ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާ ގުޅުވައި "އަދަދު" ނޫހުން ތައްޔާރުކުރި "އައިޝާ" ޑޮކިއުމަންޓްރީގެ މައްސަލައިގެ ތަޙުޤީޤަށް ނުފޫޒް ފޯރުވާ ކަމުގެ ތުހުމަތު ކުރައްވައި، ކުރީގެ އުއްތަމަ ފަނޑިޔާރު ޑރ. އަޙްމަދު ޢަބްދުالله ދީދީ ކުރެއްވި ޕޯސްޓަކަށް ދާޚިލީ ސަލާމަތާއި ބެހޭ ވަޒީރު ޢަލީ އިޙްސާން ރައްދު ދެއްވައިފިއެވެ.
މި މައްސަލައިގައި ޑރ. އަޙްމަދު ޢަބްދުالله ދީދީ އެކްސްގައި ކުރެއްވި ޕޯސްޓެއްގައި ވިދާޅުވީ، ޖިނާއީ ތަޙުޤީޤު ހިންގުމަށް ޤާނޫނުން މަތިކޮށްފައިވާ ފުލުހުންގެ އިދާރާއަކީ ދާޚިލީ ވަޒީރުގެ ބެލުމުގެ ދަށުން ހިނގާ މުއައްސަސާއަކަށް ވީނަމަވެސް، އެއްވެސް ތަޙުޤީޤަކަށް ސީދާކޮށް ނުވަތަ ނުސީދާކޮށް ނުފޫޒު ފޯރުވުމުގެ ބާރު ވަޒީރަށް ލިބިގެން ނުވާ ކަމަށެވެ.
އަދި "އައިޝާ" ޑޮކިއުމަންޓްރީގެ ތަޙުޤީޤަކީ ސަރުކާރުގެ ނުފޫޒުން އެއްކިބާވެފައިވާ ތަޙުޤީޤަކަށް ހެދުމަށްޓަކައި، ޚާއްޞަ އިންވެސްޓިގޭޓަރަކާ އެ މަސައްކަތް ޙަވާލުކުރަންޖެހޭ ކަމަށްވެސް އޭނާ ވިދާޅުވިއެވެ.
ޑރ. އަޙްމަދު ޢަބްދުالله ދީދީ މިހެން ވިދާޅުވީ، އެ ޑޮކިއުމަންޓްރީގެ މައްސަލަ ފުލުހުން ބަލަމުންދާ ކަމަށާއި މައްސަލަ ބެލުމަކީ ފުލުހުންގެ ޒިންމާއެއް ކަމަށް ވަޒީރު އިޙްސާން ކުރިން ވިދާޅުވެފައިވާތީ އެކަމަށް އިޝާރާތް ކުރައްވައެވެ.
މި ވާހަކަތަކަށް ރައްދު ދެއްވަމުން ވަޒީރު އިޙްސާން ވިދާޅުވީ، ތަޙުޤީޤުތަކަށް ނުފޫޒު ފޯރުވުމުގެ ބާރު ލިބިގެންނުވާތީ އެ ބާރު ބޭނުން ނުކުރައްވާ ކަމަށެވެ. އަދި މިހާތަނަށް އެއްވެސް ތަޙުޤީޤަކަށް ސީދާކޮށްވެސް އަދި ނުސީދާކޮށްވެސް ނުފޫޒެއް ފޯރުވާފައި ނުވާނެ ކަމުގެ ޔަޤީންކަން ވަޒީރު ދެއްވިއެވެ.
”އަޅުގަނޑު މަޤާމުގެ މަސްއޫލިއްޔަތު އަދާކުރަނީ މަނިކުފާނު އުއްތަމަ ފަނޑިޔާރުކަން ކުރެއްވިގޮތަކަށް ނޫން.“ އިހްސާން ވިދާޅުވުއެވެ.
Advertisement
This content is created and paid for by advertisers and does not involve Voice Journalists
