ކުރިއަށް އޮތް އެމްޑީޕީ ޗެއަރޕާސަން ހޮވުމުގެ އިންތިހާބު، ފައިސާ ނެތުމުގެ ސަބަބުން ފަސްކުރަން އެމްޑީޕީގެ ވަގުތީ ޗެއަރޕާސަން ހުށެހެޅުމުން، އިންތިހާބު ފަސްކުރުމާއި ދެކޮޅު ހަދައި ރައީސް ނަޝީދުގެ ކެމްޕެއިން ޓީމުން އިސްނަގައިގެން އިންތިހާބު ތާވަލާއި އެއްގޮތަށް ބޭއްވުމަށް ފައިސާ އެއްކުރަން ފަށައިފިއެވެ.
މި މަސައްކަތް ރައީސް ނަޝީދުގެ ކެމްޕެއިން ޓީމުން ފެށީ، އިއްޔެ ޕާޓީގެ ވަގުތީ ޗެއަރޕާސަން ޤަފޫރު މިވަގުތު އިންތިހާބެއް ބޭއްވުމަށްޓަކައި ޕާޓީގައި ފައިސާ ނެތުމުގެ ސަބަބުން އިންތިހާބު ފަސްކުރުމަށް ހުށެހެޅުމުންނެވެ.
ރައީސް ނަޝީދުގެ ކެމްޕެއިން ޓީމުން ބުނާގޮތުގައި އިންތިހާބު ފަސްކުރަން ހުށެހެޅީ، ނަޝީދު އެމްޑީޕީގެ ޗެއަރޕާސަން ކަމަށް ހޮވިވަޑައިގަންނަވާނެ ކަމުގެ ޔަގީންކަން މީކާއިލް ނަސީމް އާއި ރައީސް ސާލިހް އަށް އޮތުމުންނެވެ. އަދި އެ ބޭފުޅުން ފާހަގަކުރާ ގޮތުގައި، މި ނިންމެވުމަކީ ވަކި ބަޔަކަށް ފައިދާކުރާނެ ނިންމުމެކެވެ. އެގޮތުން، އިންތިހާބު ލަސްނުކޮށް ބޭއްވުމަށްޓަކައި އެ ބޭފުޅުން ވަނީ އިންތިހާބަށް ބޭނުންވާނެ ފައިސާ ހޯދުމަށްޓަކައި ރުފިޔާ އެއްކުރުމުގެ މަސައްކަތް ފަށާފައެވެ.
މިހާރު އޮތް ގޮތުން ތާވަލުކޮށްފައިވަނީ، އަންނަ މަހުގެ 12 ވަނަ ދުވަހު އިންތިހާބު ބޭއްވުމަށެވެ. މި އިންތިހާބުގައި ވާދަކުރައްވަން ރައީސް ނަޝީދުގެ އިތުރުން، ގަލޮޅު އުތުރު ދާއިރާގެ މެންބަރު މީކާއިލް އަޙްމަދު ނަސީމް އާއި ކުރީގެ މަޖިލިސް މެންބަރު އަލްހާން ފަހްމީވެސް ވާދަކުރަން ނިންމިއެވެ. ނަމަވެސް، އަލްހާނުގެ ނިންމުން އަނބުރާ ގެންދިއުމުގެ ސަބަބުން އިންތިހާބުގައި މިހާރު ވާދަކުރައްވަނީ ހަމައެކަނި ރައީސް ނަޝީދާއި މީކާއިލްއެވެ.
މި އިންތިހާބުގައި ވާދަކުރައްވާ 2 ކެނޑިޑޭޓުން ވެސް ކެމްޕެއިން ކުރުމުގެ ގޮތުން ރާއްޖޭގެ އެކި ކަންކޮޅުތަކަށް ދަތުރު ކުރަމުންދާއިރު، މީކާއިލް ވެސް ވަނީ އިންތިހާބު ފަސްކުރުމާއި ދެކޮޅު ހައްދަވާފައެވެ. ނަމަވެސް، މިކަމާއި ގުޅޭ ގޮތުން ރައީސް ސާލިހް އެއްވެސް އެއްޗެއް އަދި ވިދާޅުވެފައެއް ނުވެއެވެ.
Advertisement
This content is created and paid for by advertisers and does not involve Voice Journalists
