އައްޑޫ ސިޓީގެ ވިޔަފާރިވެރިންނަށް ޚާއްޞަ ފޯރަމެއް ބޭއްވުމަށް ސަރުކާރުން ނިންމައިފިއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މިކަން އިޢުލާން ކުރެއްވީ އިޤްތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުޙައްމަދު ސަޢީދުއެވެ.

އެގޮތުން ވަޒީރު ވިދާޅުވީ، 2027 އިން 2029 އަށް އައްޑޫ އަތޮޅުގައި ވިޔަފާރިކުރާ ފަރާތްތަކަށް ޚާއްޞަ ގޮތްތަކެއް ކަނޑައަޅުއްވާނެކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއުލާންކުރައްވާފައިވާ ކަމަށެވެ. އެކަން އެގޮތަށް ކުރަން ނިންމާފައިވާ ލުއިތަކެއް ދީގެން އެ ސަރަހައްދަށް އިންވެސްޓަރުން ގެންދިޔުމަށް ކަމުގައިވެސް އޭނާ ވިދާޅުވިއެވެ. 

އެގޮތުން އެކަން ފެށުމަށްޓަކައި މިމަހު 13 އަދި 14 ވަނަ ދުވަހު އައްޑޫ ވިޔަފާރުވެރިންނަށް ޚާއްސަކޮށް އައްޑޫގައި ފޯރަމެއް ބާއްވަން ނިންމަވާފައިވާ ކަމަށް ވަޒީރު ވިދާޅުވިއެވެ. 

"މި ބައްދަލުވުމުގައި މައުލޫމާތު ދޭއިރު، އިކޮނަމިކް މިނިސްޓްރީގެ ޓްރޭޑް، އިންވެސްޓްމަންޓްސް، ޓްރާންސްޕޯޓްގެ އިތުރަށް، ލޭބާ ދާއިރާގެ މައުލޫމާތުތައް އަދި ޓެކްނޮލިޖީއާ އެހެންވެސް ގުޅުންހުރި މައުލޫމާތުތައް ދެއްވުމަށް ހޯމް މިނިސްޓްރީވެސް ބައިވެރިވާނެ. އޭގެ އިތުރަށް މި މަސައްކަތް ކުރަނީ، ޓޫރިޒަމްއާ، ފިޝަރީޒްއާ، އެގްރިކަލްޗާ އަދިވެސް ވިޔަފާރިއާ ގުޅުންހުރި، މިސާލަކަށް އިންފްރާ އިންފްރާ ސްޓްރަކްޗާ މިނިސްޓްރީއާ، ދައުލަތުގެ ހުރިހާ މުވައްސަސާތަކެއް، މީރާ، ފިނޭންސް މިނިސްޓްރީވެސް ހިމެނޭ ގޮތަށް ފޯރަމްގައި ބައިވެރިވާން." ވަޒީރު ސަޢީދު ވިދާޅުވިއެވެ.

މީގެ އިތުރުން، އެ ދަތުރުގެ ތެރެއިން އައްޑޫ ސިޓީގެ ހިތަދޫ ވިޔަފާރި ބަނދަރުގައި 'ފްރީ ޒޯން' ގެ ހަރަކާތްތަކެއް ފެށުމަށްވެސް ނިންމަވާފައިވާ ކަމަށް ވަޒީރު ވިދާޅުވިއެވެ.