އެމްޑީޕީގެ ޗެއަރޕާސަން ކަމަށް ވާދަކުރައްވާ ގަލޮޅު ދެކުނު ދާއިރާގެ މެންބަރު، މީކާއީލް ނަސީމް، ޕާޓީގެ މާލީ ކަންކަން ހާމަކަންބޮޑު ގޮތެއްގައި ކުރިއަށް ގެންދަވާނެ ކަމުގެ ފުރިހަމަ ޔަގީންކަން ދެއްވައިފިއެވެ.
މީކާއިލް މިހެން ވިދާޅުވެފައިވަނީ، "އިތުބާރު" ކެމްޕެއިންގެ ފަރާތުން ރޭ މާލޭގެ ސިޓީ ހޮޓާ ކަންމަތީގައި ބޭއްވި "އިތުބާރު ކަންމަތީ ބައްދަލުވުން" ގައި ވާހަކަދައްކަވަމުންނެވެ.
މި ބައްދަލުވުމުގައި ވާހަކަދައްކަވަމުން މީކާއީލް ވަނީ، ކައުންސިލް އިންތިޚާބުގެ ކެމްޕެއިންގައި ރަށްރަށަށް ކުރެއްވި ދަތުރުތަކުން އެމްޑީޕީގެ އާންމު މެންބަރުންގެ ފަރާތުން އެންމެ ބޮޑަށް އިވިގެންދިޔައީ ޕާޓީގެ ހިންގުމާމެދު އޮތް ޝަކުވާކަން ފާހަގަކުރައްވާފައެވެ. ޚާއްސަކޮށް، ޕާޓީއަށް ލިބޭ ފައިސާއަށް ވާގޮތް ނޭނގޭކަމުގެ ކަންބޮޑުވުން އާންމު މެންބަރުން ފާޅުކޮށްފައިވާކަން އޭނާ ވިދާޅުވިއެވެ.
ނިކަން ބައްލަވާ ނިމިދިޔަ ރިޔާސީ އިންތިހާބާ ހަމައަށް. މި ޕާޓީއަށް ވަރަށް ބޮޑެތި އަދަދުން ފައިސާ ލިބެމުން އައި. އޭރު މި ޕާޓީގެ މެންބަރޝިޕްވެސް އޮތީ އިންތިހާއަށް މަތީގަ. އެހެންނަމަވެސް އެމްޑީޕީގެ އާންމު މެންބަރުން އަޅުގަނޑުމެންނާ ކުރާ ސުވާލަކީ އެ ފައިސާ ކޮބާތޯއޭ؟ އެމްޑީޕީގެ މާލީ ނިޒާމް، މާލީ ސިސްޓަމް ދެފުއްފެންނަ ގޮތަކަށް އެމްޑީޕީއަށް 20 އަހަރު ވެގެންދާއިރު ނެތީ ކީއްވެތޯއެވެ؟
މީކާއީލް ވިދާޅުވިއެވެ.
މީކާއީލް ވައުދުވެވަޑައިގަތީ އޭނާގެ ޗެއަރޕާސަން ކަމެއްގައި ޕާޓީއަށް ލިބޭ ފައިސާއާއި، ގޮނޑި މޭޒަށް ވާގޮތްވެސް މެންބަރުންނަށް އަންގަވައި، މާލީ ނިޒާމު ދެފުށް ފެންނަ ގޮތަކަށް ބައްޓަންކުރައްވާނެ ކަމަށެވެ. އަދި އެމްޑީޕީއަށް ދޭ ފައިސާއަކީ ޙަޤީޤަތުގައިވެސް ޕާޓީގެ ކުރިއެރުމަށާއި މެންބަރުންގެ ކުރިމަގަށް ލިބޭ ފައިސާކަމުގައި ހައްދަވާނެ ކަމުގެ ޔަގީންކަން ދެއްވިއެވެ.
މި ބައްދަލުވުމުގައި ވާހަކަދައްކަވަމުން ހުޅުމާލެ ދެކުނު ދާއިރާގެ މެންބަރު ޑރ. އަޙްމަދު ޝަމްހީދު ވަނީ، ކުރިއަށް އޮތް ޗެއަރޕާސަން އިންތިޚާބަކީ 2028 ވަނަ އަހަރުގެ ރިޔާސީ އިންތިޚާބު ކާމިޔާބުކުރުމަށް އެޅޭ އެންމެ މުހިންމު ފިޔަވަޅުކަން ފާހަގަކުރައްވާފައެވެ. މިއަދު ނަގާ ވޯޓަކީ ޤައުމު ސަލާމަތްކުރާނެ ބަޔަކު ހޯދައި، ޕާޓީ އެކުއެކީގައި ކުރިއަށް ގެންދާނެ ލީޑަރެއް ހޮވުމަށް ނެގޭ ވޯޓެއްކަން އޭނާ ފާހަގަކުރެއްވިއެވެ.
އަޅުގަނޑުމެންގެ ވޯޓު ކަރުދާހުގަ އޮންނަ ސުވާލަކީ، މި ޕާޓީއަށް 2028 ކާމިޔާބު ކުރެވޭނީ މިތަނުން ކޮން ބޭފުޅެއްގެ ޗެއަރޕާސަންކަމުގެ ދަށުގަހޭ. ތިއެންމެ ބޭފުޅުން ރަނގަޅަށް ވިސްނާލައްވައިފިއްޔާ އޭގެ ޖަވާބު ވަރަށް ސާފުކޮށް ފެންނާނެ. އެއީ 'އިތުބާރު' ކެންޕޭނާކު އަޅުގަނޑުމެންނާއެކު މިހުންނެވި މީކާއީލް ނަސީމް.
ޑރ. ޝަމްހީދު ވިދާޅުވިއެވެ.
މި ބައްދަލުވުމުގައި ޕާޓީގެ ގިނަ އަދަދެއްގެ އާންމު މެންބަރުން ބައިވެރިވެފައިވާއިރު، މީކާއީލްގެ "އިތުބާރު" ކެމްޕެއިން ޓީމުން އަންނަނީ މެންބަރުންގެ ކަންބޮޑުވުންތައް ގާތުން އަޑުއަހައި، އެމްޑީޕީގެ އާންމު މެންބަރުންގެ އިތުބާރު ޕާޓީގެ ނިޒާމަށް އަލުން ހޯދައިދިނުމުގެ މަސައްކަތް ބާރަށް ކުރިއަށް ގެންދަމުންނެވެ.
Advertisement
This content is created and paid for by advertisers and does not involve Voice Journalists
