ރ.މީދޫގައި މިހާރު ކުރިއަށްދާ އެމްޖޭއެސް ރާބަދިޗެލެންޖް 2026 ގެ ފައިނަލުގެ ފަހު ޖާގަ ކޯރާ ކޯރާ މޯލްޑިވްސް ހޯދައިފިއެވެ.

މުބާރާތުގެ ފައިނަލަށް ކޯރާ ކޯރާ ދަތުރުކުރީ ރޭ ޖޯލި މޯލްޑިވްސްއާ ދެކޮޅަށް ކުޅުނުމެޗް 3-1 ގެ ނަތީޖާއަކުން ކާމިޔާބުކޮށްގެންނެވެ. މެޗްގައި ކޯރާ ކޯރާއަށް ގޯލް ހުޅުވާލަދިނީ، މެޗް ފެށިތާ ކުޑަ ވަގުތުކޮޅެއްގައި މުހައްމަދު އިސާމެވެ. ފުރަތަމަ ލަނޑު ޖެހިތާ 15 މިނެޓް ނުވަނީސް އޭނާ ވަނީ އިތުރު ލަނޑެއް ޖަހައި ލީގް ފުޅާކޮށްދީފައެވެ. ފުރަތަމަ ހާފް ނިމުނީ 2-0 ގެ ނަތީޖާއިންނެވެ.

ދެވަނަ ހާފް ފަށައިގެން ރައުލް ނިޔާޒް ވަނީ 30 ވަނަ މިނެޓް ތެރޭގައި ލަނޑެއް ޖަހައި މެޗްގެ ނަތީޖާ 3-0 ކަށް ބަދަލުކޮށްފައެވެ. މި މެޗްގައި ޖޯއްޔަށް ސުންކަނޑުވާލަދިނީ މުހައްމަދު ހާތިމް އެވެ.

މެޗްގެ މޮޅު ކުޅުންތެރިޔާގެ މަގާމް ހޯދީ ދެ ލަނޑު ޖެހި އިސާމެވެ. އިސާމަކީ މުބާރާތުގައި މިހާތަނަށް ދެވަނައަށް އެންމެ ގިނަ ލަނޑު ޖެހި ކުޅުންތެރިޔާއެވެ. އިސާމް ވަނީ 7 ލަނޑު ޖަހާފައެވެ. އަދި ލަނޑުޖަހަން އެންމެގިނަ އެސިސްޓް ކޮށްދިން ކުޅުންތެރިޔާއެވެ. 

އެމްޖޭއެސް ރާބަދި ޗެލެންޖުގައި މިހާތަނަށް އެންމެ ގިނަ ލަނޑު ޖެހި ކުޅުންތެރިއަކީ ކޯރާ ކޯރާގެ ރައުލް އެވެ. އޭނާ ވަނީ 10 ލަނޑު ޖަހާފައެވެ. އަދި ގޯލަށް އަމާޒުކޮށް އެންމެ ގިނަ ހަމަލާ ފޮނުވާލާފައި ވަނީވެސް ރައުލް އެވެ. އޭނާގެ ޝޮޓް ޓާގެޓް އުޅެނީ 17 ގައެވެ.

އެމްޖޭއެސް ރާބަދި ޗެލެންޖުގެ ފައިނަލްމެޗް އޮންނާނީ މާދަމާ ރެއެވެ. ފައިނަލުގައި ކޯރާ ކޯރާ މޯލްޑިވްސް ނިކުންނާނީ، އަލިއާ ކޮތައިފަރު މޯލްޑިވްސް އާ ދެކޮޅަށެވެ. މިމެޗް ފެށުމަށް ހަމަޖެހިފައިވަނީ، ރ.މީދޫ ފުޓްސަލް ދަނޑުގައި 21:00 ގައެވެ.