މަސްވެރިން ބާނާ މަހަށް ސަރުކާރުން ގަވާއިދުން ފައިސާ ދޫކުރަމުން އަންނަ އުސޫލުގެ ދަށުން އިއްޔެ އެކަނިވެސް 5 މިލިއަނަށްވުރެ ގިނަ ރުފިޔާ މަސްވެރިންނަށް ޖަމާކޮށްފިއެވެ.

މިފްކޯއިން އާއްމުކުރި ތަފާސްހިސާބަށް ބަލާއިރު އިއްޔެ 53 މަސްދޯންޏަކަށް 5 މިލިއަނަށްވުރެ ގިނަ ރުފިޔާ ޖަމާކޮށްދީފައިވެއެވެ. އެގޮތުން އެއީ، އޭޕްރިލް 22 ވަނަ ދުވަހު ކިރުވި މަހަށްވާ 5،273،863 ރުފިޔާއެވެ. މީގެ ތެރޭގައި ހިމެނެނީ، މިފްކޯއަށް ކިރުވި ކަޅުބިލަމަހާއި، ކަންނެލި ކރުވި ފަރާތްތަކަށް ޖަމާކުރި ފައިސާއެވެ.

އެދުވަހު މިފްކޯއަށް އެންމެ ގިނަ އަދަދަކަށް ކިރުވާފައިވަނީ، ކަލޫބިލަމަހެވެ. އެއަށްފަހު ދެން އެންމެ ގިނައިން ކިރުވާފައިވަނީ، 10 ކިލޯއިން މަތީގެ ކަންނެއްޔާއި، 15 ކިލޯއިން މަތީގެ ކަންނެއްޔެވެ.

މިފްކޯއަށް ކިރުވި މަހުގެ ރިޕޯޓް

ކަޅުބިލަމަސް ކިރުވި 50 ދޯންޏަކަށް ވަނީ 5.1 މިލިއަން ރުފިޔާ ދޫކޮށްފައެވެ. މީގެ ތެރޭގައި ބޮޑުކަންނެލި ކިރުވި ދޯނިފަހަރަށް ދޫކުރި ފައިސާ ހިމެނެއެވެ. މީގެ އިތުރުން 10 ކިލޯއިން މަތީގެ ބޮޑުކަންނެލި ކިރުވި 5 ދޯންޏަކަށް 5,260 ރުފިޔާ ޖަމާކޮށްފައި ވާއިރު، 15 ކިލޯއިން މަތީގެ ބޮޑުކަންނެލި ކިރުވި 12 ދޯންޏަކަށް 84,125 ރުފިޔާ ވަނީ ޖަމާކޮށްދީފައެވެ.

މަސްވެރިކަމުގެ ދާއިރާ ކުރިއެރުވުމަށްޓަކައި ސަރުކާރުން ވަނީ، މިފްކޯއިން މަސް ގަންނަ އަގު 16 ރުފިޔާއަށް ބޮޑުކޮށް، މަސްވެރިންނަށް ވިއްކާ ތެލުގެ އަގު 13 ރުފިޔާއަށް ކުޑަކޮށްފައެވެ. އަދި ރައީސްގެ ވައުދުފުޅާ އެއްގޮތަށް ޖަނަވަރީ މަހުން ފެށިގެން މިފްކޯއިން ބޮޑުކަންނެލި ގަންނަން ފަށާފައިވާއިރު، މިހާރު ކަންނެލި ގަންނަނީ ކިލޯއެއް 25 ރުފިޔާގެ ރޭޓުންނެވެ.