ހުޅުމާލެ ކައިރި އޮތް ސަފާރީއެއްގައި ރޯވެ އަލިފާނުގެ ބޮޑު ހާދިސާއެއް ހިނގައިފިއެވެ.
އަލިފާނުގެ ހާދިސާ ހިނގާފައިވަނީ، ހުޅުމާލެއާއި ކުރުނބާ މޯލްޑިވްސް ރިޒޯޓާ ދޭތެރޭ އޮތް "އެމްޕެރަރ އެކްސްޕްލޯރަރ" ނަމަކަށް ކިޔާ ސަފާރީގައެވެ. ފުލުހުން ބުނެފައިވަނީ މި ހާދިސާ ހިނގިކަމުގެ މައުލޫމާތު ލިބިފައިވަނީ ހަވީރު 16:55 ހާއިރުކަމަށެވެ. މައުލޫމާތު ލިބިފައިވާ ގޮތުގައި މި ހާދިސާގައި ބޯޓު ވަނީ ބޭނުން ނުކުރެވޭ ވަރަށް އަނދާފައެވެ.
އަލިފާނުގެ ހާދިސާ ހިނގި ސަބަބެއް އަދި ކަމާބެހޭ ފަރާތަކުން ނުބުނެއެވެ. ނަމަވެސް ބޯޓުގައި އަލިފާން ރޯވީ ފަހަތްކޮޅުގައި ހުރި ކޮންމެވެސް އެއްޗެއްގައި އަލިފާން ހިފައިގެންކަމަށް މަންޒަރުދުށް ބައެއް މީހުން ވަނީ ވޮއިސްއަށް މައުލޫމާތު ހިއްސާކޮށްފައެވެ. އެގޮތުން ދުން ފެނުނުތާ ފަސްވަރަކަށް މިނެޓް ތެރޭގައި މުޅި ބޯޓަށް އަލިފާންގަނޑު ފެތުރުނުކަމަށް އެފަރާތްތަކުން ބުންޏެވެ.
މައުލޫމާތު ލިބިފައިވާ ގޮތުގައި ބޯޓުގައި ރޯވިއިރު ބޯޓު އޮތީ ދަތުރަށް ތައްޔާރުވެފައެވެ. ބޯޓުގައި އަލިފާން ހިފުމުން އެމްއެންޑީއެފް މާލެ އޭރިއާ ކޮމާންޑް، ހުޅުމާލޭ ފަޔަރ ސްޓޭޝަނުން ވަނީ އަލިފާންގަނޑު ނިއްވާލުމުގެ މަސައްކަތްކޮށްފައެވެ.
ފުލުހުން ދަނީ އަލިފާނުގެ މި ހާދިސާ ތަހުގީގްކުރަމުންނެވެ.
Advertisement
This content is created and paid for by advertisers and does not involve Voice Journalists
