މިރޭ ކުރަމުންދާ ވިއްސާރައިގައި ގުގުރައި ހޮނު އެޅުމުގެ ސަބަބުން، ބައެއް ގޭގޭގެ އީއެލްސީބީ (ELCB) ޓްރިޕްވެ ކަރަންޓު ކެނޑެމުންދާކަން ފާހަގަކުރެވިފައިވާ ކަމަށް ކަރަންޓް ކުންފުނި -- ސްޓެލްކޯ އިން ބުނެފި އެވެ.

ސްޓެލްކޯ އިން މިރޭ ބުނީ މިރޭ ކުރަމުންދާ ވިއްސާރައިގައި ގުގުރައި ހޮނު އެޅުމުގެ ސަބަބުން، ބައެއް ގޭގޭގެ އީއެލްސީބީ (ELCB) ޓްރިޕްވެ ކަރަންޓު ކެނޑެމުންދާކަން ފާހަގަކުރެވިފައިވާ ކަމަށެވެ. އަދި މިފަދަ ހާލަތެއް މެދުވެރިވެ ކަރަންޓު ހިނގައްޖެނަމަ، ގޭ ތެރޭގެ ނުވަތަ އެޕާޓްމަންޓުގެ ޑީ-ބޯޑު ޗެކްކޮށް އީއެލްސީބީ ވެއްޓިފައިވާނަމަ އަލުން ނަގައި ކަރަންޓު ދިނުމަށް މަސައްކަތް ކުރުމަށް އެދޭ ކަމަށެވެ.

މިރޭ ގަދައަށް ގުގުރާ ވިދި -- ފޮޓޯ: ހަމްދޫން.އެމްވީ

އެހެން ނަމަވެސް، އީއެލްސީބީ ރިސެޓްކުރުމަށް ފަހު ނަގާ ވަގުތު އަލުން ވެއްޓޭނަމަ، ނުވަތަ ކަރަންޓު ނުލިބޭނަމަ ސްޓެލްކޯގެ ހޮޓްލައިން 1545 އަށް ގުޅައި ރިޕޯޓް ކުރުމަށް ވަނީ އެދިފަ އެވެ.

މިރޭ މާލެ ސަރަހައްދަށް ވާރޭވެހި ވަރަށް ބާރަށް ގުގުރި އެވެ. އަދި ގަދަފަދަ ވިދުވަރާއެކު ވިދި އެވެ. ހުޅުމާލޭގެ ބައެއް ސަރަހައްދުތަކަށް ވަނީ ހޮނުއަޅާފަ އެވެ. ބައެއް އިމާރާތްތަކަށް ވެސް ގެއްލުންވި އެވެ.