ބޭންކް އޮފް މޯލްޑިވްސް، ބީއެމްއެލްގެ ކާޑު ތަކުންަ ޑޮލަރުގެ މުޢާމަލާތް ކުރާ އުސޫލަށް ގެނައި ބަދަލާ، ސަރުކާރުން މިމަހު ދެއްކި ބޮޑު ދެ ދަރަންޏާ އެއްވެސް ގުޅުމެއް ނެތް ކަމުގައި އިސް ތަރުޖަމާނު މުޙައްމަދު ޙުސައިން ޝަރީފް، މުންދު ވިދާޅުވެއްޖެއެވެ. 

މިދިޔަ އެޕްރީލް މަހުގެ ދެ ވަނަ ދުވަހު ސަރުކާރުން ވަނީ 524 މިލިޔަން ޑޮލަރުގެ ސުކޫކެއް ދައްކާފައެވެ. އަދި 23 އެޕްރީލުގައި އިންޑިއާއަށް ވަނީ 400 މިލިޔަން ޑޮލަރުގެ ކަރަންސީ ސްވޮޕް ފައިސާ ދައްކާފައެވެ. 

އެފަހުން މިމަހު ބީއެމްއެލުން ވަނީ މީހުންގެ ޑެބިޓްކާޑުތައް ހިފައިގެން ރާއްޖެއިން ބޭރަށްގޮސް ކުރާ ކާޑުގެ މުއާމަލާތްތައް ހުއްޓުވުމަށް ވިޔަވަޅުތަކެއް އެޅުމަށް ނިންމިކަން މިދިޔަ ހޮނިހިރުދުވަހު ހާމަކޮށްފައެވެ. މީގެ އިތުރުން އޮންލައިން ސައިޓްތަކުން ވިޔަފާރިކުރަމަށް އެ ބޭންކުގެ ކާޑުތަކަށް މީގެކުރިން ދީފައިވާ ބައެއް ދޫތަށް ވަނީ ހިފަހައްޓާފައެވެ. މީގެ މައިގަނޑު ސަބަބެއްކަމަށް ބީއެމްއެލުން ބުނީ، ނަހަމަގޮތުގައި އެ ހިދުމަތްތައް ބޭނުންކުރާ މީހުންގެ އަމަލުތައް ހުއްޓުވުމެވެ.

ނަމަވެސް ބައެއް ފަރާތްތަކުން ބުނަމުން އަންނަނީ ބީއެމްއެލްއިން މި ފިޔަވަޅު އަޅަންޖެހުނީ ސަރުކާރުން ދެއްކި ދަރަނި ތަކާއިއެކު އައި ޑޮލަރުގެ ތާށިކަމުގެ ސަބަބުން ކަމަށެވެ. 

އިސް ތަރުޖަމާނުގެ މިއަދުގެ ނޫސްވެރިންގެ ބައްދަލުވުމުގައި ވާހަކަދައްކަވަމުން ތަރުޖަމާނު ވަނީ އެވާހަކަ ދޮގުކުރައްވާފައެވެ. 

ބޭންކަށް ޑޮލަރު ލިބޭ މިންވަރަށްވުރެ ގިނައިން ޑޮލަރު ބޭރުކުރަންޖެހޭތީވެ ބީއެމްއެލުން ވަނީ ބޭރުފައިސާގެ މުއާމަލާތްތައް ރައްޔިތުންނަށް ވީހާވެސް ހަމަހަމަ ގޮތެއްގައި ފޯރުކޮށްދިނުމަށް ހަރުދަނާ ފިޔަވަޅުތަކެއް އެޅުމަށް ނިންމައި ތަންފީޒުކުރަން ފަށާފައެވެ.

އެގޮތުން ކޮންމެ މީހަކަށް މަހެއްގެ މައްޗަށް ކިރެވޭ މުޢާމަލާތް ލިމިޓްކޮށް ހުރިހާ ކަސްޓަމަރުންނަށްވެސް ޑެއިލީ ލިމިޓެއް ވަނީ ކަނޑައަޅާފައެވެ.