މެދުއިރުމަތީގައި އިސްރާއީލާއި، އެމެރިކާ އަދި އީރާނާ ދެމެދު ހިނގަމުންދާ ހަމަނުޖެހުންތަކުގެ ސަބަބުން ރާއްޖޭގެ ފަތުރުވެރިކަމަށް އައިސްފައިވާ ލޮޅުމާއެކު، ދުނިޔޭގެ އެންމެ ބޮޑު ސީޕްލޭން އޮޕަރޭޓަރު ޓްރާންސް މޯލްޑިވިއަން އެއަރވޭޒް (ޓީއެމްއޭ) އިން މުވައްޒަފުންގެ މުސާރަ ވަގުތީ ގޮތުން ކުޑަކުރަން ނިންމައިފިއެވެ.
ރާއްޖޭގެ އިގްތިސާދުގެ މައިބަދަ ކަމަށްވާ ފަތުރުވެރިކަމަށް މި ހަމަނުޖެހުންތަކުގެ ސަބަބުން ވަނީ ވަރަށް ބޮޑަށް އަސަރުކޮށްފައެވެ. މެދުއިރުމަތީގެ ގައުމުތަކުންނާއި އެ ސަރަހައްދު ހުރަސްކޮށް ރާއްޖެއަށް އަންނަ ފްލައިޓްތައް ގިނަ އަދަދަކަށް ކެންސަލްވުމާ ގުޅިގެން، ރާއްޖެއަށް އަންނަ ފަތުރުވެރިންގެ އަދަދު ވަނީ ވަރަށް ބޮޑަށް ދަށަށް ގޮސްފައެވެ.
ޓީއެމްއޭ އިން ހާމަކުރި ގޮތުގައި، މި ދުވަސްވަރު އެ ކުންފުނިން ދަތުރުކުރާ ފަސިންޖަރުންގެ އަދަދު ވަނީ އިންތިހާއަށް މަދުވެފައެވެ.
ކުންފުނިން ބުނި ގޮތުގައި، މާލީ ގޮތުން ކުރިމަތިވެފައިވާ މި ބޮޑު ގޮންޖެހުމުން އަރައިގަތުމަށްޓަކައި މީގެ ކުރިން ވެސް ގިނަ ފިޔަވަޅުތަކެއް ވަނީ އަޅާފައެވެ. އޭގެ ތެރޭގައި ކޮންމެހެން ކުރަންޖެހޭ ޚަރަދުތައް ފިޔަވައި އެހެން ޚަރަދުތައް ހުއްޓާލުމާއި، ކެޕިޓަލް އެކްސްޕެންޑިޗަރ މަދުކުރުން ހިމެނެއެވެ.
ނަމަވެސް، ފަތުރުވެރިން އަންނަ މިންވަރު މާ ބޮޑަށް ދަށަށް ދިއުމުގެ ސަބަބުން، ހަމައެކަނި އެ ފިޔަވަޅުތަކުން ކުންފުނީގެ މާލީ ހާލަތު ހަމައަކަށް ނޭޅުވޭނެތީ މުސާރައަށް ބަދަލު ގެންނަން މަޖުބޫރުވީ ކަމަށެވެ.
ޓީއެމްއޭ އިން ނިންމާފައިވަނީ މިއަދުން ފެށިގެން މުސާރައަށް ވަގުތީ ބަދަލެއް ގެނައުމަށެވެ. މި ބަދަލު ކުރިއަށް ދާނީ ތިން މަސް ދުވަހުގެ މުއްދަތަކަށް، ނުވަތަ 2026 ޖުލައި މަހުގެ ނިޔަލަށެވެ. އަދި ފަސިންޖަރުންގެ އަދަދު 2025 ވަނަ އަހަރު ހުރި މިންވަރަށް އިއާދަވުމާއެކު، މުސާރަތައް ކުރިން ހުރި މިންވަރަށް ރުޖޫޢަކުރާނެ ކަމަށް ވެސް އެ ކުންފުނިން ބުނެއެވެ.
ކުންފުނީގެ މުވައްޒަފުންނަށް ފޮނުވި މެސެޖެއްގައި ޓީއެމްއޭ އިން ބުނެފައިވަނީ، މިއީ ނިންމަން ވަރަށް އުނދަގޫ ނިންމުމެއް ކަމަށާއި، މުސާރައަށް އަންނަ ބަދަލަކީ މުވައްޒަފުންނާއި އެމީހުންގެ އާއިލާތަކަށް ކުރާނެ އަސަރު ވަރަށް ރަނގަޅަށް ދަންނަ ކަމަށެވެ.
ނަމަވެސް، މި ފިޔަވަޅަކީ މުވައްޒަފުންގެ ވަޒީފާ ރައްކާތެރިކުރުމަށާއި، މި ދަތި އުނދަގޫ ވަގުތުން އަރައިގަނެ، ކުންފުނީގެ މަސައްކަތްތައް މެދުނުކެނޑި ކުރިއަށް ގެންދިއުމަށްޓަކައި އެޅި ކޮންމެހެން މުހިންމު ފިޔަވަޅެއް ކަމަށް އެ ކުންފުނިން ފާހަގަކުރިއެވެ.
ޓީއެމްއޭ އިން އިތުރަށް ބުނީ، ކުންފުނީގެ އަސާސަކީ މުވައްޒަފުންގެ ހުނަރާއި މަސައްކަތްތެރިކަން ކަމަށާއި، މި ދަނޑިވަޅުގައި ވެސް މުވައްޒަފުން ދައްކަމުންދާ ކެތްތެރިކަމާއި ފަންނީ ހުނަރަށް ޝުކުރު އަދާކުރާ ކަމަށެވެ.
Advertisement
This content is created and paid for by advertisers and does not involve Voice Journalists
