ޖަޕާނުގެ ޓޯކިޔޯގައި އޮންނަ ހަނީޑާ އެއާޕޯޓުގައި ގްރައުންޑް ހޭންޑްލިންގް މަސައްކަތްތައް ކުރުމަށް އިންސާނުންނާ އެއްގޮތް ސިފަ ހުންނަ "ހިއުމަނޮއިޑް" ރޮބޮޓްތަކެއް ބޭނުންކުރަން ފެށުމަށް ޖަޕާން އެއާލައިންސް (ޖޭ.އޭ.އެލް) އިން ނިންމައިފިއެވެ.

އަންނަ މެއި މަހު ފެށުމަށް ހަމަޖެހިފައިވާ މި މަސައްކަތަކީ ޖަޕާނަށް ކުރިމަތިވެފައިވާ މަސައްކަތްތެރިންގެ ދަތިކަމަށް ދާއިމީ ހައްލެއް ހޯދުމުގެ މަގްސަދުގައި ދެ އަހަރު ދުވަހުގެ މުއްދަތަށް ކުރިއަށްގެންދާ ޓްރަޔަލްއެކެވެ.

ޗައިނާގެ "ޔުނިޓްރީ" ކުންފުނިން އުފައްދާފައިވާ 130 ސެންޓިމީޓަރުގެ އިސްކޮޅު ހުންނަ މި ރޮބޮޓްތައް ބޭނުންކުރާނީ ފަސިންޖަރުންގެ ފޮށްޓާއި މުދާ އެއާޕޯޓުގެ ރަންވޭ ސަރަހައްދުގައި އުފުލުމަށެވެ. އަހަރަކު 60 މިލިއަނަށްވުރެ ގިނަ ފަސިންޖަރުން ބޭނުންކުރާ ހަނީޑާ އެއާޕޯޓުގައި މި ތަޖުރިބާ 2028 ވަނަ އަހަރާ ހަމައަށް ކުރިއަށްދާނެއެވެ.

ޖޭ.އޭ.އެލް އާއި އެ ކުންފުނީގެ ބައިވެރިއެއް ކަމަށްވާ "ޖަޕާން އެއާލައިންސް ޖީ.އެމް.އޯ އިންޓަރނެޓް ގްރޫޕް" އިން އުންމީދު ކުރަނީ، ފަތުރުވެރިން އިތުރުވަމުންދާ މި ދަނޑިވަޅުގައި މި ރޮބޮޓްތަކުގެ ސަބަބުން މުވައްޒަފުންގެ މަސައްކަތުގެ ބުރަ ކުޑަވެގެންދާނެ ކަމަށެވެ. މި ހަފުތާގައި މީޑިއާއަށް ދައްކާލި މަންޒަރުތަކުން ފެންނަ ގޮތުގައި، މި ރޮބޮޓްތައް ވަނީ މަތިންދާބޯޓު ކައިރީގައި ހުރި ކޮންވެޔަރ ބެލްޓަކަށް މުދާ އެރުވުމުގެ މަސައްކަތް ކޮށްފައެވެ.

ޖޭ.އޭ.އެލް ގްރައުންޑް ސާވިސްގެ ރައީސް ޔޮޝިތެރޫ ސުޒުކީ ވިދާޅުވީ، ހަށިގަނޑަށް ބުރަ މަސައްކަތްތައް ކުރުމަށް ރޮބޮޓް ބޭނުންކުރުމަކީ މުވައްޒަފުންނަށް ލިބޭނެ ބޮޑު ލުޔެއް ކަމަށެވެ. ނަމަވެސް ސަލާމަތީ ކަންކަން ބެލެހެއްޓުން ފަދަ މުހިންމު ޒިންމާތައް އަދިވެސް އަދާކުރާނީ އިންސާނުން ކަމަށް އޭނާ ފާހަގަކުރެއްވިއެވެ. މީގެ އިތުރުން، ކުރިއަށް އޮތް ތަނުގައި ބޯޓުތަކުގެ ކެބިން ސާފުކުރުމަށާއި އެހެނިހެން ގްރައުންޑް ސަޕޯޓް މަސައްކަތްތަކަށްވެސް މި ރޮބޮޓްތައް ބޭނުންކުރަން އެއާލައިނުން ރާވާފައިވެއެވެ.

ޖީ.އެމް.އޯ އޭ.އައި އެންޑް ރޮބޮޓިކްސްގެ ރައީސް ޓޮމޯހީރޯ އުޗިދާ ވިދާޅުވި ގޮތުގައި، އެއާޕޯޓުތަކުގެ ބޭރުފުށުން އޮޓޮމޭޓިކް ކަންތައްތަކެއް ފެނުނު ނަމަވެސް، އެތެރޭގެ ގިނަ މަސައްކަތްތަކަކީ އަދިވެސް އިންސާނުންގެ ބުރަ މަސައްކަތުން ކުރާ ކަންތައްތަކެވެ.

ޖަޕާނުގެ އާބާދީ ދަށަށް ދިއުމާއި މަސައްކަތްކުރާ އުމުރުގެ މީހުން މަދުވުމުގެ ސަބަބުން އެ ޤައުމަށް ވަނީ ބޮޑު ގޮންޖެހުމަކާ ކުރިމަތިވެފައެވެ. ތަފާސްހިސާބުތަކުން ދައްކާ ގޮތުގައި 2026 ވަނަ އަހަރުގެ ފުރަތަމަ ދެ މަސްދުވަހު އެކަނިވެސް 7 މިލިއަނަށްވުރެ ގިނަ ފަތުރުވެރިން ޖަޕާނަށް ޒިޔާރަތްކޮށްފައިވެއެވެ. އަދި 2040 ވަނަ އަހަރާ ހަމައަށް އެ ޤައުމުގެ އިޤްތިޞާދީ އަމާޒުތަކަށް ވާސިލްވުމަށް 6.5 މިލިއަނަށްވުރެ ގިނަ ބޭރުގެ މަސައްކަތްތެރިން ބޭނުންވާނެ ކަމަށް ލަފާކުރެވެއެވެ. އިންސާނުންނާ އެއްގޮތަށް ފަރުމާކޮށްފައިވާ މި ރޮބޮޓްތަކަކީ މެދުކެނޑުމެއްނެތް ގޮތުގައި ދެ ގަޑިއިރާއި ތިން ގަޑިއިރާ ދެމެދުގެ ވަގުތަކަށް މަސައްކަތްކުރުމުގެ ގާބިލްކަން ލިބިފައިވާ އާލާތްތަކެކެވެ.