އެމެރިކާގެ ރައީސް ޑޮނަލްޑް ޓްރަމްޕް ބެއިޖިންއަށް ވަޑައިގެން، ޗައިނާގެ ރައީސް ޝީ ޖިންޕިންއާއި ބައްދަލުކުރައްވައި ވިޔަފާރިއާއި ޓައިވާނާއި އީރާނު ހަނގުރާމައާ ބެހޭ ގޮތުން މަޝްވަރާ ކޮށްފިއެވެ.
މިއީ ޓްރަމްޕް ރައީސެއްގެ ގޮތުގައި ޗައިނާއަށް ކުރާ ދެވަނަ ދަތުރެވެ. އަދި 2017 ގެ ފަހުން އެމެރިކާގެ ރައީސަކު ޗައިނާއަށް ވަޑައިގެންނެވި ފުރަތަމަ ފަހަރެވެ.
ބެއިޖިންގެ ގްރޭޓް ހޯލް އޮފް ދަ ޕީޕަލްގައި ބޭއްވި ރަސްމީ މަރުހަބާ ދެންނެވުމުގެ ރަސްމިއްޔާތަށް ޝީ ޖިންޕިން ވިދާޅުވީ ދެ ޤައުމު "ވާންޖެހޭނީ ވާދަވެރިންނަށް ނޫން، ބައިވެރިންނަށް" ކަމަށެވެ. ޝީ ވިދާޅުވީ ދެ ޤައުމުގެ "ގުޅިފައިވާ މަޞްލަޙަތުތައް ޚިލާފުތަކަށް ވުރެ ބޮޑު" ކަމަށެވެ.
ޓްރަމްޕް ބެއިޖިންއަށް ދިޔައީ އެޕަލްގެ ޓިމް ކުކް، ސްޕޭސް-އެކްސްގެ ސީއީއޯ އީލޮން މަސްކް އަދި އެންވިޑިއާގެ ޖެންސެން ހުއާންގ އާ އެކުގައެވެ. ސަމިޓު ފެށުމުގެ ގޮތުން ޓްރަމްޕް ބުނީ "ޗައިނާ ރައީސް ކައިރީގައި ހުރުމަކީ ޝަރަފެއް.“ ކަމަށާ ”ޗައިނާއާ އެމެރިކާގެ ގުޅުން ކުރީގައި ވެސް ނުވާ ވަރަށް ރަނގަޅުވާނެ" ކަމަށެވެ.
މި ދަތުރު ކުރިން ރޭވިފައި އޮތީ އެޕްރީލް ފުރަތަމަ ހަފުތާއަށެވެ. ނަމަވެސް އީރާނު ހަނގުރާމައިގެ ސަބަބުން މެއި މަހަށް ފަސްކުރެވުނެވެ. ތެހެރާންގެ ގާތް ބައިވެރިޔާ އަދި އެ ޤައުމުގެ ތެލުގެ އެންމެ ބޮޑު ކަސްޓަމަރުގެ ހައިސިއްޔަތުން ޗައިނާ ވެފައި ވަނީ ސުލްޙައިގެ މެދުވެރިއަކަށް ވެދާނެ ޤައުމެއްގެ ގޮތުގައެވެ. ނަމަވެސް ޓްރަމްޕް ވަނީ އެ ހަނގުރާމަ ނިންމުމަށް ޗައިނާގެ އެހީ ބޭނުން ނުވާކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
