ރެއިން ފެށިގެން ރާއްޖޭގެ އެކިކަންކޮޅުތަކަށް ކުރަމުންދާ ވިއްސާރައިގައި، މިއަދުވެސް ބޯކޮށް ވާރޭވެހި ގުގުރާނެކަމަށް ލަފާކޮށް ބޮޑު ސަރަހައްދަކަށް ހުދު ސަމާލު ނެރެފިއެވެ.
މޫސުމާ ބެހޭ ގައުމީ އިދާރާ، މެޓް އޮފީހުން ހުދު ސަމާލު ނެރުނީ ޅ އަތޮޅުން ފެށިގެން އައްޑޫ ސިޓީއަށެވެ. އެ ސަރަހައްދަށް ހުދު ސަމާލު ނެރުނީ ހެނދުނު 10:00 އިން 16:00 އަށެވެ.
މެޓް އޮފީހުން ބުނީ އެވަގުތު ތަކުގައި ސަރަހައްދަށް ބޯކޮށް ވާރޭވެހި ގުގުރާނެ ކަމަށެވެ.
އަދި މީގެއިތުރުން، ވިލާގަނޑުގައި ގަޑިއަކު ގާތްގަނޑަކަށް 40 މޭލަށް ވައިގަދަވާނެކަމަށްވެސް މެޓް އޮފީހުން ލަފާކޮށްފައިވެއެވެ.
މިއަދުގެ މޫސުން ލަފާކޮށް މެޓް އޮފީހުން ބުނެފައިވާގޮތުން، ކަނޑުތައް އާދައިގެ ވަރަކަށް މަޑުވާނެއެވެ. ނަމަވެސް، ވިލާގަނޑުގައި ގަދަވާނެ ކަމަށާއި، ރާޅުގެ އުސްމިން ގާތްގަނޑަކަށް 2 ފޫޓާއި 5 ފޫޓާއި ދެމެދުގަ ހުންނާނެކަމަށެވެ.
މިހާރުކުރަމުންދާ ވިއްސާރައިގަ، ހުޅުމާލޭގެ ފޭސް 1 ގެ ބައެއް އިމާރާތްތަކަށް ހޮނުއަޅައި، ބައެއް އިމާރާތްތަކަށް ގެއްލުންވެސް ލިބިފައިވެއެވެ.
Advertisement
This content is created and paid for by advertisers and does not involve Voice Journalists
