ޚުދުމުހުތާރު ވެރިކަން ނިމުމަކަށް ގެނައުމަށް އެމްޑީޕީއަކީ މޮޅު ޕާޓީއެއް ކަމަށާ، އެ ތަޖުރިބާގެ އަލީގައި ދުނިޔެއަށް އެހީވުމަކީ އެޕާޓީން ކުރަން ރަނގަޅުކަމެއް ކަމުގައި ކުރީގެ ރައީސް އަދި ޗެއާޕާސަން ކަމަށް ވާދަކުރައްވާ މުހައްމަދު ނަޝީދު ވިދާޅުވެއްޖެއެވެ.
ރޭ އޮތް ”ބޮޑު ބަދަލު“ ކެންޕެއިން ޖަލސާގައި ވާހަކަދައްކަވަމުން ނަޝީދު ވިދާޅުވީ، އެމްޑީޕީ ޗެއާޕާސަން ކަމަށް ވާދަކުރައްވަން ނިންމެވީ ކުރާނެ ކަމެއް ނެތީގެން ނޫން ކަމަށާ، އެ މަސައްކަތަކީ އެމަނިކުފާނަށް އައު މަސައްކަތެއްވެސް ނޫން ކަމަށެވެ.
މިވަގުތު ދިވެހިންނަށް، ރާއްޖެއަށް ކޮންމެހެން ބޭނުންވެފައި މިވަނީ މި ބަދަލު ގެނައުންކަން ދިވެހިން ހަރުއަޑުން ބުނަމުންދާ އަޑު އެފްރިކާއާ ހަމައަށް އިވޭތީ، އަޅުގަނޑު މިތަނަށް އައިސް މިހުރީ.
ރައީސް ނަޝީދު
ރައީސް ނަޝީދު ވިދާޅުވީ، ބޮޑު ބަދަލު ގެންނަވަން ނިންމެވީ، ދިވެހިންގެ އާއްމު ޙާލަތު ބަދަލުކޮށް، ތަނަވަސްކަން ހޯދައިދީ، ދިވެހިންނަށް ލިބޭ މިންވަރު އިތުރުކޮށްދެއްވުމަށް ކަމަށެވެ.
ނަޝީދު ވިދާޅުވީ، އެމަނިކުފާނު އެމްޑީޕީގެ ޗެއާޕާސަން ކަމަށް ވާދަކުރައްވަން ބޭނުންފުޅުވަނީ ކުރިއަށް އޮތް 2028 ވަނަ އަހަރުގެ އިންތިޚާބު އެ ޕާޓީއަށް ކާމިޔާބު ކޮށްދެއްވުމަށްޓަކައި ކަމަށެވެ. އަދި އެކަން ކުރެވޭނެ ކަމަށާ އެއީ އެމްޑީޕީ ދަންނަ މަސައްކަތެއް ކަމަށެެވެ.
އެމްޑީޕީގެ ޗެއާޕާސަނަކަށްހުރެ އެ މަސައްކަތް އެންމެން އެކުގައި ކުރެވޭނެ.އިރާދަކުރެއްވިއްޔާ އެ ދަތުރުގައި އަޅުގަނޑުމެން ކާމިޔާބުވެސް ވާނެ.
މީގެ އިތުރުން ޚުދުމުޚުތާރުވެރިކަން ބަދަލުކުރާނެ ގޮތް ކިޔައިދީ އެމްޑީޕީ އަށް ދުނިޔެއަށްވެސް އެހީވެވޭނެ ކަމަށް އެމަނިކުފާނު ވަނީ ވިދާޅުވެފައެވެ.
އޭގެ އިތުރަށް އަޅުގަނޑު އެބައޮތް އެމްޑީޕީން ކުރަން އަޅުގަނޑުގެ ހިތަށް އަންނަ ރަނގަޅުކަމެއް. ދުނިޔެއަށް އެހީތެރިވުން. ބައެއް ފަހަރު ބޮޑެތި ގައުމުތަކަށް އެބަ ހިތަށް އަރާ ޚުދުމުޚުތާރު ވެރިކަމެއް ނައްތާލަން ކުރަންޖެހޭ ކަމަކީ އެތަނަށް ބޮން އެޅުމޭ. އަޅުގަނޑުމެން އެކަން ކޮށްފިން ބޮންނާޅާ. ރާއްޖޭގައި. ސުލްހަވެރި ސިޔާސީ ހަރަކާތް ހިންގައިގެން. އަޅުގަނޑުމެންނަށް ލިބިފައި އެބައޮތް ތަޖުރިބާއެއް، ސުލްހަވެރިގޮތުގައި ވެރިކަންތައް ބަދަލުކުރުމުގެ. އަޅުގަނޑުމެންނަކީ މިސާލެއް. ރާއްޖެއަކީ އެކަން ވަރަށް ފުރިހަމައަށް ކުރި ބައެއް.
ރައީސް ނަޝީދު
ނަޝީދު ވިދާޅުވީ، ސުލްހަވެރިކަމާއެކު ޚުދުމުޚުތާރު ވެރިކަން ބަދަލުކުރާނެ ގޮތުގެ ވާހަކަ ދެއްކެވުމަށް އެކި ފަރާތްތަކުން އެމަނިކުފާނު އަރިހުން އެދެމުންދާ ކަމަށެވެ.
”މި މަސައްކަތް އަޅުގަނޑުމެންނަށް މުޅި ދުނިޔޭގައިވެސް ކުރެވެން އެބައޮތް.“ ނަޝީދު ވިދާޅުވުއެވެ.
ނަޝީދު ވިދާޅުވީ 2028 ވަނަ އަހަރު އެމްޑީޕީއަށް ވެރިކަން ހޯއްދަވައިދެއްވައި އެ ޕާޓީ އަކީ މުޅި ދުނިޔެއަށް ވިދާލާ ޕާޓީއަކަށް ހައްދަވައިދެއްވާނެ ކަމަށެވެ.
Advertisement
This content is created and paid for by advertisers and does not involve Voice Journalists
