މެދުއިރުމަތީގައި ހިނގަމުންދާ ހަނގުރާމައިގެ ސަބަބުން ރާއްޖޭގެ ފަތުރުވެރިކަމުގެ ސިނާއަތަށް ކުރިމަތިވެފައިވާ ގޮންޖެހުންތަކުން އަރައިގަތުމަށް ސަރުކާރުން އެހީތެރިކަން ފޯރުކޮށްދިނުމަށް ގޮވާލައި، ރައްޔިތުންގެ މަޖިލީހަށް ހުށަހެޅި ކުއްލި މައްސަލަ މިއަދު ބޭރުކޮށްލައިފިއެވެ.

ކެންދޫ ދާއިރާގެ މެންބަރު މައުރޫފް ޒާކިރު ހުށަހެޅުއްވި މި މައްސަލައިގައި ބުނެފައިވަނީ، މެދުއިރުމަތީގެ ހަނގުރާމައިގެ މައިދާނާ ރާއްޖެ ދުރުގައި އޮތް ނަމަވެސް، ޔޫރަޕާއި ރާއްޖެއާ ދެމެދު އޮންނަ ދަތުރުފަތުރުގެ މަގުތަކަށް އެޅޭ ހުރަސްތަކުގެ ސަބަބުން އިގްތިސާދީ ބޮޑު ނުރައްކަލެއް ކުރިމަތިވެފައިވާ ކަމަށެވެ. މީގެ ސަބަބުން ރާއްޖޭގެ އިގްތިސާދުގެ މައި އިންޖީނު ކަމަށްވާ ފަތުރުވެރިކަމުގެ ދުވެލި މަޑުޖެހި، ވިޔަފާރިތަކަށް ލިބޭ އާމްދަނީ ބޮޑުތަނުން ދަށްވެފައިވާކަން މެންބަރު ފާހަގަކުރެއްވިއެވެ.

މިނިސްޓްރީ އޮފް ޓޫރިޒަމްގެ ތަފާސްހިސާބުތަކާ ހަވާލާދީ އެ މައްސަލައިގައި ބުނެފައިވަނީ، ހަނގުރާމައާ ގުޅިގެން ރާއްޖެއަށް ދުވާލަކު އަންނަ ފަތުރުވެރިންގެ އަދަދު 7,000 އިން 4,000 އާއި 5,000 އާ ދެމެދުގެ އަދަދަކަށް ދަށްވެފައިވާ ކަމަށެވެ. އަދި ދުވާލަކު ގާތްގަނޑަކަށް 2,000 ބުކިން ކެންސަލްވަމުންދާ ކަމަށާއި، މިއީ ފަތުރުވެރިން ޒިޔާރަތްކުރާ މިންވަރު 21 އިންސައްތަ ދަށަށް ދިއުމެއް ކަމަށްވެސް މައުރޫފް ވިދާޅުވިއެވެ.

މީގެ އިތުރުން، އޭޝިއަން ޑިވެލޮޕްމަންޓް ބޭންކް (އޭޑީބީ) އިން ލަފާކޮށްފައިވާ ގޮތުގައި، ރާއްޖޭގެ އިގްތިސާދީ ކުރިއެރުން 2025 ވަނަ އަހަރު 5.4 އިންސައްތައިގައި ހުރުމަށްފަހު، 2026 ވަނަ އަހަރު 1 އިންސައްތައަށް ދަށްވާނެއެވެ. މިއީ ތެލުގެ އަގު އުފުލުމާއި ފަތުރުވެރިކަމަށް ކުރާ ނޭދެވޭ އަސަރުތަކުގެ ނަތީޖާ ކަމަށް މައްސަލައިގައި ބަޔާންކޮށްފައިވެއެވެ.

މި ހާލަތުން އަރައިގަތުމަށް މެންބަރު މައުރޫފް ހުށަހެޅުއްވި ބައެއް ފިޔަވަޅުތަކުގެ ތެރޭގައި ހިމެނެނީ:

މުވައްޒަފުންގެ މުސާރައަށް ބޭނުންވާ ވޯކިން ކެޕިޓަލް ލޯން ނުވަތަ އިންކަމް ސަޕޯޓް އެލަވަންސް ދިނުން.

ލޯނުތަކުގެ އަސްލު ފައިސާ ދެއްކުން 6 މަސްދުވަހަށް ފަސްކޮށްދިނުން (މޮރަޓޯރިއަމް).

ބީއެމްއެލް މެދުވެރިކޮށް ލުއި ލޯނުތަކާއި ދިގު ގްރޭސް ޕީރިއަޑެއް ހަމަޖެއްސުން.

ފަތުރުވެރިކަމުގެ ވިޔަފާރިތަކަށް ކަރަންޓާއި ތެލުގެ ސަބްސިޑީ ދިނުން.

ރިސޯޓް ކުއްޔާއި، އެއާޕޯޓް ފީ އަދި ޓޫރިޒަމް ޖީއެސްޓީ ދެއްކުން ވަގުތީގޮތުން ފަސްކޮށްދިނުން.

މި މައްސަލައިގައި ބުނެފައިވަނީ ކޮވިޑް-19 ގެ ހާލަތުގައި ސަރުކާރުން އެހީތެރިކަން ދިން ފަދައިން، މިހާރުވެސް އިގްތިސާދީ ދާއިމީ ގެއްލުމަކުން ސަލާމަތްވުމަށްޓަކައި ސަރުކާރުގެ އެހީތެރިކަން ކޮންމެހެން ބޭނުންވާ ކަމަށެވެ.

މަޖިލީހުގެ މިއަދުގެ ޖަލްސާގައި މި މައްސަލައަށް ބަހުސްކުރުމަށް ފެނޭތޯ ބެލުމަށް ނެގުނު ވޯޓުގައި ފެންނަ ކަމަށް ވޯޓު ދެއްވީ 8 މެންބަރުންނެވެ. ނުފެންނަ ކަމަށް 33 މެންބަރުން ވޯޓު ދިނެވެ. އެހެންކަމުން، މައްސަލަ ވަނީ ބޭރުކޮށްލާފައެވެ.