ވަރލްޑް ބޭންކުން ދިވެހިރާއްޖެއަށް ހާއްސަކޮށް ބޭނުންކުރަމުން އައި "ވަރލްޑް ބޭންކް މޯލްޑިވްސް" އެކްސް އެކައުންޓް ބަންދުކުރުމަށް އެ ބޭންކުން ނިންމައިފިއެވެ.
މިކަން ހާމަކޮށް ވަރލްޑް ބޭންކް މޯލްޑިވްސް ސޯޝަލް މީޑިއާ އެކައުންޓްތަކުން ކުރި ޕޯސްޓެއްގައި ބުނެފައިވަނީ، ރާއްޖެއަށް ހާއްސަކޮށްގެން ސޯޝަލް މީޑިއާގައި މައުލޫމާތު ހިއްސާކުރަމުންދިޔަ އެކްސް އެކައުންޓް ބަންދުކުރުމަށް ނިންމާފައިވާކަމަށެވެ. މި ޕޯސްޓްގައި ވަރލްޑް ބޭންކުން ވަނީ، އެ ބޭންކަށް ދިވެހިންގެ ފަރާތުން ލިބެމުންދިޔަ އެއްބާރުލުމަށް ޝުކުރު އަދާކޮށްފައެވެ.
ވަރލްޑް ބޭންކުން ރާއްޖެއަށް ހާއްސަކޮށްފައިވާ އެކައުންޓް ބަންދުކުރިނަމަވެސް، ވަރލްޑް ބޭންކް އޭޝިއާގެ ސޯޝަލް މީޑިއާ އެކައުންޓް މެދުވެރިކޮށް ރާއްޖޭގެ އިގްތިސާދީ ކަންކަމާ ގުޅޭ ހަބަރުތަކާއި ރިޕޯޓްތަކާއި މައުލޫމާތުތައް ހިއްސާކުރަމުން ދާނޭކަމަށް އެ ބޭންކުން ވަނީ ބުނެފައެވެ.
ވަރލްޑް ބޭންކުން ރާއްޖެއަށް ހާއްސަކޮށް މޯލްޑިވްސްގެ ނަމުގައި ބޭނުންކުރަމުން އައި އެކައުންޓް ބަންދުކުރަން ނިންމީ ކީއްވެގެންކަން ބަޔާން ނުކުރިނަމަވެސް މިއީ މެނޭޖްކުރުމަށް ގެނައި ބަދަލެއްކަމަށް އެ ބޭންކުން ވަނީ ބުނެފައެވެ.
މިކަމާ ގުޅޭގޮތުން ރާއްޖޭގެ ކަމާބެހޭ އިދާރާއަކުން އަދި ވަކި އެއްޗެކޭ ބުނެފައެއް ނުވެއެވެ.
Advertisement
This content is created and paid for by advertisers and does not involve Voice Journalists
