މިހާރުގެ މި ޕީއެންސީ ވެރިކަން ކޮންމެހެންވެސް ބަދަލުކުރަންޖެހޭ ކަމަށް ރައީސް ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވެފައިވަނީ، އެމްޑީޕީ ޗެއަރޕާސަން ހޮވުމުގެ އިންތިހާބަށް އެމަނިކުފާނު ހޮވުމަށްޓަކައި މިހާރު ކުރިއަށްގެންދާ "ބޮޑު ބަދަލު" ކެމްޕެއިން ހަރަކާތްތަކުގެ ތެރެއިން އައްޑޫއަށް ވަޑައިގެން ބޭއްވި ޖަލްސާއެއްގައި ރޭ ވާހަކަދައްކަވަމުންނެވެ.
މިހާރުގެ މި ޕީއެންސީ ވެރިކަން އަޅުގަނޑުމެން ކޮންމެހެންވެސް ބަދަލު ކުރަންޖެހޭ.
ރައީސް ނަޝީދު ވިދާޅުވިއެވެ.
މީގެ އިތުރުން، ރައީސް ނަޝީދު ފާހަގަކުރެއްވި ގޮތުގައި، އެ ބަދަލު ގެނެވޭނީ އެމަނިކުފާނު ދެކޭގޮތުގައި، އެމްޑީޕީއަށެވެ. މީގެ އިތުރުން އެއީ މިހާރު ހަމައެކަނި ޕާޓީއެއް ނޫންކަންވެސް އެ މަނިކުފާނު ވަނީ ފާހަގަކުރައްވާފައެވެ.
އެ ބަދަލު އަޅުގަނޑުމެންނަށް ގެނެވޭނީ އަޅުގަނޑު ދުށް ގޮތުގައި އަދި އަޅުގަނޑު މިހާރު އަބަދުވެސް ދެކޭގޮތުގައި ދިވެހި ރައްޔިތުންގެ ޑިމޮކްރެޓިކް ޕާޓީ އޭ މިކިޔޭ މުއައްސަސާއިން. އެއީ މިހާރު ހަމައެކަނި ޕާޓީއެއް ނޫން.
ރައީސް ނަޝީދު ވިދާޅުވިއެވެ.
ޖަލްސާގައި ވާހަކަދައްކަވަމުން ރައީސް ނަޝީދު ވަނީ، ސަރުކާރު ބަދަލު ނުވެ 2028 އަތުވެއްޖެނަމަ އެއީ ރާއްޖެއަށް އެމަނިކުފާނު ދެކޭގޮތުގައި ލިބޭނެ ވަރަށް ބޮޑު ގެއްލުމެއް ކަމަށް ފާހަގަކޮށްފައެވެ.
އަޅުގަނޑު ޕާޓީގެ ޗެއާރޕާސަން ކަމާ ހަވާލު މިވަނީ، ހަވާލުވުމަށް އަޅުގަނޑު އެދެނީ، އަޅުގަނޑު ދެކޭގޮތުގައި މި ބަދަލު، ސަރުކާރު ބަދަލު ކުރުމަކީ ވަރަށް މުހިންމު ކަމެއް. ސަރުކާރު ބަދަލު ނުވެ 2028 ވަނަ އަހަރު އަތުވެއްޖެ ނަމަ އެއީ މި ދިވެހިރާއްޖެއަށް އަޅުގަނޑު ދެކޭގޮތުގައި ލިބޭނެ ވަރަށް ބޮޑު ގެއްލުމެއް. ދިވެހި ރައްޔިތުންގެ ޑިމޮކްރެޓިކް ޕާޓީގެ، އެމްޑީޕީގެ ސަރުކާރެއް އުފެއްދުމަކީ މި ރާއްޖޭގެ ރައްޔިތުން ކޮންމެހެންވެސް، އެ ރައްޔިތުންނަށް ކޮށްދޭންޖެހޭ ކަމެއް.
ރައީސް ނަޝީދު ވިދާޅުވިއެވެ.
އެމަނިކުފާނު އިތުރަށް ވިދާޅުވީ، ބާރުވެރި ފަރާތްތަކުން ކުރަމުން ގެންދަނީ ކޮންކަމެއްތޯ އެ މީހުންނަށް ފާރަވެރިވެ ތިބުން އެއީ އެންމެ މުހިންމު މަސައްކަތް ކަމެވެ.
ރައީސް ނަޝީދު ވަނީ ގާނާގައި އެމަނިކުފާނު އަދާކުރަމުންދިޔަ މަގާމުގެ ދައުރު ހަމަވުމުން އަނބުރާ ރާއްޖެ ވަޑައިގެން ރަސްމީކޮށް ސިޔާސީ މައިދާނުގައި އަލުން މަސައްކަތް ފައްޓަވާފައެވެ.
ކުރިއަށް އޮތް އެމްޑީޕީގެ ޗެއަރޕާސަން ހޮވުމުގެ އިންތިހާބުގައި ރައީސް ނަޝީދުގެ އިތުރުން، މީކާއިލް އަޙްމަދު ނަސީމް އާއި އަލްހާން ފަހުމީ ވެސް ވާދަކުރައްވައެވެ. އެގޮތުން، ރައީސް ނަޝީދު އާއި ފައްޔާޞު އިސްމާއިލް ގުޅިގެން ވަނީ "ބޮޑު ބަދަލު" ގެ ނަމުން ގާނޫނުއަސާސީއަށް ބަދަލުތަކެއް ގެންނަވަން ހުށެހެޅުމަށް ހުށަހަަޅަން ނިންމަވާފައެވެ.
މީގެ އިތުރުން، އެމްޑީޕީން ދަނީ ރައީސް މުއިއްޒުގެ އިސްތިއުފާއަށް ގޮވާލަމުން ކޮންމެ ރެއަކު ވެސް މުޒާހަރާ ކުރަމުންނެވެ. އަދި މުޒާހަރާވެރިން މާލޭގެ މަގުމަތިން ކޮންމެ ރެއަކުވެސް މުލިއާގެ އާއި ދިމާލަށް ދާން މަސައްކަތް ކުރާކަން ފާހަގަކުރެވެއެވެ.
Advertisement
This content is created and paid for by advertisers and does not involve Voice Journalists
