އެމެރިކާގެ ވޮޝިންޓަންގައި ބޭއްވި "ވައިޓް ހައުސް ކޮރެސްޕޮންޑެންޓްސް ޑިނަރ" ހަފްލާގެ ތެރޭގައި ބަޑީގެ ހަމަލާތަކެއް ދިނުމާ ގުޅިގެން، ރައީސް ޑޮނަލްޑް ޓްރަމްޕް އެ ސަރަހައްދުން ރައްކާތެރިކަމާއެކު ބޭރުކޮށްފިއެވެ.
ހޮނިހިރު ދުވަހުގެ ރޭ ވޮޝިންޓަން ހިލްޓަން ހޮޓަލުގައި ކުރިއަށްދިޔަ މި އަހަރީ ގާލާ ހަފްލާގެ ބޯލްރޫމުން ބޭރުގައި ބަޑިޖަހަން ފެށުމާއެކު، ސެކިއުރިޓީން ވަނީ ވަގުތުން ރައީސް ޓްރަމްޕް ސްޓޭޖުން ބާލާފައެވެ. މަންޒަރު ދުށް މީހުން ބުނި ގޮތުގައި ބަޑީގެ އަޑު އިވުމާއެކު ހަފްލާގެ ބައިވެރިން ވަނީ މޭޒުތަކުގެ ފަހަތަށް ވަދެ ރައްކާތެރިކަން ހޯދާފައެވެ. މި ހާދިސާގައި ރައީސް ޓްރަމްޕާއި، ފަސްޓް ލޭޑީ މެލަނިއާ ޓްރަމްޕް އަދި ކެބިނެޓްގެ އެއްވެސް މެންބަރަކަށް އަނިޔާއެއް ލިބިފައެއް ނުވެއެވެ.
ހާދިސާއަށްފަހު ބޭއްވި ނޫސްވެރިންގެ ބައްދަލުވުމެއްގައި ޓްރަމްޕް ބުނީ، ގިނަ އަދަދެއްގެ ހަތިޔާރާއެކު ހުރި މީހަކު ސެކިއުރިޓީ ޗެކްޕޮއިންޓަށް ހަމަލާދޭން އުޅުމުން ސީކްރެޓް ސަރވިސް އިން އޭނާ ހުއްޓުވާފައިވާ ކަމަށެވެ.
ބަޑިޖެހި މީހާ
ނޫސްވެރިއަކު ކުރި ސުވާލަކަށް ޖަވާބު ދެމުން ޓްރަމްޕް ބުނީ، އެ މީހާގެ އަމާޒަކީ އޭނާ މަރާލުން ކަމަށެވެ. އަދި އެއީ "ވަރަށް ސިކް މީހެއް" ކަމަށާއި، އޭނާ ހަމަލާދިނީ އެމެރިކާގެ ގާނޫނުއަސާސީއަށް ކަމަށްވެސް ޓްރަމްޕް ސިފަކުރިއެވެ.
މި ހަމަލާގައި ސީކްރެޓް ސަރވިސްގެ އޮފިސަރެއްގެ ގަޔަށް ބަޑިޖަހާފައިވީ ނަމަވެސް، އޭނާ ލައިގެން ހުރި ވަޒަން ނާރާ ވެސްޓްގެ ސަބަބުން ފުރާނަ ސަލާމަތްވެ، އޭނާގެ ހާލު ރަނގަޅުވަމުން އަންނަ ކަމަށް ޓްރަމްޕް ބުންޏެވެ.
"މިއީ ފާއިތުވި ދެތިން އަހަރުގެ ތެރޭގައި އަޅުގަނޑަށް ހަމަލާދީ، މަރަން އުޅުނު ފުރަތަމަ ފަހަރެއް ނޫން،" ޓްރަމްޕް ބުންޏެވެ.
ސީކްރެޓް ސަރވިސް އިން ބުނި ގޮތުގައި މި ހަމަލާ ދީފައިވަނީ ސެކިއުރިޓީ ބަލާ ފާސްކުރާ ސަރަހައްދެއްގައެވެ. މި ހާދިސާއާ ގުޅިގެން މިހާރު ވަނީ މީހަކު ހައްޔަރުކޮށްފައެވެ. އެމެރިކާގެ މީޑިއާތަކުން ރިޕޯޓްކުރާ ގޮތުގައި ހައްޔަރުކޮށްފައިވަނީ ކެލިފޯނިއާގެ ޓޮރެންސްއަށް ނިސްބަތްވާ އުމުރުން 31 އަހަރުގެ ކޯލް ޓޯމަސް އެލަންއެވެ.
އެފްބީއައިގެ ޑިރެކްޓަރ ކާޝް ޕަޓޭލް ވިދާޅުވީ، ހަމަލާދިން މީހާގެ ފަސްފަހަތް ބަލަމުން އަންނަ ކަމަށާއި، އާންމުންގެ އަތުގައި އެއްވެސް މައުލޫމާތެއް އޮތް ނަމަ އެކަން ހިއްސާކުރުމަށް އެދޭ ކަމަށެވެ. އަދި ޑިސްޓްރިކްޓް އޮފް ކޮލަމްބިއާގެ ޔޫއެސް އެޓަރނީ ޖަނީން ފެރިސް ޕީރޯ ބުނީ، އެ މީހާގެ މައްޗަށް ނުރައްކާތެރި ހަތިޔާރެއް ބޭނުންކޮށްގެން އޮފިސަރުންނަށް ހަމަލާދިނުމުގެ ދައުވާ އުފުލާނެ ކަމަށެވެ.
ނޫސްވެރިންގެ ބައްދަލުވުން ނިންމާލަމުން ރައީސް ޓްރަމްޕް ވަނީ އެމެރިކާގެ ހުރިހާ ރައްޔިތުންވެސް އެމީހުންގެ މެދުގައި ހުރި ތަފާތުތައް ސުލްހަވެރިކަމާއެކު ހައްލުކުރުމަށް އަޒުމް ކަނޑައެޅުމަށް ގޮވާލާފައެވެ.
ހަމަލާ ދިން ވަގުތު ތުހުމަތުކުރެވޭ މީހާ ބިމަށް ވައްޓާލާފައި އޮތް ފޮޓޯތަކެއް ޓްރަމްޕް ވަނީ އޭނާގެ ސޯޝަލް މީޑިއާ ޕްލެޓްފޯމް "ޓްރޫތް ސޯޝަލް" ގައި ހިއްސާކުރައްވާފައެވެ.
Advertisement
This content is created and paid for by advertisers and does not involve Voice Journalists
