ހޮރްމުޒް ކަނޑުއޮޅީގައި މައިން ވަޅުލުމުގެ މަސައްކަތްކުރާ އީރާނުގެ ކޮންމެ އުޅަނދަކަށް ހަމަލާދީ ފައްތާލުމަށް އެމެރިކާގެ ކަނޑުގެ ސިފައިންނަށް ރައީސް ޑޮނަލްޑް ޓްރަމްޕް އަމުރުކޮށްފިއެވެ.

ބުރާސްފަތި ދުވަހު މީސް މީޑިއާގައި ކުރި ޕޯސްޓެއްގައި ޓްރަމްޕް ބުނީ، ހޮރްމުޒް ކަނޑުއޮޅީގެ ސަރަހައްދުގައި މައިން ވަޅުލާ އީރާނުގެ ކުދި ބޯޓުތަކަށް ވިޔަސް، ހަމަލާދީ ނައްތާލުމަށް އެމެރިކާގެ ކަނޑުގެ ސިފައިންނަށް އަމުރުކޮށްފައިވާ ކަމަށެވެ. އަދި މިކަމުގައި އެއްވެސް ފަސްޖެހުމެއް އޮވެގެން ނުވާނެ ކަމަށްވެސް އޭނާ ބުންޏެވެ. މީގެ އިތުރުން، އެ ސަރަހައްދުގައި ހުރި ގޮއްވާތަކެތި ނައްތާލުމަށް ކުރާ މަސައްކަތްތައް މިހާރަށްވުރެ ތިން ގުނައަށް އިތުރުކުރުމަށްވެސް ވަނީ އަންގާފައެވެ.

އީރާނުގެ އިސް އޮފިޝަލުން ވަނީ އެމެރިކާގެ ކޮންމެ ހަމަލާއަކަށްވެސް އެ ގައުމުން ފުރިހަމައަށް ރައްދުދޭނެ ކަމަށާއި، ގައުމުގެ ދިފާއުގައި ކުރަންޖެހުނު ކޮންމެ ކަމެއް ކުރާނެ ކަމަށް ބުނެފައެވެ.

މި ނިންމުމުގެ ސަބަބުން ދެ ގައުމުގެ ދެމެދުގައި އޮތް ނާޒުކު ހަނގުރާމަ ހުއްޓާލުމުގެ އެއްބަސްވުމަށް ބޮޑެތި ގޮންޖެހުންތަކެއް ކުރިމަތިވެދާނެ ކަމަށް މަސްރަހު ދިރާސާކުރާ ފަރާތްތަކުން ބުނެއެވެ.

ހޮރްމުޒް ކަނޑުއޮޅިއަކީ ދުނިޔޭގެ ތެލާއި ގޭހުގެ 20 އިންސައްތަ އުފުލާ މުހިންމު މަގަކަށްވާއިރު، އެމެރިކާ އާއި އިސްރާއީލުން ދިން ހަމަލާއާ ގުޅިގެން އީރާނުން ވަނީ އެ ކަނޑުއޮޅީގެ ބައެއް ސަރަހައްދުތައް ބަންދުކޮށްފައެވެ. މިކަމުގެ ސަބަބުން ދުނިޔޭގެ ބާޒާރުގައި ތެލުގެ އަގު އިންތިހާއަށް އުފުލި، އެމެރިކާގައި ޕެޓްރޯލް ގެލަނެއްގެ އަގު ވަނީ 4 ޑޮލަރަށްވުރެ މައްޗަށް އަރާފައެވެ.

ދެ ހަފުތާގެ މުއްދަތަށް އިއުލާންކުރި ހަނގުރާމަ ހުއްޓާލުމުގެ އެއްބަސްވުން ޓްރަމްޕް މިދިޔަ ބުދަ ދުވަހު އިތުރި ނަމަވެސް، އީރާނުގެ ބަނދަރުތަކަށް އެމެރިކާއިން އޮތީ އަސްކަރީ ގޮތުން ހުރަސް އަޅާފައެވެ. އީރާނުން ބުނަމުންދަނީ އެމެރިކާއާއެކު އަލުން މަޝްވަރާތައް ފެށޭނީ މި ބްލޮކޭޑް ނުވަތަ ބަންދު އުވާލުމުން ކަމަށެވެ.

ޕެންޓަގަނުން ބުނި ގޮތުގައި، ބުރާސްފަތި ދުވަހު އިންޑިއާ ކަނޑުން ދަތުރުކުރި އީރާނުގެ ތެޔޮ ޓޭންކަރަކަށް އެމެރިކާގެ އަސްކަރިއްޔާއިން ވަނީ އަރާ ފާސްކޮށްފައެވެ. އަދި މި ހަފުތާގެ ކުރީކޮޅުވެސް އީރާނުގެ ބައެއް އުޅަނދުތައް އެމެރިކާއިން ހިފަހައްޓާފައިވާއިރު، އީރާނުންވެސް ވަނީ ބައިނަލްއަގުވާމީ ބައެއް އުޅަނދުތައް ހޮރްމުޒް ކަނޑުއޮޅި ސަރަހައްދުން ހިފަހައްޓާފައެވެ.