1447 ވަނަ އަހަރުގެ ޙައްޖުވެރިން ރާއްޖޭން ފުރުމުގެ އިންތިޒާމްތަކުގެ ތެރެއިން، "މައްކާ ރޫޓު އިނީޝިއޭޓިވް" ގެ ދަށުން ހަމަޖައްސަންޖެހޭ އިންތިޒާމުތައް ހަމަޖެއްސުމަށް ސަޢުދީ ޢަރަބިއްޔާގެ ވަފުދުގެ ބޭފުޅުން ރާއްޖެ ވަޑައިގަންނަވަން ފައްޓަވައިފި ކަމަށް އިސްލާމީ ކަންތައްތަކާއި އައުޤާފާ ބެހޭ ވުޒާރާއިން ހާމަކޮށްފިއެވެ.

އެ ވުޒާރާއިން މަޢުލޫމާތު ދެއްވި ގޮތުގައި، މައްކާ ރޫޓު އިނީޝިއޭޓިވް ވަފުދުގެ އިސްބޭފުޅެއް ކަމަށްވާ އޮޕަރޭޝަންސް މެނޭޖަރ ޢުމަރު ޢަބްދުލްމަޖީދު އާރް. އައްދަޢީޖު ވަނީ ރޭގެ ވަގުތެއްގައި ރާއްޖެ ވަޑައިގަންނަވާފައެވެ. އަދި މި ވަފުދުގައި ހިމެނިވަޑައިގަންނަވާ އިތުރު 18 ބޭފުޅުން 11 މެއި 2026 ގައި ރާއްޖެ ވަޑައިގަންނަވާ ގޮތަށް ވަނީ ހަމަޖެހިފައެވެ.

ޙައްޖުވެރިންގެ ދަތުރުފަތުރު ލުއިފަސޭހަކޮށްދިނުމުގެ މަޤްޞަދުގައި ސަޢުދީ ސަރުކާރުން ކުރިއަށްގެންދާ މި އިނީޝިއޭޓިވްގައި ދިވެހިރާއްޖެ ހިމަނާފައިވަނީ 1446 ވަނަ އަހަރުގެ ޙައްޖު މޫސުމުގައެވެ. ރާއްޖޭގައި މި ޚިދުމަތް ރަސްމީކޮށް އިފްތިތާޙްކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ. އެ ރަސްމިއްޔާތުގައި ސަޢުދީ ދާޚިލީ ވަޒީރުގެ އެޑްވައިޒަރު ލެފްޓިނެންޓް ޖެނެރަލް ސުލައިމާން ބިން އަބްދުލްއަޒީޒު އަލްޔަޙްޔާގެ އިތުރުން ސަޢުދީގެ މަތީ ފަންތީގެ ވަފުދެއް ބައިވެރިވެލެއްވިއެވެ.

މައްކާ ރޫޓުގެ ސަބަބުން ދިވެހި ޙައްޖުވެރިންނަށް ވަރަށް ބޮޑެތި ފަސޭހަތަކެއް ލިބިގެންދެއެވެ. މި އިންތިޒާމުގެ ދަށުން، ޙައްޖުވެރިން ސަޢުދީއަށް އެތެރެވުމުގެ ކުރިން ރާއްޖޭގައި ތިބެގެން ސަޢުދީގެ އިމިގްރޭޝަން ފޯމަލިޓީޒް ފުރިހަމަކުރެވެއެވެ. މީގެ އިތުރުން، ޙައްޖުވެރިންގެ ފޮށިތައް ސީދާ އެ ބޭފުޅުން ތިއްބަވާ ހޮޓާތަކާ ހަމައަށް ގެންގޮސްދޭތީ، ޖިއްދާ އެއާޕޯޓުގައި ހޭދަކުރަންޖެހޭ ވަގުތު ވަރަށް ބޮޑަށް ކުޑަވެގެންދެއެވެ.

އިސްލާމީ ކަންތައްތަކާއި އައުޤާފާ ބެހޭ ވުޒާރާއިން ފާހަގަކުރި ގޮތުގައި، ރާއްޖެއަށް މި ފުރުޞަތު ލިބިފައިވަނީ އެ ވުޒާރާއިން ސަޢުދީގެ ކަމާބެހޭ އިދާރާތަކާއެކު ކުރި މުހިއްމު މަޝްވަރާތަކެއްގެ ނަތީޖާއެއްގެ ގޮތުންނެވެ.

މިކަމަށްޓަކައި ދިވެހި ސަރުކާރުން ސަޢުދީގެ އިސްވެރިންނަށް ޝުކުރު އަދާކުރައްވާއިރު، ރާއްޖޭގައި ހުންނަ ސަޢުދީ އެމްބަސީންނާއި ސަފީރު ޔަޙްޔާ ޙަސަން އަލްޤަޙްޠާނީ ދެއްވާ އެއްބާރުލުމަށް އިސްލާމީ ކަންތައްތަކާ ބެހޭ ވުޒާރާއިން ވަނީ ޚާއްޞަ ޝުކުރެއް ދަންނަވާފައެވެ.