ލަންކާގައި ދިރިއުޅޭ ދިވެހީންނަށް ވިސާ ލިބުމުގައި އޮތް ދަތިކަމަށް ދާއިމީ ހައްލެއް ލިބޭނެ ކަމުގެ ޔަގީންކަން ލަންކާގެ ރައީސް އަނޫރަ ކުމާރަ ޑިސަނައިކަ ދެއްވާފައިވާ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ ލަންކާގެ ކޮލަންބޯގައި ދިރިއުޅޭ ދިވެހީންނާއި ބައްދަލުކުރެއްވުމަށް މިއަދު ބޭއްވި ބައްދަލްވުމުގައި ވާހަކަފުޅު ދައްކަވަމުންނެވެ. ލަންކާގައި ދިރިއުޅޭ ދިވެހީންގެ އެންމެ ބޮޑު ޝަކުވާއަކީ ވިސާގެ މައްސަލަ އެވެ.
ރައީސް ވިދާޅުވީ ދިވެހީންގެ އެ ކަންބޮޑުވުން ނަންގަވަނީ ވަރަށް ސީރިއަސްކޮށް ކަމަށެވެ. މިދިޔަ ދެ އަހަރާއި ބައިގެ ތެރޭގައި އެކަމަށް ހައްލެއް ހޯދުމަށް ގިނަ މަސައްކަތްތަކެއް ކުރެވި ކުރިއެރުންތަކެއް ވެސް ލިބިފައިވާ ކަމުގައި ވިދާޅުވި އެވެ.
އަދި ވިދާޅުވީ މި ފަހަރުގެ ދަތުރުފުޅުގައިވެސް އެ މައްސަލައަށް ހައްލެއް ހޯދުމަށް ގިނަ މަޝްވަރާތަކެއް ކުރެވިފައިވާ ކަމަށެވެ. އެގޮތުން ދެ ގައުމުގެ ވެރީންގެ ރަސްމީ މަޝްވަރާތަކުގައި އަދި އެހެނިހެން ބައްދަލްވުންތަކުގައި ވެސް އެ ވާހަކަތައް ދެކެވިފައިވާ ކަމަށެވެ.
ރައީސް ވިދާޅުވީ ލަންކާގެ ރައީސް ހުންނެވީ އެ މައްސަލައަށް ދާއިމީ ހައްލެއް ގެނެސްދެއްވުމަށް ވަރަށް އިސްކަމެއް ދެއްވައިގެން މަސައްކަތްޕުޅު ކުރައްވާ ގޮތަށް ކަމަށެވެ. އަދި ވިސާގެ މައްސަލައަށް ހައްލެއް ގެނެސްދެއްވާނެ ކަމުގެ ޔަގީންކަން ދެއްވާފައިވާ ކަމަށް ވެސް ވިދާޅުވި އެވެ.
"މި ގައުމުގެ ރައީސް [ލަންކާގެ ރައީސް] އަޅުގަނޑަށް ދެއްވި ޔަގީންކަމަކީ އިރާދަކުރެއްވިއްޔާ މިކަމުގައި [ވިސާގެ މައްސަލާގައި] ދާއިމީ ހައްލެއް ގެނެސްދެއްވޭނެ ކަމުގެ އުންމީދީ ޖަވާބެއް ދެއްވި،" ރައީސް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
