ސަރުކާރުގެ ޕޭ ހާމަނައިޒޭޝަން މަރުހަލާގެ ތެރެއިން މުސާރަ ބޮޑުނުވެ، ބައެއް މުވައްޒަފަންގެ މުސާރަ ކުޑަވެސް ވެފައިވާ ކަމަށާ، އެ މައްސަލަތައް ހައްލުކޮށް، މި މަހުން ފެށިގެން އެ ފަރާތްތަކުގެ މުސާރަ ބޮޑުވެގެންދާނެކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް ވިދާޅުވީ، ޕޭ ހާމަނައިޒޭޝަންގެ ތެރެއިން ބައެއް މުވައްޒަފުންގެ މުސާރައަށް ބަދަލުއައީ އެންމެ އެދެވޭ ގޮތަށް ނޫން ކަމަށެވެ.

އެހެންކަމުން އެ މައްސަލަ ހައްލުކޮށް މިމަހުގެ މުސާރަ ލިބޭއިރު އެތަނުން ގިނަ ފަރާތްތަކުގެ މުސާރައަށް ހެޔޮ ބަދަލު އަންނާނެ ކަމަށް އެމަނިކުފާނު ވިދާޅުވިއެވެ. 

ރައީސް ފާހަގަކުރެއްވި ގޮތުގައި މި މައްސަލަ އެންމެ ބޮޑަށް ދިމާވެފައިވަނީ އެޗްއާރް ދާއިރާގެ މުވައްޒަފުންނާއި، ލީގަލް ދާއިރާގެ މުވައްޒަފުންގެ އިތުރުން ކައުންސިލްތަކުގެ ބައެއް މަގާމުތަކަށެވެ.

ރައީސް ވިދާޅުވީ، މުސާރަ ބޮޑުނުވެ އެއްވަރުވެފައި ތިބި އެފަދަ ފަރާތްތަކުގެ މުސާރަ މިމަހު ބޮޑުވާނެ ކަމަށާ އަދި ވަކިވަކި ހާލަތްތަކުގައި ތިބި މުވައްޒަފުންނަށް ހާއްސަ ޕެކޭޖުތަކެއް ނުވަތަ ހައްލުތަކެއް ޕޭ ކޮމިޝަން މެދުވެރިކޮށް ހޯއްދަވައިދެއްވާނެ ކަމަށެވެ.

"މި މަހު މުސާރަ ދޭއިރުގައި، އިރާދަކުރެއްވިއްޔާ އެ މައްސަލަތައް ހައްލުވެ، މުސާރަ ހަމަ ބޮޑުވެފައި ކުރިއަށްވުރެ މައްޗަށް ދާނެ،" ރައީސް ޑރ. މުއިއްޒު ވިދާޅުވިއެވެ.