އެމެރިކާގެ ވޮޝިންގޓަން ޑީސީގައި ބޭއްވި ވައިޓް ހައުސް ކޮރެސްޕޮންޑެންޓްސް ޑިނަރ ހިނގަމުންދަނިކޮށް، ހޮޓަލުން ބޭރުގައި ބަޑީގެ ހަމަލާތަކެއް ދިނުމާ ގުޅިގެން ރައީސް ޑޮނަލްޑް ޓްރަމްޕް ކުއްލި ގޮތަކަށް އެ ސަރަހައްދުން ބޭރުކޮށްފިއެވެ.
މި ހާދިސާ ހިނގާފައިވަނީ ހޮނިހިރު ދުވަހުގެ ރޭ ވޮޝިންގޓަން ހިލްޓަން ހޮޓަލުގައެވެ. އަހަރީ މީޑިއާ ހަފުލާ ފެށުމުގެ ކުރިން ރައީސް ޓްރަމްޕާއި ފަސްޓް ލޭޑީ މޭޒުގައި އިށީނދެގެން ތިއްބާ ބަޑީގެ އަޑު އިވުމާއެކު، ސީކްރެޓް ސަރވިސްގެ އެޖެންޓުން ވަނީ ވަގުތުން އޭނާ އެ ތަނުން ނެރެފައެވެ.
ހާދިސާއާ ގުޅިގެން ޓްރަމްޕްގެ 'ޓްރުތް ސޯޝަލް'ގައި ކުރި ޕޯސްޓެއްގައި ބުނީ، އޭނާއާއި، ފަސްޓް ލޭޑީ، ނައިބު ރައީސް އަދި ކެބިނެޓްގެ ހުރިހާ މެންބަރުންގެ ހާލުވެސް ރަނގަޅު ކަމަށެވެ. އަދި މި ހާދިސާއާ ގުޅިގެން ވަރަށް އަވަހަށް ވައިޓް ހައުސްއިން ނޫސްވެރިންގެ ބައްދަލުވުމެއް ބާއްވާނެ ކަމަށްވެސް ބުންޏެވެ.
"ފަސްޓް ލޭޑީއާއި، ނައިބު ރައީސްގެ އިތުރުން ކެބިނެޓްގެ ހުރިހާ މެންބަރުން ތިއްބީ ސަލާމަތުން. އަޅުގަނޑުމެން ބައިގަޑިއިރު ތެރޭގައި ތިޔަބޭފުޅުންނާ ބައްދަލުކުރާނަން. ހަފުލާ އިންތިޒާމުކުރި ފަރާތްތަކާ ވާހަކަދެކެވިއްޖެ، ކުރިއަށް އޮތް 30 ދުވަހުގެ ތެރޭގައި މި ހަފުލާ އަލުން ބާއްވާނެ،" ޓްރަމްޕް ބުންޏެވެ.
މީގެ އިތުރުން ޓްރަމްޕް ވަނީ އެމެރިކާގެ ސީކްރެޓް ސަރވިސްއާއި ފުލުހުން ދިން އަވަސް އިޖާބައަށް ތައުރީފު ކޮށްފައެވެ.
"އެމީހުން އަމަލުކުރީ ވަރަށް ހުށިޔާރުކަމާއި ހިތްވަރާއެކު. ބަޑިޖެހި މީހާ މިހާރު ވަނީ ހައްޔަރުކޮށްފައި،" ޓްރަމްޕް އިތުރަށް ބުނެފައިވެއެވެ.
މި ހާދިސާ ހިނގި ވަގުތުގެ ވީޑިއޯތަކުން ފެންނަ ގޮތުގައި ބަޑީގެ އަޑު އިވުމާއެކު ހަފުލާގެ ބައިވެރިން ވަނީ "ތިރިވޭ!" އަދި "ތިރީގައި ތިބޭ!" ގޮވަމުން މޭޒުތަކުގެ ނިވަލަށް ވަދެފައެވެ. ޓްރަމްޕް އެ ސަރަހައްދުން ގެންދިއުމާއެކު، ހަތިޔާރު އެޅި އެޖެންޓުން ވަނީ އޭނާ އިން މޭޒު ވަށާލާފައެވެ.
ހާދިސާ ހިނގި ސަރަހައްދުގައި މަސައްކަތްކުރި އަލްޖަޒީރާގެ ޕްރޮޑިއުސަރ ކްރިސް ޝެރިޑަން ބުނި ގޮތުގައި އޭނާއަށް ފަސް ވަރަކަށް ބަޑީގެ އަޑު އިވުނެވެ.
"އަޅުގަނޑުމެންނަށް ބަޑިބޭހުގެ ވަސް ދުވި. ވަގުތުން އެންމެން ބިމަށް ތިރިވީ. އެ އަޑު އިވުނީ ސީދާ އަޅުގަނޑުގެ ފަހަތުން، ހޯލަށް ވަންނަ ދޮރުމަތިން،" އޭނާ ބުންޏެވެ.
Advertisement
This content is created and paid for by advertisers and does not involve Voice Journalists
