މާލެ ސަރަޙައްދުގައި ދިމާވެފައިވާ ބޯހިޔާވަހިކަމުގެ މައްސަލައަށް ހައްލެއް ހޯދުމަށް ވިލިމާލޭގައި ބިނާކުރާ ފުލެޓުތަކުގެ ތެރެއިން އެއް ޓަވަރު އަޅާ ތަން ބަދަލުކުރުމަށް ސަރުކާރުން ނިންމައިފިއެވެ.

ހައުސިން މިނިސްޓަރު ޑރ. ޢަބްދުالله މުއްޠަލިބު މިއަދު އެކްސްގައި ކުރެއްވި ޕޯސްޓެއްގައެވެ.

މިނިސްޓަރު މުއްޠަލިބު ވިދާޅުވި ގޮތުގައި، މާލެ ސަރަޙައްދުގައި އެކަށީގެންވާ ވަރަށް ޕާކުތަކާއި ހުސްޖާގަ ނެތް ނަމަވެސް، އެތައް ހާސް އާއިލާއަކުން ދަތި ހާލުގައި ދިރިއުޅެމުންދާތީ އެފަރާތްތަކަށް ބޯހިޔާވަހިކަން ފޯރުކޮށްދިނުމަކީ ސަރުކާރުގެ މުހިންމު އަމާޒެކެވެ.

ނަމަވެސް މާލެ ސަރަޙައްދުގެ ބިންތަކަކީ މިހާރުވެސް ގޯތި ދޫކުރުމަށް ކަނޑައެޅިފައިވާ ބިންތަކަށް ވުމާއެކު، ފުލެޓު އެޅުމަށް ބޭނުންވާ ބިން ހޯދުމަކީ ބޮޑު ގޮންޖެހުމެއްކަން އޭނާ ފާހަގަކުރެއްވިއެވެ.

އެގޮތުން ވިލިމާލޭގައި ޢިމާރާތްކުރުމަށް ހަމަޖެހިފައިވާ 300 ފުލެޓުގެ މަޝްރޫޢާ ގުޅޭގޮތުން މިނިސްޓަރު ވިދާޅުވީ، ސަރުކާރުގެ ސިޔާސަތަކީ އެ ސަރަޙައްދުގައި ހުރި ބޮޑެތި ފުނަގަސްތައް ނުކަނޑައި މަޝްރޫޢު ކުރިއަށް ގެންދިއުން ކަމަށެވެ.

”ނަމަވެސް 3 ޓަވަރުގެ ތެރެއިން 1 ޓަވަރު އަޅަން ކަނޑައެޅި ތަނުގައި ހުރި ގަސްތައް ނަގަންޖެހޭތީއާއި، ބައެއް ބޮޑެތި ގަސްތަކުގެ ގޮފިތައް ކަނޑަން ޖެހޭތީ އެޓަވަރު އެހެން ސަރަޙައްދަކަށް ބަދަލުކުރުމަށް މިހާރުވަނީ ނިންމާފައެވެ.“ މިނިސްޓަރު ވިދާޅުވިއެވެ.

ވިލިމާލޭގެ ފުނަވާ ސަރަހައްދުގައި ހުރި ގަސްތައް ކަނޑައި، ހައުސިން ޔުނިޓު އަޅަން ނިންމާފައިވާތީ ކަމާ ގުޅުން ހުރި ފަންނީ ފަރާތްތަކުން ވަނީ އެކަން އެގޮތަށް ނުކުރުމަށް ގޮވާލައި އިހްތިޖާޖުވެސް ކޮށްފައެވެ.