މިހާރު ކުރިއަށްދާ އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ ފިރިހެން ޑިވިޝަނުގެ ފައިނަލަށް މޯލްޑިވްސް ބިޒްނަސް ސްކޫލާއި، މެޕްސް ކޮލެޖް ދަތުރުކޮށްފިއެވެ.

މުބާރާތުގެ ފައިނަލުގެ ޖާގައެއް މޯލްޑިވްސް ބިޒްނަސް ސްކޫލް ހޯދާފައިވަނީ ރޭ ކުޅުނު ސެމީފައިނަލް ފުރަތަމަ މެޗްގައި ފެކަލްޓީ އޮފް އެޑިއުކޭޝަން އާ ދެކޮޅަށް ކުޅުނުމެޗް ކާމިޔާބުކޮށްގެންނެވެ. ފޯރިގަދަ ކުޅުމެއް ފެނިގެންދިޔަ މިމެވް ބިޒްނަސް ސްކޫލުން ކާމިޔާބުކުރީ 4-0 ގެ ނަތީޖާއިންނެވެ.

މެޗްގައި ބިޒްނަސް ސްކޫލަށް ގޯލް ހުޅުވާލަދިނީ ހަވަނަ މިނެޓް ތެރޭގައި ތޯހިރުއެވެ. މެޗްގައި ފެނިގެންދިޔަ ދެވަނަ ލަނޑު އަޖުވަދު ކާމިޔާބުކޮށްދިންއިރު، ތިންވަނަ ލަނޑު ކާމިޔާބުކޮށްދިނީ އަބްދުއްރަހްމާނެވެ. އެންމެ ފަހު ލަނޑު ކާމިޔާބުކޮށްދިނީ ކައިސަން އެވެ.

މެޗްގެ މޮޅު ކުޅުންތެރިޔާގެ މަގާމް ހޯދާފައިވަނީ ތޯހިރެވެ.

މުބާރާތުގެ ފިރިހެނުންގެ ޑިވިޝަނުގެ ފައިނަލުގެ އެންމެ ފަހު ޖާގަ މެޕްސް ކޮލެޖް ހޯދާފައިވަނީ ސެންޓަރ ފޯ ފައުންޑޭޝަން ސްޓަޑީޒް އާ ދެކޮޅަށް ކުޅުނުމެޗް ކާމިޔާބުކޮށްގެންނެވެ. ވަރަށް ވާދެވެރިކޮށް ފެނިގެންދިޔަ މިމެޗް މެޕްސް ކާމިޔާބުކުރީ ޕެނަލްޓީއަށް ގޮސްގެން 4-3 ގެ ނަތީޖާއަކުންނެވެ.

ފައިނަލަށް ދިއުމުން މެޕްސްގެ ކުޅުންތެރިން އުފާފާޅުކުރަނީ

ޕެނަލްޓީ ޝޫޓް އައުޓަށް ގޮސް މެޗްގެ ނަތީޖާ ނެރުނީ 1-1 ގެ ނަތީޖާއިން ދެޓީމް އެއްވަރުވުމުންނެވެ.

މެޗްގައި އެންމެ ފުރަތަމަ ލަނޑެއް ޖަހައި ކުރި ހޯދީ ސެންޓަރ ފޯ ފައުންޑޭޝަނުންނެވެ. އެއީ 21 ވަނަ މިނެޓް ތެރޭގައި ޔޫސުފް ކާމިޔާބުކޮށްދިން ލަނޑުންނެވެ. މެޕްސްއަށް އެއްވަރުކޮށްދިނީ 38 ވަނަ މިނެޓް ތެރޭގައި މުހައްމަދު އާއިން އެވެ. 

މުބާރާތުގެ ފައިނަލުގައި މެޕްސް އާއި މޯލްޑިވްސް ބިޒްނަސް ސްކޫލް ބައްދަލުކުރާ ފައިނަލް މެޗް ކުޅުމަށް ތާވަލްކޮށްފައިވަނީ ރެހެނދި ފުޓްސަލް ދަނޑުގައި މިރޭ 21:30 ގައެވެ.