އޮޕަރޭޝަން ކުރަނގި ސެންޓަރަށް ބަޔޮމެޓްރިކްސް ނެގުމަށް އަންނަ ގިނަ ބިދޭސީން މިހާރުވެސް އެކަން ފުރިހަމަ ކޮށްފައި ހުންނަކަން ފާހަގަކުރެވޭކަމަށް މިނިސްޓްރީ އޮފް ހޯމްލޭންޑުން ބުނެފިއެވެ.

ނޭޝަނަލް ސެންޓަރ ފޮރ އިންފޮމޭޝަން ޓެކްނޮލޮޖީ (އެންސީއައިޓީ) އިން ގާއިމްކޮށްފައިވާ ކައުންޓަރަށް ގިނަ އަދަދެއްގެ ބިދޭސީން ބަޔޮމެޓްރިކްސް ނެގުމަށް ކިއުޖެހިފައިވާއިރު، އެކަމާ ގުޅޭގޮތުން އެކްސްގައި ކުރި ޕޯސްޓެއްގައި ހޯމް މިނިސްޓްރީން ބުނީ، ބަޔޮމެޓްރިކްސް ނެގުމަށް އައި ގިނަ ފަރާތްތަކުން މިހާރުވެސް 10 އިނގިލީގެ ނިޝާން ފުރިހަމަކޮށްފައިވާކަން ފާހަގަކުރެވޭ ކަމަށެވެ.

މިނިސްޓްރީން ވަނީ ބަޔޮމެޓްރިކްސް ނެގުމުގެ ކުރިން އެ ފަރާތަކީ 10 އިނގިލީގެ ނިޝާން ފުރިހަމަ ނުވާ ފަރާތެއްކަން ކަށަވަރުކުރުމަށް އެމީހަކު ވަޒީފާ އަދާކުރަމުންދާ ކުންފުންޏަށް އިލްތިމާސްކޮށްފައެވެ. އެގޮތުން ކިއު.އާރް ކޯޑް މެދުވެރިކޮށް މުވައްޒަފުގެ ބަޔޮމެޓްރިކްސް ސްޓޭޓަސް ފަސޭހަކަމާއެކު ބައްލަވާލެއްވޭނޭކަމަށް މިނިސްޓްރީން ވަނީ ފާހަގަކޮށްފައެވެ.

ހޯމްލޭންޑް މިނިސްޓްރީން ވަނީ، މީގެ އިތުރުން، 10 އިނގިލީގެ ނިޝާން ފުރިހަމަނުވާ މުވައްޒަފުންގެ ލިސްޓް، އެކްސްޕެޓް ސިސްޓަމަށް ލޮގްއިން ވުމުން، ފެންނަގޮތަށް ހަމަޖައްސާފައެވެ. އެގޮތުން ޕޭޖުގެ މަތީގައިވާ ރެޑް ނޯޓިހުގައިވާ ލިންކުން މައުލޫމާތު ލިބޭނޭކަމަށް މިނިސްޓްރީން ބުންޏެވެ. 

ބަޔޮމެޓްރިކްސް ނެގުމަށް ގިނަ އަދަދެއްގެ ބިދޭސީ މަސައްކަތްތެރިން ވަނީ "އޮޕަރޭޝަން ކުރަނގި" ޖޮއިންޓް އޮޕަރޭޝަން ސެންޓަރުދޮށަށް އެއްވެފައެވެ. އެތަނުގައި ގިނަ އަދަދެއްގެ ބިދޭސީން ކިއު ހަދާފައި ތިބުމުގެ ސަބަބުން އެހިސާބުގައި ހިނގާބިނގާވެ އުޅުމަށްވެސް އުނދަގޫވެފައިވާކަން ފާހަގަކޮށްލެވެއެވެ.