ހއ. އިހަވަންދޫ ކައުންސިލަށް އިންތިހާބުވި މެންބަރަކާއި ޑަބްލިއުޑީސީގެ މެންބަރު ކަމަށް އިންތިހާބުވި މެންބަރަކު ސަރުކާރު ހިންގާ ޕީއެންސީއާ ގުޅިއްޖެ އެވެ.
ޕީއެންސީއާ ގުޅިފައިވަނީ އިހަވަންދޫ ކައުންސިލަށް އިންތިހާބުވި މުހައްމަދު ފިރާގާއި، އެރަށު އަންހެނުންގެ ތަރައްގީއަށް މަސައްކަތްކުރާ ކޮމިޓީއަށް އިންތިހާބުވި ހަލީމަތު ހުރާސަތު އެވެ. އެ ދެ މެންބަރުން ޕީއެންސީއާ ގުޅުމަށް މިއަދު ވަނީ ހާއްސަ އިވެންޓެއް ބާއްވާފަ އެވެ.
އެ އިވެންޓްގައި އެ ދެ މެންބަރުންގެ ފޯމާއި ހަވާލުވެފައިވަނީ ޕީއެންސީގެ އިސް ބޭފުޅުންނެވެ. އިހަވަންދޫގެ ޕީއެންސީގެ ބައެއް މެންބަރުން ވެސް ބައިވެރިވި މި އިވެންޓްގައި އެ ޕާޓީއާ ގުޅުނު ފިރާގާއި ހަލީމަތު އިންތިހާބުގައި ވާދަކުރަނީ އަމިއްލަ ގޮތުންްނެވެ.
ނިމިދިޔަ ކައުންސިލް އިންތިހާބުގައި އިހަވަންދޫގެ ގޮނޑިތައް ޕީއެންސީއަށް ގެއްލުނީ އެ ޕާޓީއަށް ނިސްބަތްވާ ދެ ޓީމެއް އިންތިހާބުގައި ވާދަކުރުމުންނެވެ. ނިމިގެންދާ ކައުންސިލްގެ ރައީސް ސަބާހު ހިމެނިވަޑައިގަންނަވާހެން "ރައްޔިތުންގެ ޓީމު" ނަމުގައި އަމިއްލަ ގޮތުން ވާދަކުރިއިރު ޕީއެންސީވެސް ކެންޑިޑޭޓުން ނެރުނެވެ.
ފިރާގާއި ހަލީމަތަކީ އަމިއްލަ ގޮތުން ވާދަކުރި ޓީމުގެ ދެ މެންބަރުންނެވެ. އިންތިހާބުގައި މި ދެ ޓީމުގެ ކެންޑިޑޭޓުންނަށް ލިބުނު ވޯޓަށް ބަލާއިރު އެކުގައި ނިކުމެ ވާދަކުރިނަމަ މުޅި އިހަވަންދޫގެ ހުރިހާ ގޮނޑިއެއް ލިބުމުގެ ފުރުސަތު އޮތެވެ.
މިއަދުގެ އިވެންޓްގައި ސޮބާހާއި އޭނާގެ ޓީމުގެ މެންބަރުން ބައިވެރިވި އެވެ.
Advertisement
This content is created and paid for by advertisers and does not involve Voice Journalists
