މިހާރު ރާއްޖޭގެ އިރުދެކުނުގައި އުފެދިފައިވާ ކޮޅިގަނޑާއި، ރާއްޖޭގެ އިރު އުތުރުގައި އުފެދިފައިވާ ލޯޕްރެޝަރ ޓްރަފްގެ ސަބަބުން ކުރިއަށްއޮތް ހަތަރު ދުވަހު ރާއްޖޭގެ ބޮޑު ސަރަހައްދަކަށް މޫސުން ގޯސްވެ، ބޯކޮށް ވާރޭ ވެހިދާނެތީވެ އެކަމަށް ސަމާލުވުމަށް ކަމާބެހޭ އިދާރާތަކުން އިލްތިމާސްކޮށްފިއެވެ.

މިކަމާ ގުޅިގެން ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ، އެންޑީއެމްއޭއިން ބުނީ، މިހާރު ރާއްޖެ ސަރަހައްދުގައި އުފެދިފައިވާ ކޮޅިގަނޑުތަކުގެ ސަބަބުން މިއަދުން ފެށިގެން އަންނަ ބުދަދުވަހުގެ ނިޔަލަށް ރާއްޖޭގެ ބޮޑުބަޔަކަށް ގަދަވަޔާއެކު ކަނޑުތައް ގަދަވެ، ބޯކޮށް ވާރޭވެހި، ވިއްސާރަވުމުގެ ފުރުސަތު އޮތްކަމަށް މޫސުމާބެހޭ އިދާރާއިން ލަފާކޮށްފައިވާ ކަމަށެވެ.

އެގޮތުން އެންޑީއެމްއޭ އިން ވަނީ މި ހާލަތުގައި ސަމާލުކަން ދޭންވީ ކަންތައްތަކެއް ފާހަގަކޮށްފައެވެ.

އެގޮތުން ފެންބޮޑުވެގެން ގެއްލުންވެދާނެ ތަންތަނުގައި ދިރިއުޅޭ ފަރާތްތަކަށް، ޚާއްޞަކޮށް އުމުރުން ދުވަސްވީ މީހުންނާއި ނުކުޅެދުންތެރިކަން ހުންނަ ފަރާތްތަކާއި ކުޑަކުދިންނަށް ބޭނުންވާ އެހީތެރިކަން ފޯރުކޮށްދިނުމުގެ އިންތިޒާމު ހަމަޖެއްސުމަށް ވަނީ އެދިފައެވެ. މީގެ އިތުރުން ފެންބޮޑުވެފައިވާ ސަރަހައްދުތަކުން ފެން ހިއްކުމަށް ބޭނުންވާ ތަކެތި ތައްޔާރުކުރުމާއި، ކަރަންޓުގެ ސަބަބުން ނުރައްކާތެރި ހާދިސާއެއް ހިނގިޔަ ނުދިނުމަށް ރައްކާތެރިކަމުގެ ފިޔަވަޅު އެޅުމަށް ވެސް އެ އޮތޯރިޓީން ވަނީ އިލްތިމާސްކޮށްފައެވެ.

ހަމައެހެންމެ ކާބޯތަކެތީގެ ރައްކާތެރިކަމަށް އަޅަންޖެހޭ ފިޔަވަޅުތައް އެޅުމާއި، ކުނިބުނި ނައްތާލުމުގެ އިންތިޒާމު ހަމަޖެއްސުމާއި، ކަމާ ގުޅޭ އިދާރާތަކުން ދޭ އިރުޝާދުތަކާ އެއްގޮތަށް ޢަމަލުކުރުމަށް ޢާންމު ރައްޔިތުންނަށް ބާރުއެޅުމަށް ވެސް ވަނީ އެދިފައެވެ.