރިކޯޑު ހުށަހެޅުމަށްވެސް ވަނީ އެދިފައެވެ.
ޗެއާޕާސަން އިންތިހާބު ބޭއްވުމަށް އެމްޑީޕީން ތާވަލްކޮށްފައިވަނީ، އަންނަ ޖޫންމަހުގެ 12 ވާ ހުކުރުދުވަހުގެ މެންދުރު 14:30 ން ރޭގަނޑު 20:00 އާ ހަމަޔަށެވެ.
އެމްޑީޕީގެ ޗެއާޕާސަންކަމުގެ މަގާމަށް މިހާތަނަށް 3 ބޭފުޅަކު ވަނީ ޝައުގުވެރިަކން ފާޅުކުރައްވާފައެވެ. އެ ބޭފުޅުންގެ ތެރޭގައި ހިމެނިވަޑައިގަންނަވަނީ، ކުރީގެ ރައީސް މުހައްމަދު ނަޝީދާއި، މީކާއީލް ނަސީމްގެ އިތުރުން، އަލްހާން ފަހުމީއެވެ.
Advertisement
This content is created and paid for by advertisers and does not involve Voice Journalists
