ކުރިއަށް އޮތް އެމްޑީޕީގެ ޗެއާޕާސަން އިންތިހާބުގައި ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމަށް ތާއީދު ކުރުމަށް އެމްޑީޕީގެ ޕީޖީ ގުރޫޕްގެ އަށް މެންބަރަކު ނިންމައިފި އެވެ.
ޗެއާޕާސަން އިންތިހާބުގައި ވާދަކުރަނީ މީކާއީލްއާ ކުރީގެ ރައީސް މުހައްމަދު ނަޝީދެވެ. އަދި އަލްހާން ފަހުމީވެސް ވަނީ އެކަމަށް ޝައުގުވެރިކަން ފާޅުކޮށްފަ އެވެ.
މީކާއީލް މިއަދު ވަނީ އެމްޑީޕީގެ ޕީޖީ ގުރޫޕްގެ 12 މެންބަރުންގެ ތެރެއިން އަށް މެންބަރުންނާއެކު ނޫސްވެރީންގެ ބައްދަލްވުމެއް ބާއްވާފަ އެވެ. އޭނާ ވިދާޅުވީ އެ މެންބަރުންގެ ފުރިހަމަ ތާއީދު އޮތީ އޭނާއަށް ކަމަށެވެ. އެކަމަށް ޝުކުރުވެސް އަދާކުރި އެވެ.
އަދި އޭގެ ފަހުން އެ މެންބަރުން ވަނީ މީކާއީލަށް ތާއީދު ކުރާކަން ހާމަކޮށްފަ އެވެ. ތާއީދު ކުރަން ނިންމި ސަބަބުތައް ވެސް ވިދާޅުވެ ދެއްވި އެވެ. ޕީޖީ ގުރޫޕްގެ ލީޑަރު އިބްރާހިމް ނާޒިލް ވިދާޅުވީ އޭނާގެ ތާއީދު އޮތީ މީކާއީލަށް ކަމަށާ ޕާޓީއަށް އެންމެ މުހިންމު ވަގުތު މީކާއީލްގެ ހިދުމަތް ލިބުނު ކަމަށެވެ.
އަދި އޭނާ ނިސްބަތްވާ އައްޑޫން މީކާއީލަށް ދެވެން އޮތް ތާއީދެއް ދޭނެ ކަމަށް ވިދާޅުވި އެވެ.
މެންބަރު މައުރޫފް ޒާކިރު ވިދާޅުވީ މީކާއީލް ފަދަ ދެވަނަ ބޭފުޅަކު އިންތިހާބުގައި ވާދަނުކުރާ ކަމަށެވެ.
"މީކާއީލް އަހްމަދު ނަސީމަަށް ނުކުރެވުނު ޗެއާޕާސަން ކަމެއް ކުރެވޭނެ އެހެން މެންބަރަކު މި އެމްޑީޕީގައި މިވަގުތުހުރި ކަމަކަށް އަޅުގަނޑު ގަބޫލެއް ނުކުރަން," މައުރޫފް ވިދާޅުވި އެވެ.
މިއަދުގެ ބައްދަލްވުމުގައި ބައިވެރިނުވަނީ ތިން މެންބަރެކެވެ. އެއީ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ އާއި ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް އާއި ތޮއްޑޫ ދާއިރާގެ މެންބަރު ހުސައިން ސަމީރެވެ.
ޣަފޫރު ބައިވެރިނުވީ އެއީ ވަގުތީ ޗެއަޕާސަންގެ މަގާމުގައި ހުންްނެވީތީ ކަމަށް ބެލެވެ އެވެ. ސަމީރާއި މެންބަރު ކުޑޫގެ ތާއީދު އޮތީ ކޮން ކެންޑިޑޭޓަކަށް ކަމެއް ސާފެއް ނުވެ އެވެ.
Advertisement
This content is created and paid for by advertisers and does not involve Voice Journalists
